Җәяүлеләр, сак булыгыз

Җәяүлеләр, сак булыгыз
Юлларда һәлак булган җәяүлеләр саны, гадәттә, көз айларында арта. Узган ел республикада җәен алар 35 кенә булса, көзгә 72гә җитте.
Фаҗигаләрнең 70 проценты тәүлекнең караңгы вакытында булуы да игътибар җәлеп итә. Быел республикада 8 айда 864 җәяүлене бәрдерү очрагы теркәлде. Арча районы территориясендә җәяү-леләргә зыян салган 4 очракта 1 кеше һәлак булып, 3се зыян күрде.
Көзен пассажирлар юл аркылы чыгу урыннарында җәяүлеләрне бәрдерү очраклары да арта. Сәбәбе — көн тиз караңгылана, күз күреме, аеруча яңгырлы көннәрдә, начарлана. Мондый шартларда җәяүлеләрнең юлда пәйда булуы транспорт белән идарә итүчеләр өчен көтелмәгән хәл булуы да мөмкин. Бу хакта җәяүле исеннән чыгармасын иде. Юл хәрәкәте кагыйдәләре көннең караңгы вакытында җәяүлеләргә үз киемнәрендә яктылык чагылдыргыч әйберләр, мәсәлән, беләзек, файдалануны тәкъдим итә. Бу очракта машина астында калу куркынычы күпкә кими, чөнки транспорт белән идарә итүче җәяүлене ерактан ук күреп килә.
Аннан җәяүлеләрнең үзләренә дә сак булырга кирәк. Юлны аркылы чыкканда капюшоннарны төшерергә, кулчатырны җыярга, телефоннан сөйләшмәскә кирәк. Тротуар булмаса, җәяүле алдан килгән автомобильне күрү өчен машиналар каршыга килгән яктан барырга тиеш. Югыйсә, машина бәреп китә ала. Быел гына Татарстанда шундый 17 очрак теркәлгән, аларда 6 кеше һәлак булган, 13е зыян күргән, 29 очракта исерек хәлдәге җәяүле-ләрне бәрдергәннәр. Анда да 7 кеше һәлак булган.
Җәяүлеләр үзләре дә бик еш юл хәрәкәте кагыйдәләрен боза. Арча районы буенча 229 җәяүлегә 500әр сум штраф салынды. Транспорт белән идарә итүчеләргә дә җәяүлеләр юл аркылы чыккан урыннарда игътибарлы булырга, тизлекне киметергә кирәк. Безнең районда бу хакта оныткан 167 транспорт белән идарә итүчегә 1500әр сум штраф салынды. Бу хакта безгә Россия Эчке эшләр министрлыгының Арча районы буенча ЮХИДИ бүлекчәсе җитәкчесе, полиция майоры Илдар НОТФУЛЛИН хәбәр итте.