Тормышыгызның кадерен белегез

Тормышыгызның кадерен белегез
Быел кыш көтмәгәндә килеп алды. Башта карлы яңгыр явып, юллар бозлавыкка әверелде. Аннан октябрь уртасында җиргә кар ятты. Бу, беренче чиратта, транспорт белән идарә итүчеләр өчен кыенлык тудырды.
—Көпчәкләрне кышкыга алыштырырга өлгермәгән идем. Мелиоратордан шәһәр үзәгенә көчкә төшеп җиттем. Бу көннәрдә аеруча сак һәм игътибарлы булырга кирәк. Югыйсә, һәлакәткә очравың да бик тиз,—ди 30 елдан артык машина белән идарә итү стажы булган Айдар Хисмәтуллин.
Олы кешенең киңәшен яшьләр дә тотсын иде. Беркөн кичен алдын-артын карамыйча тизлек арттырып, бозда текә борылышлар ясап йөргән яшьләргә игътибар иттем.
—Аларга нәрсә, әтиләре алып биргән машина бит. Үзләре эшләп тапкан акчага булса, кадерен дә белерләр иде, — ди әлеге хәлгә исе китеп карап торган өлкән яшьтәге бер абый.
Октябрь аенда гына рейдлар вакытында 356 юл хәрәкәте кагыйдәләрен бозу очрагы теркәлгән. Шуларның 56сы вак юл-транспорт һәлакәте. Ягъни, бәрелү, төртелү нәтиҗәсендә транспортка зыян килү. Автомобиль хуҗасы һәм пассажирлар зыян күрү белән тәмамланган 4 очрак теркәлгән. 5 октябрьдә (яңгырлы көн) кичке сәгать 8дә Казанбаш белән Иске Төрнәле авыллары арасында кызу тизлек белән барган “Ниссан-Альмера” машинасы идарәне югалта һәм юл кырыена ава. Нәтиҗәдә, йөртүчесе тән җәрәхәтләре ала.
Беренче бозлавыкта һава шартларын исәпкә алмыйча тизлекне арттырган “ВАЗ-2109” машинасы белән идарә иткән хатын–кыз өчен күңелсез тәмамлана. Тимер юл күпере өстендә була бу хәл. Машина идарәне югалта һәм каршы як полосага чыгып, каршыдан килүче машинага бәрелә. Дүрт кеше (“ВАЗ-2109” машинасында ике пассажир, берсе 2009 елгы бала, да була) тән җәрәхәтләре ала.
22 октябрьдә иртәнге 6 сәгатьтә Арча станциясендәге чистарту корылмасы янында булган һәлакәтнең дә төп сәбәбе — начар һава торышы шартларында тиешле тизлекне сакламау. “Хендай” машинасы идарәне югалтып, каршы як полосага чыга һәм “ВАЗ-2114” автомобиленә килеп бәрелә. Нәтиҗәдә, хуҗасы тән җәрәхәте ала.
—Бу айда булган юл хәрәкәте кагыйдәләрен бозу очракларының 85е тизлекне арттыру, 15е тиешсез урында каршы як полосага кереп, алдагы машинаны узарга чыгу,—ди ЮХИДИнең Арча бүлекчәсе өлкән инспекторы Инсаф Павлов.—Үзләре генә түгел, бер гаепсез кешеләр зыян күрә бит. Нигә шул хакта оныталар икән?
10 октябрьдә Арча автотранспорт предприятиесе каршында булган һәлакәтнең сәбәбе дә шул. “ВАЗ–2114” машинасы кызу тизлек белән бара, өстәвенә әле каршы як полосага узарга чыга һәм юл кырыеннан барган ике кешене бәрдерә. Бәхетенә, алар җиңелчә тән җәрәхәтләре генә алып кала.
—Юл хәрәкәте кагыйдәләрен бозучылар арасында җәяүлеләр дә бар. Тиешсез урында юл аркылып чыккан өчен (күбесе шәһәр үзәгендә) 19 кешегә штраф салынды,—ди Инсаф Павлов.—Машинада куркынычсызлык каешын такмаган —64, махсус җайланмасыз балалар утыртып йөрткән 2 кешегә беркетмә төзелде. Юл аркылып чыгу өчен билгеләнгән урында җәяүлеләргә юл бирмәгән 11 машина йөртүчегә дә штраф түләргә туры киләчәк.
Спиртлы эчемлек кулланган килеш руль артына утыручылар саны да кимеми. Октябрь аенда гына да шундый 8 кеше тоткарланган. Хәзер аларга ел ярымнан ике елга кадәр җәяү йөрергә, өстәвенә әле 30 мең сум штраф та түләргә туры киләчәк. Исерек килеш юлга чыгып, машина йөртү хокукыннан колак каккан берәү тагын руль артына утырган. Бу юлы да аның юлын ЮХИДИ хезмәткәрләре бүлгән. Хәзер аңа 10 тәүлек арест салынган. Бөтенләй таныклыгы булмаган килеш “сәяхәт” итүчеләр дә очрый. Бу айда шундый ике кешенең сәяхәте уңышсыз тәмамланган. Үзләренә хәзер 5 меңнән 15 мең сумга кадәр штраф түләргә туры киләчәк.
Гөлсинә ЗӘКИЕВА