“Җидегән чишмә”гә автобус тапшырылды

“Җидегән чишмә”гә автобус тапшырылды
Узган елның 2 декабрендә “Җидегән чишмә” Арча халык театры Галиәсгар Камал исемендәге Татар дәүләт академия театрында чыгыш ясады. Республиканың иң зур һәм дәрәҗәле сәхнәсенә ул бу юлы “Идел–йорт” халык театрлары коллективларының ХIII төбәкара фестивале Гран–при иясе буларак күтәрелде. Коллектив автобус алу өчен миллион сумлык сертификат белән бүләкләнде. Бу “Җидегән чишмә” театр коллективы өчен искиткеч зур бүләк, аларның хезмәтләренә олы бәя.
Үз тырышлыклары, хезмәтләре белән җиңеп алган бу бүләкне “Җидегән чишмә”-леләр түземсезлек белән көтте. Ниһаять, ап–ак төстәге өр–яңа автобус кайтты. 10 октябрь көнне район башкарма комитеты җитәкчесе вазыйфаларын башкаручы Илшат Нуриев коллектив белән очрашты һәм режиссер Рафис Сәлахетдиновка автобус ачкычы тапшырды.
— Спектакльләрегезне күргәнем булмаса да, уңышларыгыз өчен чын күңелемнән сөенәм. Мин спектакльләр, концертлар карарга яратам. Аеруча үзешчәннәр чыгышын ошатам. Хезмәтегезне югары бәялим. Киләчәктә тагын да зуррак уңышларга ирешегез, яшь талантлар тәрбияләгез. Мин сезгә һәрчак ярдәм итәргә әзер, — диде Илшат Нуриев, үзешчән артистларны тәбрикләп.
Район мәдәният идарәсе җитәкчесе Илнур Котдусов кыскача театрның тарихы, коллективның уңышлары белән таныштырды.
— 60 елдан артык тарихы булган коллектив бу. Режиссер булып Рафис Сәләхетдинов килгәч, театрыбыз күтәрелеп китте. 136 театр коллективы арасында Гран–при алуга ирешү үзе зур җиңү. Киләчәктә дә аларга уңышлар юлдаш булсын, — диде ул.
“Җидегән чишмә”нең үз режиссеры, үз артистлары тарафыннан “Арча” теле- радиокомпаниясе операторлары ярдәме белән нәфис фильм төшерүләре турында да сүз барды.
— Чиксез горурланам һәм сөенәм. Киләчәктә дә яңа спектакльләр куярга, мәдәният һәм сәнгать өлкәсендә эшләргә язсын, — диде театр артисты Харис Сафин.
— Автобус ап–ак төстә булган икән, кер күтәрми торган, — дигән сүзгә шулай ук театр артисткасы Резеда Гарифуллина:
— Без халыкка аклык, пакьлек таратабыз, шуңа күрә күңелебез кебек ак булганга аеруча сөендек, — дип җавап бирде.
Чыннан да, ару-талуны белмәс җаннар йөри театрга. Югыйсә, эштән соң яңадан “эшкә” (әйе, ул эш, һәм бик авыр эш) чыгып китмәс иде. Авыллардан килеп йөрүчеләребез дә бар бит. Рафис һәм Раяз Сәлахетдиновлар Олы Мәңгәрдән, Марат Хәйруллин — Урта Курсадан, Рамил Мөхетдинов — Наласадан.
— Яңа сезонны Аманулланың “Сәхнә артында гауга” спектакле белән башлап җибәрәбез. Бу — комедия. Һаман халыкны елатып булмый бит инде. Көлдереп алырга да кирәк. Шуңа алындык бу әсәргә. Уйнавы бик авыр, катлаулы. Чөнки монда сәхнә алдында гына түгел, артында да тормыш бара. Өлкән артистларыбыз белән беррәттән, коллективка яңа килеп кергәннәр дә уйный. 30 октябрь көнне Арча Мәдәният йортына спектаклебезне карарга килегез, үкенмәссез. Сезгә ошаса, безгә рәхәт, сезнең алкышларыгыз — безгә бәя, — диде Рафис Сәлахетдинов.
Бу елда коллектив тагын бер спектакль белән сәхнәгә чыгарга җыена. Ул Бөек Җиңүнең 70 еллыгына багышланачак.
Гөлсинә ЗӘКИЕВА