«Өмет”тә уңайлы мохит

«Өмет”тә уңайлы мохит
Яңа Кенәрдәге өлкәннәрне тернәкләндерү үзәгендә булганнар аны мактап туя алмый. Тик күп тапкыр кешедән ишеткәнче, бер кат үз күзең белән күрүгә җитми икән. Өлкәннәр көне уңаеннан үткәрелгән чараны карарга баргач, шуңа инанып кайттым. Чыннан да, мактарлык икән шул. Һәр тарафта тәртип, чисталык. Якты, җылы, матур. Бүлмәләр иркен. Туклану да яхшы. Төрле күңел ачу чаралары оештырыла, сәламәтлекне ныгыту буенча хезмәтләр күрсәтелә.
— Медицина хезмәте түгел бу. Җиңелчә физик күнегүләр тәкъдим итәбез, массаж ясыйбыз, электр белән дәвалыйбыз. Физкабинет эшли, биш төрле аппаратыбыз бар. Теләгән кеше табиб күзәтүе астында велотренажерда, йөгерү юлында шө-гыльләнә ала. Хезмәт терапиясенә — кул эшләренә — зур урын бирелә. Хезмәткәрләребез бик яхшы. Бар да күптәннән эшләгән тәҗрибәле кешеләр. Мөлаем, аңлаучан, ярдәмчелләр. Биредә ял итүчеләр тарафыннан уңай фикерләр генә ишетелеп торуы безнең өчен дә бик күңелле, — ди “Өмет” тернәкләндерү үзәге җитәкчесе Ирек Исмәгыйлев. — Үзәккә ял итәргә, дәваланырга килүчеләр арасында да әллә нинди талантлы кешеләр бар. Үзләре концертлар, төрле кичәләр оештыралар, Яңа Кенәр балалар иҗат йорты, интернат–мәктәп, Яңа Кенәр лицее, якын–тирә авыллар мәдәният йортлары һәрчак мәдәният хезмәте күрсәтергә әзер.
Хезмәт терапиясе дәресләрендә башкарылган кул эшләреннән торган күргәзмәгә дә игътибар итми калып булмый. Бәйләнгән, чигелгән, тегелгән әйберләрдән тыш, биредә кәгазьдән һәм башка төрле материаллардан ясалган әйбер-ләр дә урын алган. Үз хезмәтләреннән тәм табып эшләгәнгә алар аеруча матур чыккан.
— Миңа үзәктә бик ошый. Беренче тапкыр гына килүем түгел инде. Монда тик торырга вакыт та юк. Төрле чаралар, кичәләр, очрашулар була, җырлыйбыз, биибез, уеннар оештырабыз. Күпме кеше белән танышабыз, — ди Мөндештән Рәйсә Вафина, аның сүзләрен җөпләгәндәй.
Инвалидлар өчен уңайлы мохит тудыру буенча да быел “Өмет”тә үзгәрешләр зур. Җитәкче урынбасары Илнур Әһлиев үзәк буйлап йөртеп, бу юнәлештә башкарылган эшләр белән таныштырды. Ике бүлмә коляскадагы инвалидлар өчен әзерләнгән. Стеналары буйлап култыксалар сузылган, бүл-мәдәге юынгычка да тотынып кереп була. Бинаның ике катындагы коридорларда, икенче катка күтәрелгән баскыч кырыенда да шундый ук култыксалар. Бәдрәф, душ та инвалидлар өчен уңайлы итеп эшләнгән. Бүлмә турыларында, керү юлларында күзләре күрмәгәннәргә аяклары белән тою өчен махсус плитәләр җәелгән.
— Бүлмә ишекләре дә үзгәртелде, — ди Илнур Әһлиев. — Коляска белән керү өчен җайлаштырылды. Урам яктан төп керү юлы өч рәтле итеп эшләнде. Ә инде икенче керү юлы махсус коляскада йөрүчеләр өчен җайлаштырылды. Алар икенче катка махсус күтәрткеч җайланма белән менә.
Күргәнегезчә, биредә һәр нәрсә сәламәтлекләрен ныгытырга килүчеләргә уңайлы булсын, өлкәннәр үзләрен өйләрендә кебек рәхәт хис итсеннәр өчен эшләнгән.
Гөлсинә ЗИННӘТОВА