Иң зур хөрмәт — сезгә!

Иң зур хөрмәт — сезгә!
Район башкарма комитеты җитәкчесе вазыйфаларын башкаручы Илшат Нуриев район тормышында актив катнашучы ветераннар белән очрашты.
— Районның шундый хөрмәтле кешеләре белән очрашуга бик шат мин, — диде ул. — Сезнең барыгызга да заманында тырышып хезмәт иткәнегез, бүген дә җәмәгать эшләрендә, яшь буынны тәрбияләүдә актив катнашуыгыз өчен зур рәхмәт!
Илшат Нуриев Арча районының бүгенге ныклыгын, төзеклеген тәэмин итүдә ветераннар өлеше дә зур булуын билгеләп үтте.
— Башкарылган эшләр күп, — диде ул. — Эшлиселәре тагын да күбрәк. Быел район 140 мең тонна ашлык җыйнап алды, республикада дүртенче урында. Бергәләп яңа уңышлар яуларга язсын! Минем ишекләр сезнең өчен һәрвакыт ачык, сораулар булганда рәхим итегез!
Район ветераннар советы рәисе Альберт Җамалиев вакыт табып очрашуга килгәне өчен Илшат Нуриевка барлык ветераннар исеменнән рәхмәт әйтте.
Ветераннар бу көнне концерт карап, чәй өстәле артында сөйләшүне дәвам иттеләр.
Ә өлкән яшьтәге кешеләр ункөнлеге, гадәттәгечә, быел да районда Мәдәният йортында башланып китте. Кунакларны Илһамия Гыйлаҗиева җитәкчелегендәге “Сөембикә” бию төркеме дәртле биюләре белән каршы алды.
Һәрберсенең йөзендә елмаю балкый. Арча сандугачы Расих Галимҗанов башкаруындагы җыр кичәгә бәйрәм рухы өстәде.
— Бүген биредә һәр оешма, предприятие вәкилләре катнаша. Һәрберсе илебез, районыбыз үсешенә зур өлеш керткән олы ихтирамга лаек кешеләр. Районыбыз бүген күзгә күренеп үсә, чәчәк ата икән, беренче чиратта, без сезгә рәхмәтле, — диде район башлыгы урынбасары Любовь Осина, барысына да сәламәтлек, озын гомер, бәхетле матур тормыш теләп.
— Районда 11 меңнән артык ветеран бар, — диде район ветераннар советы рәисе Альберт Җамалиев. — Бу залга барысын да чакыра алмадык. Әмма 10 көн дәвамында аларның берсе дә читтә калмаячак. Мөмкинлектән файдаланып, мин шушы чараны оештырган җитәкчеләргә олы рәхмәтемне белдерәм.
Соңыннан Кәрим Тинчурин исемендәге татар дәүләт драма һәм комедия театры артистлары өлкәннәргә Шамил Фәхретдиновның “Алтын көз” спектаклен тәкъдим итте.