Бер күрешү үзе бер гомер

Бер күрешү үзе бер гомер
Өлкәннәр ункөнлеге уңаеннан күп урында аларны хөрмәтләү тантанасы үткәрелде. Арча үзәкләштерелгән китапханәләр системасы традиция буенча быел да барлык ветераннарны чакырып, чәй өстәле артында очрашу оештырды.
— Безнең барлыгы 46 ветераныбыз бар. Төрле сәбәпләр белән берничәсе катнаша алмады. Ә килгәннәр искиткеч матур тәэсирләр алды,— диде җитәкчесе Лилия Фазылова. — Тарихка да күз салдылар, истәлекләре белән дә уртаклаштылар, хисләре ташып, күзләрендә яшь бөртекләре ялтырарга да ирек бирделәр. Китапханәчеләрдән Юлия Ибраһимова бию, Миләүшә Кәлимуллина җыр бүләк итте. Үзләре дә тыныч кына кала алмады, кызларга кушылды. Ветераннарыбыз Зөлфия Яхина үзе дә җырлады, Әлфия Рәхимова мөнәҗәтләр укыды.
— 40 ел эшләп лаеклы ялга чыктым мин. Хезмәтемне яраттым. Эшләп йөргәндә мәшәкатьләр белән белмисең, коллективтан аерылгач кына аның нәрсә икәнен аңлыйсың. Сине онытмаулары үзе үк күңелне күтәрә. Бер күрешү үзе бер гомер, дип тә тикмәгә генә әйтмиләр икән. Мондый очрашу кичәләре күңелгә рәхәтлек бирә. Рәхмәт, олылап безне шулай кунакка чакыруларына, — диде күзләренә килгән яшьләрен тыеп Зәйнәп Нуриева.
Күзләре яшьләнде
7 октябрьдә Арчадагы өлкәннәр һәм инвалидлар интернат–йортында концерт булды.
— Арча Мәдәният йорты үзешчәннәре бирегә килеп өлкәннәр алдында чыгыш ясауны традициягә әверелдерде. Бездә тәрбияләнүчеләр күңел биреп карыйлар, алкышлыйлар, соңыннан аркаларыннан сөя–сөя рәхмәтләрен әйтәләр. Алар өчен зур бәйрәм бит бу, — ди интернат-йорт җитәкчесе Мулланур Гыйлаҗиев.
Данис Гайфуллин, Алсу Шиһапова, Факия Шәрәфетдинова, Расих Галимҗанов апа, абыйларга яраткан җырларын бүләк иттеләр. Әниләр турында, моңлы җырлар тыңлаганда өлкәннәр күзләрендә яшь бөртекләре ялтырады. Шундый матур бүләк әзерләп, күңелләрен күргән өчен алар үзешчәннәргә рәхмәтләрен җиткерделәр.
Икенче көнне бирегә өлкәннәрнең хәлен белергә Арча агросәнәгать көллиятенең 32нче төркеме студентлары (җитәкчесе Гадилә Җамалиева) килде. Алар да бик матур чыгыш ясады, апалар һәм абыйларны үзләре пешергән тәмле ризыклар белән сыйлады.
Сәхнәдә – ветераннар
Яңа Кенәрдә дә бу көннәрдә төрле чаралар оештырылды. Яңа Кенәр мәдәният йортында ветераннар советы рәисе Габделбәр Сабиров инициативасы, мәдәният йорты хезмәткәрләре тырышлыгы белән ветераннар катнашында “Көзләрдә дә язлар кабатлана” дигән кичә булды. Аны Рәмзия Вәлиуллина һәм Фәрит Вафин үзенчәлекле итеп алып барды. Аннан сәхнәгә өлкәннәр чыкты, аларга ярдәмгә яшьләр дә килде. Әлфия Фәйзрахманова, Гөлчәчәк Карпова, Билүс Сибагатуллин, Наҗия Әхмәтҗанова, Җәүдәт Галимҗановның бию-ләре, Әхәт Сәфәргалиев, Илдар Фәйзрахманов, Нәкыйп Галимҗановның гармунда уйнаулары, Саимә Нигъмәтҗанова, Рәшит Сөләйманов, Сәрия һәм Билүс Сибагатуллиннар, Илдар Фәйзрахманов, Равилә Хөсәенованың җырлаулары, Әлфинур Садыйкова, китапханәче кызлар чыгышлары алкышларга күмелде. Әнә шулай ветераннар картаямени соң йөрәк, дип, үзләренә дә, авыл халкына да бәйрәм ясадылар.
