Искегә күп чыгым кирәк

Искегә күп чыгым кирәк
22 октябрьдә “Ак барс” агрокомплексы” ширкәте базасында техниканы 2015 ел кыр эшләренә әзерләүне оештыруга багышланган зона семинары булып үтте. Анда биш район хуҗалыкларының инженерлары, авыл хуҗалыгына хезмәт күрсәтүче оешмалар вәкилләре катнашты.
Татарстан Республикасы авыл хуҗалыгы һәм азык–төлек министры урынбасары Тәлгать Таһирҗанов үзенең чыгышында бүгенге көндә республика техника паркының торышы, техникадан нәтиҗәле файдалану, 2015 елгы кыр эшләренә әзерләнү мәсьәләләренә тукталды.
Соңгы елларда авыл хуҗалыгына яңа техника кайтмый дип әйтеп булмый. Әмма моңа көче җитәрлекләр генә яңага өметләнә ала. Хуҗалыкларның энергия белән тәэмин ителеше дигән төшенчә бар. Булган барлык техниканың ат көчен кушып, шуны җир мәйданына бүлүдән килеп чыга ул. Республика буенча 158 ат көче килеп чыга, безнең районда — 180.
—Иске техникага запас частьлар, ягулык күп тотыла, андый трактор яки машинага яшьләр дә утырам дип тормый, — диде министр урынбасары.
Билгеле, газета укучыларыбызны үзебезнең район күбрәк кызыксындыра. Бездә бу яктан хәлләр ничегрәк?
—Быел район хуҗалыкларына 11 трактор, берәр ашлык һәм азык әзерләү, ике бәрәңге комбайннары, ун автомобиль, төрле тагылма кораллар кайтты, — диде ул.
Район хуҗалыкларында 708 тракторның 36сы — 3 елга кадәрле, 237се — 3 елдан 10 елга, 435е аннан күбрәк хезмәт иткән.
Комбайннар — 134. Шуларның 15е 3 елга, 74е — 3 елдан 10 елга кадәрге, 45е — аннан күбрәк елгы.
Автомашиналар — 354. 155енә 10 елдан күбрәк “яшь”.
Чәчү комплекслары тәүлек буе эшләргә, тәүлеккә 200–250 гектар чәчәргә тиеш, дип сөйләделәр семинарда. Ә алар күбесенчә бер генә смена эшли, ярты көчкә генә файдаланыла. Шушы уңайдан безнең районның “Кырлай” ширкәте үрнәк итеп куелды. Соңгы 6 елда биредә һәр комбайн һәм трактор икешәр чын механизатор белән тәэмин ителгән, алар, бер–берсен алыштырып, ике сменада эшли.
Республикада алдынгы урыннарга чыккан механизаторларыбызның исем–фамилияләрен күрү дә күңелле булды. “Вамин–Мәрҗани” ширкәтеннән Айрат Шаһидуллин “К–744” тракторы белән 6687 гектар җир эшкәрткән. “Курса МТСы”ннан Фәрит Гайнетдинов “ДОН–1500” комбайны белән 2025 тонна ашлык суктырган. “Ак барс” агрокомплексы”ннан Илһам Әгъзәмов “Ягуар” комбайны белән 22180 тонна яшел масса тураткан. “Игенче” ширкәтеннән Хәлим Вилданов, “Арча” ширкәтеннән Рәдис Әхмәтханов 2446–2139 гектардагы игеннәрне теземнәргә салганнар. “Ак барс агрокомплексы”ннан Фәнис Вафин “КамАЗ” машинасы белән 5134 тонна ашлык ташыган.
Билгеле, сүз күбрәк 2015 елгы кыр эшләренә әзерләнү турында барды. 1 апрельгә барлык чәчү, туфрак әзерләү агрегатларын, тракторларны ремонт-лап бетерергә. Моның өчен җылытылган мастерскойлар, тагылма кораллар ремонтлау мәйданчыклары булдырырга. Безнең районда алар “Ак барс” агрокомп-лексы”, “Курса МТСы”, “Северный”, “Татарстан”, “Арча” ширкәтләрендә бар.
Ике атна эчендә кирәкле запас частьлар исемлеген төзеп, министрлыкка тапшырырга кушылды. Инженерларны фермаларга кермисез, дип тәнкыйтьләделәр. Алар терлекчелек-тәге җиһазлар өчен дә җаваплы булуларын онытып җибәргәннәр.
Ильяс ФӘТТАХОВ