Мәхәббәт күпере шаһит

Мәхәббәт күпере шаһит
Кыз сорау, никах, язылышу, туй һәркемнең башыннан үткән һәм үтәчәк күңелле мәшәкатьләр. Элек-электән аларның үзенә күрә кызыклы йолалары да булган.
Кайбер урыннарда, мәсәлән, кызны алырга пар атлар җигеп барганнар, киткәндә артларыннан таш атып калганнар. Янәсе, барган җирендә берексен, никахы гомерлек булсын. Шулай ук кызга егет өенә кайтып җиткәнче артына борылып карарга ярамаган. Югыйсә, кире кайтуың бар. Кыз сорарга килгәндә кияү егете һәм аның кунаклары нинди генә сынаулар үтмиләр. “Ишек бавы бер алтын, безнең кызыбыз мең алтын”, — дип егетнең яратуын һәм түземлеген сыныйлар, бирнә тутырылган сандыкны да сатып бирәләр, киткәндә күршеләр бау сузып, кызны ансат кына алып китмә әле, дигәндәй, машинага юлны каплыйлар, бүләк сорыйлар һәм башкалар. Әлеге йолаларның күбесе хәзер дә сакланган, тик алар заманчалаштырылган. Хәзер кыз алырга әллә ничә машина белән киләләр, хәтта бәяләре шәп булса да, лимузиннарын, кабриолетларын да табалар, фотосүрәтләргә төшәләр, ресторан, кафеларда гөрләтеп туен итәләр. Һәрберсе кызыл туйларын гомергә истә калырлык матур итеп оештырырга тырыша. Аңлашыла да, әллә ничә өйләнмисең. Язылышу тантанасы да бездә ЗАГС бинасында искиткеч матур итеп үткәрелә. Үзгәреш кертергә теләсәң, район Мәдәният йортында язылышырга була.
— Монда да яңалык кертергә тырыштык — никахларны урыннарга чыгып теркәүне оештырдык. Кем белә, бәлки, киләчәктә бу матур бер йола булып кереп калыр, — ди Арча Мәдәният йорты методисты Гөлназ Гариф-җанова.
Шундый язылыштыру кичәсендә катнашырга туры килде. Ул Арча стадионында, табигать кочагында булды.
Көзге матурлыкка төренгән тау бите ул көнне Күпербаштан Лилия һәм Азат Хәкимовларның балдаклар алышкан, мәңгегә тугры калырга вәгъдәләр бирешкән минутларының шаһиты булды. Туганнары, дуслары ясаган тере коридор аша чәчәк таҗлары сибелгән ак паластан яшьләр “Мәхәббәт күпере” кочагына атлады. Яшьләр, тормыш юлыннан бергә барырга ризалыкларын белдереп, язылышу китабына кулларын куйдылар, бер-берсенә терәк булырга, мәхәббәтләрен сүрелдермичә, гомер буе иңне-иңгә куеп бер сукмактан үтәргә, ышанычлы, таянырлык ир, ягымлы, сабыр хатын булырга антлар иттеләр, шарларга исемнәрен язып, күккә очырдылар, әти-әниләре мәңгелек мәхәббәт теләп кулларын сөлге белән берләштерде, матур теләкләрен җиткерде. Тантана беренче гаилә вальсы белән тәмамланды.
Язылышу кичәсе шулай күңелле һәм матур үтте. Тирә-юньдәге сихри яшеллек, аны төрләндергән көзге буяулар, өстәлләрдәге көзге байлык, зәңгәр күк йөзе — бар да яшь парга гаилә бәхете теләде.
Гөлсинә ЗӘКИЕВА