Ир–егетләр армиядә чыныга

Ир–егетләр армиядә чыныга
Район Мәдәният йортында “Хәрби хезмәткә чакырылучылар көне”нә багышланган бәйрәм булды. Аны Татарстан Республикасы хәрби комиссариатының Арча һәм Әтнә районнары буенча бүлеге (җитәкчесе Алмаз Борһанов) оештырды. Очрашуда район башкарма комитеты җитәкчесе Илшат Нуриев катнашты.
Зал шыгрым тулы иде. Орден–медальләр таккан сугыш ветераннары, Әфганстанда армия хезмәте үткән ир–егетләр, отставкадагы офицерлар хәрби киемнәре белән үк яшьләрне кызыктырып тора. Погонлы, орден–медальле киемнәрдән матурлык кына түгел, чын ир–егетлек һәм хәтта батырлык та сирпелә. Алар — Ватанны саклаучылар!
Ә батырлык бервакытта да онытылмый, 65 елдан соң да ул калкып чыга! Быел Белоруссия Президенты Александр Лукашенко Указы белән Белоруссияне немец–фашист илбасарларыннан азат итүдә катнашучылар юбилей медальләре белән бүләк-ләнде.
Район башкарма коми-теты җитәкчесе Илшат Нуриев, ветераннар белән кул биреп күрешеп, хәлләрен сорашып, медальләр тапшырды. Бүләкне Түбән Орыдан Мәсхүт Галиев, Салихҗан Фәйзуллин, Кызыл Утардан Фәрит Шәмсетдинов, Саимә Шәмсетдинова (мәрхүмә), Кызылъярдан Мидхәт Сәфәров, Иске Кырлайдан Әнвәр Камалов, Наласадан Газиз Сабиров, Зур Бирәзәдән Шәриф- җан Шәфыйков, Ибраһим Мөстәкыймов, Апаздан Гыйниятулла Миннебаев, Штерәдән Нургали Шәрәфиев, Иске Ашыттан Малик Абдуллин алды. Соңыннан Апаз авылыннан Гыйниятулла Миннебаевның хәлен беләм.
— 91нче яшем белән барам, — дип сөйләде Гый-ниятулла абый. — Сугышта снайпер булдым. Җиңү көнен Белоруссиянең Могилев шәһәреннән ерак түгел Кричев станциясендә каршыладым. Күперләрне, тимер юлларны сакладык. Бик күпне күрдек инде без...
Иске Кырлайдан Әнвәр абый Камалов белән сөйләшергә хатыны Сания апа ярдәм итте. Бик авырдан ишетә. Медаль бирәчәкләре турындагы хәбәрне ишеткәч, елап җибәрде, ди Сания апа.
— Сугышта бик күп җирләрдә булдым, — дип сөйли ул. — Машина белән пушка өстерәп йөрттек. Курск дугасында контузия алдым. Белоруссия фронтында машинага мина төшеп яраландым. Тәндә әле дә дүрт мина кыйпылчыгы бар. Минскига таба бик каты сугыш булды. Белоруссиядән мин 1947 елны гына кайттым.
Бәйрәм башыннан ахырына кадәр яшь буында ватанпәрвәрлек хисләре тәрбияләүче дәрес булды. Хәрби һәм спорт ярышларында җиңүче яшүсмерләрне бүләкләү бәйрәмне тагын да күтәреп җибәрде.
Район башкарма комитеты җитәкчесе Илшат Нуриев:
— Мин үзем флотта хезмәт иттем, — дип сөйләде. — Ел саен июль ахырында хәрби флот көнен билгеләп үтмичә калган юк. Барлык командирларны хәтерлим, хезмәттәшләремне онытмыйм. Армия — батырлык мәктәбе ул. Анда хезмәт итәргә физик һәм рухи яктан әзерләнеп барырга кирәк. Сез, яшьләр, Ватанны сакларга әзер булырга тиеш. Ә армиядә үткән еллар хәтергә иң яхшы еллар булып кереп калачак.
Шушмабаштан Данис Баһаветдинов, Югары Атыдан Рушан Шакиров, Урта Сәрдәдән Нияз Җаббаровка армиягә чакыру кәгазе бирелде.
— Рәхмәт сезгә, ветераннар! — диде Данис һәм алар алдында баш иде. —Һәрвакытта да төннәр тыныч, күк йөзе чиста булсын! Без Ватанны сакларга һәрвакытта да әзер!
...Бәйрәм тәмам. Фойеда Арча педагогика көллиятендә укучы егетләр белән сөйләшәм. Спорт ярышларында призлы урыннар алучы Илшан Вафин:
— Армия кыенлыкларына бирешмәс өчен спорт белән шөгыльләнергә, көчле булырга кирәк, — диде. — Минем армиягә барасы килә.
Румия НАДРШИНА