Галим шигырь яза

Галим шигырь яза
Арчаның 7нче мәктәбендә якташыбыз, галим, шагыйрь Рифат Җамал белән очрашу булды.
Бакчасы гөлләргә кү-мелгән, бинасы быел ныклап төзекләндерелгән мәктәпкә кунак алып килүе дә күңелле шул. Бу мәктәптә кунакны каршы ала беләләр. Шагыйрьнең тормыш юлына багышлап иҗади почмак эшләп куйганнар. Ул гынамы, башта слайдлар ярдәмендә тулы бер документаль фильм карадык. Укучылар шигырьләрен яттан сөйләде. Татар теле һәм әдәбияты укытучысы Рәдиф Исмәгыйлев очрашуны күңелле итеп алып барды. Арчаның “Казан арты” тарих-этнография музее директоры урынбасары Шәфигулла Гариповка шундый җылы, эчтәлекле очрашу оештырганы өчен рәхмәт.
— Мәктәпле авылга (Айван) килсәм, сөенәм мин, — дип башлады сүзен Рифат Җамал.
Мәчетләр күбәя
Мәктәпләр азая...
Авылсыз зиратлар өчен дә борчыла. Авылны ике нәрсә — мәктәп һәм ферма тота, ди ул.
Мин сезнең кебек гади бер авыл малае, дип балаларны авызына каратты да куйды шагыйрь, тын да алмый тыңладылар. Балаларны ул акчага, байлыкка табынмаска, китапны күп укырга дәште. Байлык бәхет түгел, байлар күбрәк елый, диде.
Кемнеңдер хыялы —
Тау–тау алтын.
Ә минем күңелемә
Бер уч арыш саламы
Күпкә якын.
Ул үзенең фәлсәфи шигырьләрен “фикерләр” дип атый.
Шигырь бит ул —
Җанның каны.
Кан ярадан
Чыга бары.
Бүген, 1 октябрьдә, аның туган көне. 63 яшь. Әле кайчан гына Мирҗәм авылыннан өч егет беренчеләрдән булып югары уку йортына укырга керәбез, дип чыгып китә. Шуннан соң күпме вакыт узган. Казан ветеринария институты студенты, армия хезмәте, штангачы, ветеринар, үзе укыган институтта укытучы, кафедра мөдире, ректор, галим һәм шагыйрь. Гади авыл малаеның зур хезмәт юлы узуы һәм аны шома гына үтмәве сокландыра һәм уйландыра. Ә бәлки сикәлтәле тормыш юллары аны шагыйрь иткәндер?!
Батырмакчы булдылар.
Батмадым.
Батудан курымадым.
Чөнки беләм,
Агач, черек булмаса,
Күпме төптә ятса да,
Барыбер калыкканын.
Рифат Җамалның “Өзгә-ләнмә күңел”, “Күңел сүрәләре”, “Ташта үскән чәчәкләр” китапларының кайсы битен ачсаң да, кызыклы һәм гыйбрәтле фикерләр белән очрашасың.
Мине яратмыйлар —
Әллә бәхетлемен?!
Мактасалар, уйлыйм:
Әллә тәхеттә мин?
Рифат Җамалның шигырьләрен укыган саен укыйсы килә.
Ачтан үлмәс өчен
бер тиенне
Эзләгәндә меңнәр
Бер капкорсак,
ябыгырга диеп,
Түли меңнәр,
Меңнәр!..
...Рифат Җамал һаман да эзләнүдә, иҗат эшендә.
Языла әле, языла,
Языла шигырьләрем.
Күңел тулы – чәчкә исе,
Һәм дә күңелдә – әрем.
***
Кемдер дәшә:
“Бәхет – рәшә!”
Алай булгач,
Яшәү нәрсә?!
Румия НАДРШИНА