Тәрбия — уртак эшебез

Тәрбия — уртак эшебез
Наркомания, алкоголизм белән беррәттән, безне үлеп бетү чигенә китереп бастыра алучы, кешелекнең, бердәнбер булмаса да, борынгы бозыклыгы.
Дәүләт юкка гына әлеге явызлыкны бетерү өчен моңа кадәр күрелмәгән чаралар кулланмый. Ә менә сорау — наркотикларга бәйле булганнар саны кимедеме соң?
Соңгы ун елда гына да Арча районында наркологта исәпкә куелучылар күп тапкырлар артты һәм бу әлеге мәсьәләдә чагыштырмача имин саналган районда. Зур эш алып барылуга карамастан, кулланучылар елдан–ел арта. Ә безне якын киләчәктә нәрсә көтә? Кызганычка каршы, наркомания бүген күренеш кенә түгел инде! Бүген наркомания, алкоголизм безнең дәүләтне җимерү, халкыбызны юкка чыгару турында күптән хыялланучылар кулындагы корал. Безнең дошманнар иң кадерле һәм йомшак урыныбызга — балаларыбызга суга. Әлеге дошманнар, алар исәбендә РФ гражданнары да бар, безнең белән янәшә яши, күршеләребез булып санала.
Мин укучылар белән еш очрашам, әмма аларның берсе дә алкоголик, әрәмтамак, җинаятьче, наркоман булам дип әйткәне юк. Алар, бар да изге ниятләр белән тулы, Ватанга файда китереп, җәмгыятьнең тулы кыйм-мәтле әгъзасы булырга тели. Тик менә бу юл озын һәм гаять күп энергия сорый, балалар еш кына моңа әзер түгел. Безнең балаларны күбрәк рухи байлыкларга караганда матди җитешлек кызыксындыра. Шуңа күрә без мәктәптә, урамда тупаслык күренешләренә торган саен ешрак тап булабыз, болар масса–күләм мәгълүмат чараларында чагылыш таба.
Интернет һәм телевидениедәге җаннарны өшетерлек роликлар тормышыбызда гадәтигә әверелде һәм болар бар да балаларыбызның ныгып җитмәгән күңелләренә тискәре йогынты ясый, менә шуннан оятсызлык, явызлык, ихтыярсызлык, чын тормыш авырлыкларыннан наркотик һәм алкоголь сөременә чумарга омтылу килеп чыга да инде.
Балалар, билгеле, дөньядагы вакыйларны белеп торырга тиеш, әмма монда өлкән-нәрнең, аеруча белгеч-ләрнең, аңлатмалары мәҗбүри. Урта мәктәп бетереп, БДИ биргән чыгарылыш сыйныф укучыларының сай белемле булулары кайвакытта уңайсыз хәлдә калдыра, күпләре гади математик исәп-ләмәләрне чыгара алмый, кайберләре Россия, Татарстан башкалаларын белми. Өлкәннәр булмаган җирдә алар үзләренең тәртибен контрольдә тота алырлармы икән дигән сорау туа.
Шулай итеп, бүген безнең беребез дә балалар тәрбияләүдән читтә кала алмый, бу, сәер яңгыраса да, иң беренче чиратта ата–аналарга кагыла. Ата–аналар арасында бала тәрбияләү — мәктәп эше дигән караш яши. Хөрмәтле ата–аналар, начар тәрбия алган бала иң беренче кемгә начарлык эшләячәге турында онытмагыз. Моның уртак бурычыбыз икәнлеген аңларга вакыт һәм аны белем бирүне яхшырту, һәркемдә җаваплылык хисе тәр-бияләү, җәмгыятьнең тупланганлыгы белән хәл итәргә кирәк.
Рөстәм ӘХМӘТҖАНОВ,
район хастаханәсенең психиатр–наркологы