Авылдашлары белән горурлана

Авылдашлары белән горурлана
Өчиле клубы мөдире Лилия Минһаҗева белән без клуб каршында очраштык.
— Клубыбыз бик начар иде, — дип каршы алды ул безне. — Авыл җирлеге ярдәме белән төзекләндерү эшләре башкарылды, идән җәелде, стеналар буялды. Яңа Кырлай авыл җирлеге башлыгы урынбасары Радик Шәяхмәтов көн дә бер клубка кереп чыга, проблемаларны сораша, һәръяклап ярдәм итәргә тырыша, чараларда катнаша, — ди Лилия.
Лилия Минһаҗева үзе хезмәтен бик яратып башкара, көн үтсенгә йөрми, булсын дип тырыша.
— Мин төзелеш техникумын тәмамладым. 21 ел авыл җирлегендә хисапчы булдым. Декрет ялыннан чыкканда, авыл җирлек-ләре берләшеп, миңа эш калмады, — ди клуб мөдире. — 2004 елда авыл җирлеге хисапчысы Фәрдия Нуретдинова киңәше белән декрет ялына киткән сеңлем Гөлгенә урынына клубка урнаштым. Башта бик курыктым. Туып-үскән төбәгем булып, кешеләрен яхшы белгәнгәме, бик тиз ияләштем. Мәдәният идарәсе җитәкчесе Илнур Котдусов та, район Мәдәният йорты белгечләре дә ярдәм иттеләр. Хәзер хезмәтемне бик яратам. Ике урынга эшкә керергә тәкъдим ясап карадылар. Риза булмадым. Кайнанам Фруза да: “Яратып эшлисең бит, ташларсың мени?” — диде. Рәхмәт аңа, бик булыша. Ике баламны үстереште. Беренчесен 21 көнлек вакытында аңа калдырып эшкә чыктым. Ирем Рафис та, балаларым Рузилә белән Радик та һәрчак ярдәм итә.
Ә авыл яшьләре өчен Лилия сердәшче дә, киңәшче дә. “Кичен алар бөтенләй икенче яктан ачыла. Кара-каршы утырып, ачыктан-ачык сөйләшеп була. Берәр кичә оештырасы булса, ялынып торасы юк, шунда ук килеп җитәләр. Кайчак әле үзләре: “Лилия апа, бәйрәм җитә, оныттыгызмы әллә?” — дип искә төшерәләр, — ди.
Онытамы соң Лилия. Эзләнә, сценарийларын яза, һәрберсен үзенчәлекле итеп үткәрергә тырыша. “Син — минеке, мин — синеке”, “Гашыйк булу өчен 7 сәбәп яки өлешеңә тигән көмешең”, “Яшьләр тукталышы” кебек күңел ачу кичәләре, терроризм, наркотикларга каршы көрәш буенча түгәрәк өстәл артында сөйләшүләр, очрашулар, тамадалар барлау, юбилярларны билгеләп үтү — бар да клуб мөдиренең фантазиясе һәм тырышлыгы нәтиҗәсе. Чишмә ачу тантанасына багышланган бәйрәм дә бик күңелле узган. Авыл читендәге ике чишмәнең берсен “Тепло-Сервис” ширкәте (җитәк-чесе Тәлгать Миндубаев) төзекләндергән, авылдашлары Таһир Камалиев калай белән түбәләгән, хәзер чистартып тора, икенчесен Чаллыда яшәүче авылдашлары Фәргать Нәбиев балалар һәм өлкәннәргә ял итү өчен барлык уңайлыклар тудырып ясап чыккан. Бу урын кызыклы чаралар, ярышлар оештыру өчен дә уңай.
— Безнең читтән артистлар чакырган юк, — ди Лилия Минһаҗева. — Үзебезнең авыл талантларга бай. Хөрмәт итәм мин авылдашларымны. Һәр тәкъдимемне күтәреп алалар, бик теләп катнашалар, яратып карыйлар, рәхмәт әйтәләр.
Лилия үзе дә җырга, биюгә оста, кызы җырлый, улы бии. Ире клуб янын тәртипкә салырга, чәчәкләр үстерергә булыша. Җәен тирә-юнь чәчәкләргә күмелә.
Клуб мөдире дүшәмбедән тыш, көн дә эштә. Яшьләр күп кайта, чит авылларга йөрмәсеннәр, дип җәен ялга да чыкмаган ул. Кичләрен дискотекалар үткәргән. Анда “Биш пар», “Так калыш”, “Наза” уеннарын да оештырган. Яшьләр аларда да бик теләп катнашкан. Хәзер үзләренә дискотекаларга чит авыллардан, хәтта Арчадан киләләр.
— Түгәрәкләр эшли. Нәфис сүз түгәрәген китапханәче Айсылу Камалова җитәкли. Гомумән, ул клубта үткән һәр чараны алып бара һәм без аның белән бергә-бергә эшлибез, — ди Л.Минһаҗева. — Биергә, җырларга үзем өйрәтәм.
Тырышкан табар, ташка кадак кагар, диләр. Тырышсаң, авыл клубын да гөрләтергә була икән. Бары тик теләк һәм үз хезмәтеңнең фанаты булу кирәк.
Гөлсинә ЗӘКИЕВА