“Өмет” тә
“Өмет” өлкәннәрне тернәкләндерү үзәгендә сәламәтлекләрен ныгытучыларны халыкны социаль яклау идарәсе каршында эшләп килүче “Чишмә” ветераннар ансамбленә йөрүчеләр матур чыгышлары белән сөендерде. Җиде хезмәт ветераны — Илгизәр Хөсәенов, Минсәвәр Хәбибуллина, Сөмәя Җиһаншина, Илсөя Хөсәенова, Хәсибә һәм Вәлиулла Гатауллиннар, Данил Рәхимбаев менә дигән концерт куйдылар, уен оештырдылар.
— Искиткеч булды. Яшьлегебез моңнарын ишеттек, җырларын тыңладык. Рәхмәт аларга, — диде соңыннан Ашытбаштан килгән Мәрьям Тимергалиева.
— Өлкәннәр ункөнлеге программасына күбрәк мәдәни чаралар үткәрүне керттек. Иске Ашыт, Сөрде мәдәният йортларыннан килеп концертлар куйдылар. Яңа Кенәр мәдәният йортында үткән кичәдә катнаштылар. Бездә тәрбияләнүчеләр үзләре дә читтә калмады. Аннан үзләре үзәктә дә төрле кичәләр оештыралар, — ди “Өмет” өлкәннәрне тернәкләндерү үзәге җитәкчесе Ирек Исмәгыйлев. — Көннәре файдалы гына түгел, күңелле дә үтсен өчен тырышабыз.
— Мин бюджет оешмаларында эшләгән хезмәт ветераннары кушуы буенча килдем, — диде Иске Кенәрдә яшәүче, озак еллар Иске Ашыт авыл җирлеген җитәкләгән Хәмбәл Вәлиев. — Безнең өчен чәй өстәле әзерләп, зур кунак иттеләр. Очрашуда озак еллар Иске Ашыт мәдәният йортын җитәкләгән Татарстанның атказанган мәдәният хезмәткәре Саяра Фәттрахманова, озак еллар көянтәгә асып, җәяүләп өч авылга кино күрсәтеп йөргән Мәмдүдә Миннебаева, авыл советы сәркатибе булып эшләгән Зөлфия Фәтхуллина катнашты. Бергә җыеп, безнең күңелне күргән өчен оештыручыларга бик зур рәхмәт.
Алар – яшьләргә үрнәк
Өлкәннәр көнен Хәсәншәехта яшәүче Суфия апа быел да имин генә каршы алды. Апаз авыл җирлегендә яшәүче, авыл хуҗалыгында намуслы хезмәт куеп лаеклы ялга чыккан барлык өлкәннәр кебек Суфия Галиева да “Ватан” хуҗалыгы һәм авыл җирлеге җитәкчеләренә олы рәхмәтле. “Безне, өлкәннәрне, ел да зурлыйлар, өлкәннәр көнендә бүләксез калганыбыз юк, ел әйләнәсе төрле бәйрәм чараларына чакырып торалар, концертларга дәшәләр, гозер белән керсәң, ярдәм кулы сузмый калганнары юк”, — ди Хезмәт Кызыл Байрагы һәм Ленин орденнары иясе. Бу бүләкләргә ул чорларда алдынгы савымчы булган Суфия апа 1971 һәм 1973 елларда лаек була. 35 ел сыер сауган апага бүгенге тормышы зур бүләк. Гәрчә, балачагы, яшьлеге авыр елларга туры килеп, инде үзе гаилә башлыгы булган улын мәңгелеккә югалту хәсрәтенә дучар булса да, бүген калган һәр баласының, оныкларының исән-легенә куанып, пар канатлы булуына сөенеп яши.
