Вакыйгаларга бай көн

Вакыйгаларга бай көн
Татарстан Республикасы Премьер–министры Илдар Халиков 11 октябрьдә видеоконференция режимында үткән киңәшмәдә барлык республика программаларының 2015 елның 1 гыйнварына әзерләнеп бетәчәген белдерде. Мондый бурыч әле беренче тапкыр куела һәм аны үтәү шактый катлаулы, чөнки документлар белән эшләргә туры киләчәк.
Атна саен үтә тораган мондый киңәшмәләрдә хезмәтне саклау, техника куркынычсызлыгы мәсьәләләре бик катгый куела. Чөнки кеше гомереннән дә кадерле нәрсә юк. Аеруча төзелеш объектларында күңелсез хәлләр булгалап тора.
Район башкарма комитеты җитәкчесе вазыйфаларын башкаручы Илшат Нуриев, киңәшмәне дәвам итеп, республика җитәкчелеге куйган таләпләрнең безнең районда да һичсүзсез үтәлергә тиешлеген искәртте. Киләсе елда да районда төзелеш, төзекләндерү эшләре тулы көчкә дәвам итәчәк. Моңа бүгеннән үк әзерләнергә, ел башына документлар әзер булырга тиеш.
Киңәшмәдә төзелеш объектларында чит ил гражданнары хезмәтеннән файдалану мәсьәләсе дә күтәрелде. Бу турыда район прокуроры Ринат Ситдыйков та аңлатма биреп үтте. Законсыз рәвештә эшләткән бер кеше өчен оешмага 250–800 мең сум штраф түләргә туры килергә мөмкин. Кеше сәламәтлегенә, гомеренә зыян килгәндә җинаять җаваплылыгы да каралган.
11 октябрьдә Татарстан Республикасында “Урман утырту көне” уздырылды. “Казан–Арена” стадионы артындагы территориядә агач утыртуда ТР Премьер–министры Илдар Халиков та катнашкан. Шунысы игътибарга лаеклы: зәңгәр чыршыларны бирегә Арча урманчылыгыннан китергәннәр.
Бу көнне Арча районы башкарма комитеты җитәкчесе вазыйфаларын башкаручы Илшат Нуриев та район Советы, башкарма комитеты хезмәткәрләре белән шәһәрнең Левитан урамында агач утыртты. Әлеге акция-дә уку йортлары аеруча актив катнашты.
Район башкарма комитеты 8 октябрьдән 18 октябрьгә кадәр район территориясен санитар–экологик чистарту ункөнлеге игълан иткән иде. Агач утырту көне шул ункөнлеккә билгеләнгән чараларның берсе булды. Төп максат — кыш башланганчы тирә–ягыбызны чүп–чардан чистартып калдыру, үсеп китмәгән агачларны алыштыру, яңаларын утырту, чишмәләрне, елга буйларын төзекләндерү һ.б.
Татарстан Республикасы Президенты Рөстәм Миңнеханов Дәүләт Советына еллык юлламасында: “Территорияләрне төзекләндерү һәм агач–үсемлекләр утырту мәсьәләләрен без республикабызда шулай ук өстенлекле дип билгеләдек һәм 2015 елны Парклар һәм скверлар елы дип игълан иттек. Парклар, скверлар, елга ярлары татарстанлыларның яраткан ял итү урынына әйләнсен өчен әлеге игелекле эшкә һәркем үзеннән өлеш кертә аладыр дип уйлыйм”, — диде. Димәк, бу мәсьәләгә игътибар тагын да артачак дигән сүз.
Узган шимбәдә шәһәребездә яңа сезонның беренче ярминкәсе үтте. Аны “Ватан” ширкәте башлап җибәр-де. Бик матур оештырылган, бай ярминкә булды ул. Бәрәңге, ашлык, ит, сөт, салам, печән, органик ашлама, тай, бозаулар — санап бетерерлек түгел, тагын бик күп әйберләр бар иде. Апаз авыл җирлеге, Апаз, Хәсәншәех мәктәпләре дә үз өлешләрен керттеләр. Авыл үзеш-чәннәре, автобуска төялеп килеп, күңелләр булырлык чыгыш ясадылар. Ярминкә оештыручылар чәй һәм коймак белән дә сыйлады әле.
Ильяс ФӘТТАХОВ