Алтын бәясенә тиң

Алтын бәясенә тиң
Җиңүнең 70 еллыгына әзерлек кысаларында сугыш ветераннарының сәламәтлеген саклау һәм аларга медицина ярдәме күрсәтү максатында “Безнең кадерле ветеран” дигән социаль–гуманитар проект старт алган иде. Максаты — сугыш ветераннары һәм инвалидлары өчен дәвалау учреждениеләрендә махсуслаштырылган палаталар булдыру һәм аларда авырулар дәвалану өчен иң уңай шартлар тудыру. Ул өч этапта үткәрелә. Хәзерге вакытта икенче этабы бара.
Быел май аенда булдык без Арча үзәк хастаханәсендә. Хирургия бүлегендә һәм йөрәк–кан тамырлары авыруларын дәвалау үзәгендә барлык уңайлыклары булган ике урынлы, чиста, якты, җылы, иркен, юыну урыны, салкын, җылы суы, каршында гына бәдрәфе, күп функцияле ятаклары, өстәле, кием–салым шкафы, урындыклары, телевизор, радио, сәгать, суыткыч, чәйнек, хәтта чәй сервизларына кадәр булган ике палата эшләнгән иде. Аннан соң да әле баш табиб Тәлгать Баһаветдинов: “Палаталарны камилләштереп бетерәсе, тагын да уңайлырак итәсе бар. Терапия бүлегендә тагын бер палата булдыру күздә тотыла. Анысын ныклап төзекләндерәсе бар”, — дигән иде.
Шушы көннәрдә генә “Бердәм Россия” сәяси партиясе җирле бүлекчәсенең “Яшь гвардия” штабы җитәкчесе ярдәмчесе, Татарстан Республикасы Дәүләт Советы каршындагы иҗтимагый–яшьләр палатасы әгъзасы Юлия Ибраһимова, Арча үзәк-ләштерелгән китапханә-ләр системасы хезмәт-кәрләре Рузия Хәкимова, Илсөяр Хәнәфиева хастаханәгә барып ветераннар белән очраштылар, хәл-ләрен белделәр, шигырьләр сөйләделәр.
— Яшь гвардиячеләрнең максаты — хастаханәдә сәламәтлекләрен ныгытып яткан сугыш һәм тыл ветераннарын, инвалидларын игътибардан читтә калдырмау, —диде Юлия. — Без алар белән төрле темаларга сөйләштек, хәлләрен белдек, балалары, оныклары турында сораштык. Өлкәннәр бик теләп яшьлекләрен искә алды, истәлекләрен уртаклашты. Безнең очрашу өлкәннәр ункөнлеге уңаеннан гына түгел, даими оештырылачак. Чөнки аларга аралашу, аз гына булса да игътибар кирәк.
Ә безне май аеннан соң булган үзгәрешләр дә кызыксындырды. Биредә тагын ниләр эшләнгән?
— Терапия бүлегендә тагын бер палата булдырылды. Анысында душ кабинасы, үзендә аерым бәдрәф тә бар. Авырулар бик канәгать, — ди дәвалау буенча баш табиб урынбасары Гөлсинә Исламова. — Моннан тыш авыруларга амбулатор ярдәм дә күрсәтелә. Өйләренә йөрү өчен махсус машина бүлеп бирелде. Авылларга чыгып та авырулар янында булалар, шунда ук тиешле тикшерүләрне дә үткәрәләр.
Әйе, табиблар тарафыннан барысы да эшләнә. Хастаханәдә дәваланып яткан өлкәннәр дә бик канәгать.
— Миңа биредә ошый. Шартлар бик яхшы. Тырышып дәвалыйлар. Без әйткән сүзләрне дә исәпкә алалар, — диде Арчадан 70 яшьлек Рәшит Шәрәфиев.
Ул инсульт кичергән. Өр–яңадан сөйләшергә, йөрергә өйрәнә. Моның өчен дә шартлар бар. “Тормыш дәверендә күп авырлыкларны кичердек. Бу авыруны гына җиңәрбез, Алла боерса. Дөньялар гына тыныч булсын”, — диде аның белән һәрвакыт янәшәдә булган хатыны.
— Әйтеп бетергесез яхшы шартлар хастаханәдә. Тәмле телләре, ягымлы сүзләренә кадәр шифа. Гомерем буе колхозда урманын да кистем, фермада да, кырда да эшләдем. Сәламәтлегемнән зарланмадым. Хәзер дә авырткан җирем юк. 13 ел иремне карадым. Таушалдым. Аның вафатына ел ярым. Шуннан бирле хәлем китеп интектерә, — диде Күлтәстән Мәгъшия Рамазанова.
Балалык, яшьлек елларында черек бәрәңге, алабута ашап үскән, гомерләре буе бил бөккән апалар һәм абыйларның хастаханәгә килеп хәлләрен белгәнгә бик тә күңелләре булды. Чыннан да, алар өчен ихтирам, игътибар, аралашу бик мөһим.
Гөлсинә ЗӘКИЕВА