Хәсәншәех мәдәният йортына җыелып күрешкән, күңелләрне тетрәндерерлек моңлы, гади, әмма бай эчтәлекле концерт караучы Апаз авыл җирлегенә кергән авылларның өлкәннәре, яшьлек илләреннән урап, бүгенге көннәренә ихластан куанып утырды. Сәхнәдә сәләтле яшь-ләрнең чыгышы шатландырса, өлкәннәрнеке соклану, горурлану уята. Әнә нинди булдыклы ул өлкәннәр! Үзвакытында җир җимертеп эшләп, өлкәнәйгәч тә активлыкларын югалтмыйча, яшьләргә үрнәк булып яшиләр.
Онытмауларына рәхмәт
Әйе, аздан гына күңеле була, аздан гына хәтере кала шул өлкән яшьтәгеләрнең. Мондый очрашулар, ихтирам алар өчен кош тотканга тиң. Алар безнең игътибарга лаек та. Очрашулар, күңел ачу чаралары үткәрмичә, өйләренә барып, хәлләрен белгән, күчтәнәчләр калдырган өчен дә чын күңелдән сөенә алар. Үзләрен онытмауларына шатланып, кирәкле кеше итеп тоя башлый.
— Быел миңа да бүләк китерделәр бит әле. Торак–милекчеләр ширкәте җитәкчесе Роза Билалова кертте, — ди Гайшә Якупова. — Аларга мохтаҗ түгел беребез дә. Безгә игътибар кирәк. Бик күңел булды.
Торак–милекчеләр ширкәтләре җитәкчеләре тарафыннан бүләк бирүләре турында тагын берничә кеше әйтте.
— Әйе, район башкарма комитеты җитәкчесе вазыйфаларын башкаручы Илшат Нуриев карары белән барлык өлкәннәргә бүләкләр бирү оештырылды. Аларны ТМШ җитәкчеләре һәм җаваплы оешмалар таратты, — ди шәһәр башкарма комитеты җитәкчесе Рафил Исмәгыйлев.
— Гомер буе “Мехчы” фабрикасында эшләдем. Хәзер анда “Раи-фа” ширкәте урнашкан. Җитәкчесе Галим Герфанов ике елдан бирле акчалата бүләкләр өләшә. Үзенә шалтыратып та рәхмәтемне җиткердем, газета аша да әйтәсем килә, — диде шуның өчен махсус редакциягә килгән район ветераннар советы әгъзасы Хәния Рәхимбаева.
Ире шулай ук район ветераннар советы әгъзасы Данил Ибраһимов “Татавтодор” акционерлык җәмгыятенең Арча филиалы җитәкчесе Альберт Сәфиевка рәхмәт әйтә. “36 ел эшләдем мин анда. Шуның 33 елын тракторда. Бер ел да онытмыйлар. Ихтирам белән карыйлар. Безгә тагын ни кирәк?” — ди ул.
Ә менә 14 елдан артык Арча үзәк хастаханәсендә эшләгән хезмәт ветераны Раиса Коркина барлык ветераннар исеменнән баш табиб Тәлгать Баһаветдиновка, коллективка рәхмәт җиткерә.
— Бүләк өләштеләр. Күңел булды. Бүләктән бигрәк ветераннарга карата игътибарлары, ихтирамнары, хөрмәтләре өчен рәхмәт, — ди ул.
Чыннан да, олы кешегә тагын ни кирәк. Ихтирам, игътибар һәм кечкенә генә бүләк. Онытмауларын күреп, аларның шуңа да күңелләре була. Озын гомерле булып, балаларыгыз, оныкларыгыз игелеген күреп, күңел тынычлыгы белән, шатлык, бәхет диңгезенә чумып яшәргә язсын барыгызга да, хөрмәтле өлкәннәребез.