Хөкемдарларны да хөкем итәләр

Хөкемдарларны да хөкем итәләр
Биектау мәдәният йортында суд системасында эшләүчеләрнең “Фемида сәнгать белән дус” бәйгесе булды. Анда Арча район суды хезмәткәрләре дә катнашты.
Үткән җомгада көндезге сәгать 2дә башланды ул. Фойеда һәр район үзенең күргәзмәсен оештырган иде. Безнең район һөнәрчеләре чиккән чүәк, түбәтәйләре белән килгән. Татарстан Республикасының Югары Суды Рәисе Илгиз Гыйләҗев, Биектау районы башлыгы Рөстәм Кәлимуллин катнашында бер төркем кунаклар иң башта күргәзмәләр белән танышты. Күңелләрне җилкендереп тальян моңы агылды... Кунакларны каршы алганда гына була торган үзенә күрә бер төрле җылы мохиттә Югары Суд рәисе Илгиз Гыйләҗев журналистларның сорауларына җавап бирде.
— Кешене хөкем итү, судья булу — бик авыр хезмәт, — дип сөйләде ул. — Әмма безнең судьялар да иң беренче чиратта гади кешеләр. Алар шулай ук футбол, хоккей, теннис уйный. Менә әле Пермьдә үткән Идел буе Федераль округы буенча мини-футбол ярышында безнекеләр 1нче урынны алды. Өченче ел инде җиңү яулыйлар. 2014 ел — республикада Мәдәният елы. Шул уңайдан суд системасында эшләүчеләр үзләрен сәнгать өлкәсендә дә сынап карая-чак. Ә бездә сәләтлеләр күп.
Сәхнәдә чыгыш ясау ансат эш түгел. Башына төшкәннәр моны яхшы белә. Мәдәният хезмәткәрләреннән башка мәдәни булмый ул. Район Мәдәният йортының элеккеге сәнгать җитәкчесе Равил Габдрахманов хәзер ра-йон судында эшли. Бәйгегә әзерләнү аңа йөкләнә. Ул районның иң оста һәм абруйлы мәдәният белгечләрен чакыра: Татарстанның атказанган мәдәният хезмәткәре, хореограф Венер Хисамиев, Татарстанның атказанган мәдәният хезмәткәре, җыр белгече Фирая Батыршина, режиссер Нурия Фәхриева.
Арчалыларның чыгышы эчтәлеге, башкару осталыгы һәм киемнәре белән аерылып торды. Чыгышлардан Арчаның йөзен күреп була иде. Күмәк мари халык биюе Арча районында татар, урыслар гына түгел, марилар да яшәвенә ишарәли. Равил Габдрахмановның (“Озату”) һәм район судында администратор булып эшләүче Рамил Хәкимовның (“Бер карадым күзләреңә”) халык җырларын башкарулары халык иҗатына ихтирамны һәм аларны түкми-чәчми буыннан–буынга күчеп баруын күрсәтә иде. Моңлы, озын көйләрне башкару ансат түгел. Аларны киң сулышлы, матур тавышлы җырчылар гына башкара ала. Рамил Хәкимовның җырлаганын ишеткән юк иде әле, сәхнәләрдән төшерми торган җырчы икән ул!
Фирая Батыршина кызларны тәмам җырчыга әверелдергән. Матур күлмәк, калфаклардан, иңнәренә ак шәл салып, үзләрен сәхнәдә бик матур тотып, “Шәл бәйләдем” башкорт халык җырын өч тавышка җырлады алар.
Район суды секретаре Лилия Гыйниятуллинаның якташыбыз (Субаш Аты) Солтан Гыйлемханов язган “Туган ягым” шигырен сәнгатьле итеп укуын тыныч кына тыңлап булмый иде. Шигыре дә бик уңышлы сайланган. Режиссер Нурия Фәхриева гына мондый номерларны әзерли ала торгандыр!
Сигез район суды арасында безнекеләр өченче урынны алды. Нәфис сүз остасы Лилия Гыйниятуллина чыгышы “Иң яхшы нәфис сүз сөйләүче” дипломына лаек булды. Котлыйбыз суд системасында эшләүчеләрне, призлы урынны алулары белән!
...Сарман шагыйре, тарихчы Дамир Гарифуллинның кызы Гөлназ Вәлиева Арча районы судында судья булып эшли. Гөлназ Дамировнадан әтисенең шигырьләрен сәхнәдән сөйләтәсе иде. Нинди шәп килеп чыгар иде! Жюри да судья чыгышларына очконы күбрәк куйды сыман тоелды миңа.
Кулыма Дамир Гарифуллинның китабын алам. “Робагыйят” китабындагы дүртьюллыкларны укыган саен укыйсы килә.
Кайчан да бер дөреслек
өскә чыга,
Хаклык сәгате барыбер
бер суга.
Текә кыяга
оясын корса да,
Бөркет була алмый
козгын, карчыга.
Румия НАДРШИНА