Бездә мөмкинлекләр күп

Бездә мөмкинлекләр күп
Әйбәт хуҗа эшне койма тотудан башлый, диләр. Кушлавычка килгәч иң беренче шуңа игътибар иттем. Машина–трактор паркы, ындыр табагы моңарчы, русча әйтсәк, “проходной двор”ны хәтерләтсә, хәзер бар да капланган, капкасы да, коймасы да үз урынында. Ындыр табагы ябулы итеп эшләнгән. Гади генә әйберләр, әмма күңелле.
Кушлавыч, Иске Җөлби фермаларыннан соңгы елларда йөрәк әрнеп кайта иде. Бу юлы гадәттә башларын иеп йөргән терлекчеләрнең йөзләре балкый, сөйләшәселәре килеп тора. Ни булган боларга, дисезме?
— Мондый хәлләрне дә күрербез дип кем уйлаган? — ди Кушлавыч фермасында бозаулар караучы Гүзәлия Сабирҗанова. — Һәр айның унбишендә акча бирәләр, 17шәр мең сум алган айлар да бар. Әле менә шабашкада йөргән малай да фермага эшкә кайтмакчы. Килен белән бездә яшиләр, күптән түгел оныгыбыз туды. Ике сыер асрыйбыз, шөкер, ашлыкны, печән, саламны күп бирделәр.
Иске Җөлбидә хәлләр аеруча яман була иде. Хәзер торакларны танырлык түгел, тирә–якны күмеп киткән тиресне басуларга чыгарганнар, ул уңышка хезмәт итә. Тораклар белән бергә кардалар да яңарган, салам кертелгән. Мондагы “һава торышын” Фәрит Исмәгыйлевтан белеп була. Гомере буе шушы ферманың “универсаль” эшчесе ул. Ат белән тирес чыгара, азык кертә, мичкә ягып солы пешерә һ.б.
— Узган айда мин — 15, хатыным Фирая 15 мең, икебезгә 30 мең сум акча алдык, — ди ул елмаеп. — Без акча күргән кешеләрмени? Хәзер әнә киткән яшьләр дә кире кайтабыз дип йөриләр.
Сыерлар, таналар, бозауларга күз генә тимәсен! Тәрбия яхшы, караучылары тырыш.
— Көнгә 25 литр сөт биргән сыерлар бар, — ди районның иң тәҗрибәле ветеринария табибларының берсе Фәрит Габдрахманов.
Бу хуҗалыкта терлекләр 50 башка гына калган иде. Хәзер алар 550.
— Сыерларны 750 башка җиткерергә исәп, — ди инвестор Рәфыйк Хөсәенов. — Безгә эшкә кеше күп кирәк булачак әле.
Киләчәктә барлык терлекләр 2 мең баштан артып китәргә тиеш. Тагын ике яңа ферма салырга план коралар. Мөндеш-тәге Төхвәтуллин ширкәте егетләре элекке биналарны үзгәртү белән мәшгуль.
Хуҗалыкка яңа техника да күп кайткан. Куәтле ашлык киптергеч кайтачак. Инвестор хуҗалыкны торгызу өчен 22 млн. сум чамасы акча тоткан инде.
Узган шимбәдә булган киңәшмәдә район башкарма комитеты җитәкчесе Илшат Нуриев җитәкчеләргә яңа бизнес–планнар, идеяләр турында уйларга киңәш итте.
— Арчадан күп кеше Казанга эшкә барып йөри, — диде ул. — Үзебездә эш урыннары булдырырга, җитештерүне киңәйтү юнәлешендә эш алып барырга кирәк. Без һәр тәкъдимне тыңларга әзер.
Район җитәкчесе әйткәнчә, авыл хуҗалыгы тармагында да продукция җитештерүне арттыру өчен мөмкинлекләр зур. Элеккеге “Вамин” хуҗалыкларында бигрәк тә. Терлекләрнең баш санын арттырып, яхшы сыйфатлы продукция җитештерергә.
Атна саен үтә торган мондый киңәшмәләрдә берәр хуҗалык җитәкчесе тыңлана. Бу юлы “Акчишмә” ширкәте җитәкчесе Газинур Сафинга сүз бирелде.
— Искечә эшләгәнгә иң күп ягулыкны без тотабыз, техника иске, — диде ул. — Азык культуралары өлешендә кузаклылар аз. Терлекчелектә нәсел эшен яхшыртасы бар.
Авыл хуҗалыгы һәм азык–төлек идарәсе җитәкчесе Айдар Габбасов терлекчелектәге эшләргә анализ ясады, җитешсезлекләрне күрсәтте.
Ильяс ФӘТТАХОВ