Иген үстерү — изге эш

Иген үстерү — изге эш
Бүгенге яшьләр авылда калырга ашкынып тормый. Дөрес, кендекләре авылга береккән, хезмәте җиңел булмаса да авыл тормышын сайлаучылар бар. Бүген сүзем әнә шундыйларның берсе — авыр хезмәтен яратып, җиңел итеп башкара белүче “Ватан” агрофирмасы механизаторы Марат Сафин турында.
Хәсәншәех машина–трактор паркында “тимер ат”ын төзәтеп яткан чагында күрештек без аның белән. Аралаша башлагач, шаккаттым: Апаз мәктәбен тәмамлаганнан соң 20 ел буе шушы “ДТ–75” маркалы чылбырлы тракторда эшли икән егет. Менә сиңа тугрылык! Тугрылык кынамы икән?!
— Техниканы кечкенәдән яратам мин, — дип сөйләп китте ул уйларымны укыгандай. — Әти гомере буе тракторда эшләде. Миңа кечкенәдән шул “трактор җене” кагылып үсте.
Марат Мидхәт абый белән гомере буе сыер савучы булып эшләгән Әлфия апаның өлкән уллары: ике энесе һәм ике сеңлесенә өлге булып яшәүне балачактан күңеленә сеңдереп үсә. Ә үрнәкне ул намуслы хезмәте белән күрсәтә. Язгы–көзге чәчү чорында аның хезмәте аеруча хөрмәткә лаек — орлыкларны адәм балалары хәләл икмәктән, илебез ипидән өзелмәсен дигән теләкләре белән туфракка чәчә Марат. Язның бер көне ел туйдыра дип, иртән 6да кырга чыгып, төнге 10–11ләргә кадәр эшләгән егет: “Чәчүне башлаганда җанга рәхәт хисләр тула. Алдан бетерү, норманы арттырып үтәү өчен тырышып эшлибез. Авылда яшәвем белән бәхетле мин. Авылның һавасы, җир исе генә дә ни тора бит”, — ди. Максат куйсаң, алдынгылыкка ирешеп була шул. Ничә ел рәттән сабан батыры булып тәкә, бүләкләр алучы да Марат.
Сафиннар гаиләсе авылга тугрылыклы, әти–әниләренең хезмәтен дәвам иттерүче. Марат тракторчы булса, хатыны Ләйлә сыер сава. Кайнанасы туфрагыннан, Балтачның Саснасыннан бирегә килен булып төшкән ул. Әлбәттә, бу гаиләдә үсеп килүче 12 яшьлек Салават белән 9 яшьлек Азамат та намуслы хезмәт белән яшәсәң генә ихтирам казанырга мөмкин икәнлекне күреп үсә. Җир сулышын тоеп буй җиткерүче малайлар хәзердән үк әтиләренең корыч атына кызыга, тракторны йөртеп карыйсылары килә. Әтиләре үзе белән кырга алып чыкса, көне буе янында утырып йөриселәр тагын. “Сирәк булса да рычагларны тоттырып карыйм. Үскәч хезмәтемне дәвам итәселәре килсә, каршы төшеп булмас инде”, — дип елмая бәхетле әти.
Паркта эш кайный: техника төзәтәләр, авыл хуҗалыгы машиналарын кышкы саклауга куялар һ.б. Марат та тугрылыклы дустын бер кат карап чыгу белән мәшгуль. Чөнки алда кыш һәм авыл урамнарына, ферма, гараж тирәләренә тау–тау өелгән кар көртләрен эттереп тору, юл ачу аның өстендә, яз–көз авылларның ямен алучы чүплекләрне дә өеп, тигезләп, тәртипләп торырга кирәк. Авылдашларны сөендерү, алардан рәхмәт ишетү, үзеңне файда китерүче булуыңны тою — үзе бәхет бит!
Розалия ЗИННӘТОВА