Яшиселәр килә, яшиселәр...

Үзәк стадионда мәгариф учреждениеләре башлангыч профсоюз оешмалары командалары кросс бирде. Совет җитәкчесе Вакыйф Харисов профсоюз әгъзаларын яңа уку елы, спартакиаданың башлануы, үткән Профсоюз активистлары көне, Тәрбиячеләр көне, Укытучылар көне белән котлап, уңышлар теләде. Ярышларны Арчаның 7нче мәктәбе физкультура укытучысы Булат Гәрәев алып барды. Хатын–кызлар 35 яшькә кадәр-ле һәм аннан югары, ир–атлар 40 яшькәчә һәм аннан өлкәнрәк яшьтәге төркемнәргә бүленеп йөгерде. Соңыннан командалар эстафета ярышында сыналды.
Агачларның алтынсу төскә кергән вакыты. Мондый көннәрдә тирәкләр үзенә күрә бертөрле хуш ис бүлеп чыгара. Агачлар әйләнәсендә утырган стадионда төрле төбәкләрдән җыелган хезмәттәшләрнең үзара хәл–әхвәл сорашып, тәҗрибә уртаклашып, спортта көчләрен сынаулары кәефләрне күтәреп җибәрә торган зур чара. Күңелгә җыр сүзләре килә: яшиселәр килә, яшиселәр…
40 яшькә кадәрле ир–атлар арасында 1 километр араны йөгерүдә 7нче мәктәпнең физика–информатика укытучысы, Айван авылы егете Фидәрис Зиннәтуллин беренче булып финиш бирде.
— Беренче килермен дип уйламаган идем, — ди.
Фидәрис һәрвакыт ачык йөзле, көләч егет. Авыл сабан туенда, спорт, мәдәни чараларда — ул һәрвакыт үзәктә.
35 яшькә кадәрле хатын-кызлар кроссында (1км.) беренче килгән Энҗе Гыйззәтова:
— 3нче мәктәптә инглиз теленнән укытам, — ди. — Өченче ел рәттән беренче киләм. Арча педагогика көллиятендә укыганда Бари Каюмовичта шөгыльләндем. Хәзер дә гел хәрәкәттә. Роликта, велосипедта, тимераякта йөрим. Спорттан күңел күтәренкелеге, эшкә дәрт алам.
Энҗе артыннан икенче булып финиш биргән Носы мәктәбе физкультура укытучысы Гүзәл Ганиева шулай ук Бари Бакиров укучысы.
— Үзем Шура авылыннан, — дип сөйли ул. — 21 яшьтә. Икенче ел мәктәптә эшлим. Арча педагогика көллиятен тәмамладым. Көллияткә укырга кергәнче мин физкультура дәресен бик өнәми идем. Бари Каюмович бу фәнгә мәхәббәт уятты. Андый кешене күргән юк иде әле. Рәхмәт.
35 яшьтән югары хатын–кызлар стартка әзерләнгән арада Иске Ашыт мәктәбе директор урынбасары, физика укытучысы, 48 яшьлек Нурия Гарипова белән сөйләшәбез.
— Йөгерүдән курыкмыйсызмы? Ничек гәүдәне формада тотасыз? Өйдә тренажерлар бармы әллә? — дип сорыйм үзеннән.
— Иптәшем белән өч малай үстердек, тренажерлар шулар булды.., — дип елмая Нурия ханым.
Менә шулай уен–көлке, зур тырышлыклар белән спартакиада башланып китте. Профсоюз оешмалары советы рәисе Вакыйф Харисов үзе эшли башлаганнан бирле (10 елдан артык) спартакиаданы оештыра. Җиңәсең килә икән инде, ел әйләнәсе спорт белән шөгыльләнми булмый. Ә хәрәкәт сәламәтлек, дигән сүз. Бүләк алулары гына да ни тора?! Узган уку елы спартакиадасында җиңүче Яңа Кенәр мәктәбенә теннис өстәле, агросәнәгать көллиятенә тренажерлар, Арчаның 7нче мәктәбенә спорт киемнәре, Лесхоз мәктәбенә пневматик мылтык бүләк ителде. Шәп бит!
Бу юлы кросста Арчаның 7нче мәктәбе командасы — беренче, Яңа Кенәр лицее — икенче, 5нче гимназия өченче урынны алды.
Румия Надршина