Сез иң күркәм кеше икәнсез

Сез иң күркәм кеше икәнсез
Арча ягы бөек мәгърифәтчеләре, танылган язучылары, сәнгать эшлеклеләре, галимнәре, тырыш һәм хезмәт сөючән халкы белән дан тоткан. Шуңа Арчабызда яшь буынга белем һәм тәрбия бирүче мөгаллимнәр һәм мөгаллимәләрнең күп булуы да гаҗәп түгел.
Бүген мәктәптә һәркем киләчәгебезгә йөз тотып эшли. Ул яшь буынга заман таләпләренә туры китереп белем генә биреп калмый, дөньяны танып белергә өйрәтә, чын шәхес итеп тәрбияли. Һәрберебезнең тормышта үрнәк алып яшәрлек беренче һәм яраткан укытучысы бар. Шуңа Укытучылар көне дә бөтенхалык бәйрәме буларак билгеләп үтелә.
3 октябрьдә Арча Мәдәният йортында Укытучылар көне уңаеннан зур бәйрәм булды. Аны район башкарма комитеты җитәк-чесе вазыйфаларын башкаручы Илшат Нуриев ачып җибәрде.
— Минем өчен укытучы сүзе изге. Гомерем буе укытучы булырга хыялланып яшәдем. Берара Казан аграр университетында укытып та алдым. Аларның нинди авыр, җаваплы хезмәт башкаруларын үз җилкәмдә тойдым. Без укытучыларга илебезнең, республикабызның киләчәген ышанып тапшырабыз. Бүген сезнең өчен күп эш башкарыла: мәктәп-ләр төзекләндерелә, заман технологиясе белән җиһазландырыла, грантлар бирелә. Бердәм дәүләт имтиханнарында 100 балл алучыларны, олимпиадаларда җиңүчеләрне, даннары еракларга таралырлык чемпионнарны, хезмәт сөюче гражданнарны тәрбияләгез. Тырышлыгыгыз тиешенчә бәяләнер. Хезмәтегез өчен зур рәхмәт. Бәйрәмегез белән, — диде ул һәм олы хөрмәт йөзеннән үзенең укытучысы, Апаз мәктәбендә балаларга белем биргән хезмәт ветераны Гөлбаһар Миннебаевага чәчәк бәйләме бүләк итте.
Шулай ук Илшат Нуриев Арча сәнгать мәктәбенең сәнгать бүлеге укытучысы Раилә Фәтхуллинага “Россия Федерациясе гомуми белем мәктәбе мактаулы хезмәткәре” күкрәк билгесе, алдынгы укытучыларга Россия Федерациясе, Татарстан Республикасы Мәгариф һәм фән министрлыкларының Мактау грамоталарын тапшырды.
Укытучылар бәйрәме бүләкләргә бай булды. Республика олимпиадаларында җиңүче укучылар әзерләгән, Бердәм дәүләт имтиханында 100 балл җыючы укучылары булган укытучылар, мәктәпне яңа уку елына әзерләүдә, ныклап төзекләндерүдә уңышларга ирешкән коллектив җитәкчеләре, мәгариф өлкәсендә озак еллар эшләгәннәр Арча муниципаль районы башкарма комитеты җитәкчесе вазыйфаларын башкаручының Рәхмәт хатына лаек булды, хезмәт ветераннарына чәчәк бәй-ләмнәре, бүләкләр бирелде.
Узган уку елы Мәгариф һәм фән министрлыгы тарафыннан Математика елы буларак игълан ителгән. Министрлык ра-йонга бүләк иткән математика кабинеты “Ел укытучысы” республика бәйгесендә җиңү яулаган Сеҗе мәктәбе җитәкчесе Марс Абдуллинга тапшырылды. Ел дәвамында район мәгариф идарәсе тарафыннан төрле бәйгеләр игълан ителгән булган. Мәсәлән, “Иң яхшы география мәйданчыгы”, “Иң яхшы мәктәп яны участогы”, “Иң яхшы спорт мәйданчыгы”, балалар бакчалары өчен “Иң яхшы уен мәйданчыгы” бәйге-ләре. Җиңүчеләрне район мәгариф идарәсе җитәкчесе Руслан Низамов билгеләп үтте. Шулай ук ра-йон күләмендә оештырылган ярминкәләр, фестивальләр, спорт ярышлары, мәдәни чараларда актив катнашучылар да читтә калмады.
— Бүген — бәйрәм-нәрнең дә иң матуры, иң кадерлесе. Сез хезмәтегездән ямь һәм тәм табасыз, заман белән бергә атлыйсыз, юк вакытыгызны бар итеп сәнгатьтә дә катнашасыз. Рәхмәт сезгә, — диде мәдәният идарәсе җитәкчесе Илнур Котдусов, иң активларны бүләкләп.
Бу көнне мәгариф өлкәсенең һәр тармагында эшләүчеләр билгеләп үтелде. Үзешчәннәребез чыгышлары да укытучыларга багышланды.
— Бу бәйрәмдә сезгә нинди генә матур сүзләр җиткерсәк тә аз булыр,— диде алып баручылар Рәдиф Исмәгыйлев һәм Чулпан Сәмигуллина.— Укытучы ул —тынгысыз җан. Бу уку елында да шулай куанып сөйләрлек уңышларга ирешү насыйп булсын.
Гөлсинә ЗӘКИЕВА