Бу бала — аларныкы!

Бу бала — аларныкы!
Район башкарма комитетының опека һәм попечительлек секторы мөдире Рафия Яруллина безгә шундый хәбәр җиткерде: шушы көннәрдә генә өч гаилә өч баланы тәрбиягә алды, әле тагын чиратта торучылар бар. Бер гаилә яңа туган баланы, икенчесе — 9 яшьлек кызны, өченче гаилә 16 яшьлек малайны үзенә сыендырган.
Яңа туган баланы тәрбиягә алучы өч балалы гаиләне бик тә күрәсе килде. Баласыз гаиләне аңлап була, ә монда үзләренең өч балалары бар бит! Сектор мөдире Рафия Яруллина белән Түбән Пошалымга чыгып киттек.
Гаилә башлыгы Илнар Зиннәтулллин каршы алды безне. Илнарны күрүгә эчке дөньясының яктылыгы йөзенә чыккан дигән фикер йөгереп үтте. Бу яктылык каян күчкән дисәм, мин аның әти-әнисен, бабасын беләм булып чыкты! Дания белән Илгиз Арча үзәгендә сугыш ветераны әтиләре Сибәгатуллага биргән фатирда яши. 91 яшьлек Сибәгатулла абый турында язып та чыккан идем. Минем апаның күршеләре. Аралашып яшиләр. Апа аларны мактап бетерә алмый. Өйдә юк әле алар, түбә ябарга кайтып киттеләр, авылда бәрәңге алалар... Бөтен эшне шулай бергәләшеп эшлиләр икән. Бу күңелле хәбәрләрне мин ападан белеп торам. Киленнәре Ильвира турында да ападан ишетеп беләм: о-о, бик үткен, белмәгәне юк, булдыклы хатын ул! Искә төште: Илнарга әнисе Дания ханымның мөлаемлеге, йомшак күңеллелеге күчкән икән!
Ильвира ханым безне бала белән каршы алды. Чибәр, яшь анага бала бигрәкләр дә килешә. 2 яшьлек кызы Илинә дә янында бөтерелеп йөри. Иң олысы 11 яшьлек Индира, 8 яшьлек Илфар да өйдә иде.
— Ә монысы Самир, — дип күкрәгенә кысты баланы Ильвира. Бала караваты Ильвира белән Илнарның йокы бүлмәсенә урнаштырылган. Бала төнлә әти белән әни янәшәсендә булырга тиеш шул. Яңа туган баланы карарга биг-рәкләр дә кыен, ничек тәрбиягә алырга булганнар, дигән сорау бер мине генә түгел, әлбәттә, күпләрне кызыксындыра.
— Өйләнгәнче үк миндә шундый бер теләк бар иде, — ди Илнар.
— Ятим баланы кызгану хисеме бу, әллә башка төрле без аңламаган тойгы, кичерешләрме болар? — дип сорыйм.
— Кызгану хисе дә бардыр инде, ул гына түгел, адәм баласы бит, ничек үз балаңнан баш тартырга кирәк? — дип, җавап бирергә тырышты Илнар. Бала яратсаң, бала җанлы булсаң гына чит баланы үзеңнеке итә аласыңдыр.
— Күрсәтергә баланы алып чыгуга, әле карамадым да, күңелем, йөрәгем әллә нишләп китте, бу безнең бала, дидем, — дип сөйли Ильвира.
Ильвира үзе Арча педагогика көллиятендә укыган, аннан югары белем алган педагог. Илнар белән дә алар көллияттә укыганда танышалар. Илнар Үрнәк агросәнәгать лицеен тәмамлый. Иваново өлкәсе Шуя шәһәрендә зенит-ракета гас-кәрләрендә армия хезмәтен үтә. Туган авылы Түбән Пошалымнан беркая китми ул. Бүгенге көндә барып кайтып эшләп йөри. 34 яшьтә.
— Зур күперләр төзибез, — ди. — Кранда эшлим.
Йорт эченең зурлыгына, андагы чисталык, матурлыкка сок-ланмый мөмкин түгел. Бер көтү бала белән ничек чисталыкны саклап була? Киткәндә безне озата баручы Илнарга шул сорау-ны бирәм.
— Ильвира бер дә тик тормый безнең. Балаларны да шулай тәрбияли.
— Кечкенәсе Илинәгә иптәш юк менә, — ди әниләре. — Илинә белән уйнап үсәрлек тагын бер баланы тәрбиягә алырга исәп бар.
Шул вакыт опека һәм попечительлек секторы мөдире Рафия Яруллина нәкъ Илинә кебек 2 яшьлек малай барлыгын әйтте. Бу хәбәр ана кешегә шундый нык тәэсир итте, хәзер үк ул машинасына утырып чыгып чабардай булды. Ильвираның тәвәккәллеген, ныклыгын шәйләп алам.
...Баланы коляскага салдылар. Олы кыз янында бөтерелеп йөри. Без дә коляскага иелдек, бала белән сөйләшәбез. Самир үзе белән сөйләшкәнне игътибар белән тыңлый, аңлаган кебек, йөзен төрле хәрәкәтләргә китерә, елмаерга итә... Әле кайчан гына бу дөньяга битараф булып шыпырт кына яткан сабый гаилә җылысыннан тәмам җылынган, хәрәкәткә килгән, йөзенә нур кунган. Гаиләнең көче менә шушы нурда. Моны берни белән дә чагыштырып булмый.
Румия НАДРШИНА