Начар гадәтләргә бирешмәс өчен

Начар гадәтләргә бирешмәс өчен
Әңгәмәдәшебез — район яшьләр эшләре, спорт һәм туризм бүлеге җитәкчесе Зиннур Сәгыйтов.
— Зиннур Вазыйхович, яшьләрне наркотиклар афәтеннән ничек коткарып калып була?
— Начар гадәтләргә бирешмәс өчен баланы кечкенәдән нык характерлы итеп үстерергә кирәк. Аның үсешен, физик һәм рухи яктан ныклыгын ата-ана алдан кайгыртсын иде. Файдалы шөгыльләр белән вакытны дөрес итеп бүлү әһәмиятле. Бала сәләтенчә вакытын белем, сәнгать һәм спортка багышласа, һичшиксез, гаиләсенә һәм җәмгыятебезгә лаеклы кеше булып үсәчәк.
— Аерым алганда, спорт белән шөгыльләнү өчен райондагы мөмкинлекләрне әйтеп үтсәгез иде.
— “Арча” спорт комплексында, Арча стадионында һәм андагы спорт залында шөгыльләнү өчен барлык мөмкинлекләр дә бар. Мәктәпләрдә физкультура дәресләреннән тыш спорт секцияләре эшли. Баланы сәламәтлеге, физик халәтенә карап, спортның төрле юнәлешендә үстерергә була: көрәш, чаңгы, биатлон, волейбол, баскетбол, хоккей, футбол, йөзү, шахмат һ.б. Уңышларыбыз күз алдында. ГТО нормаларының кире кайтуы шулай ук яшьләрдә спортка кызыксынучанлыкны арттыра.
— Тәрбия җитмәгән һәм тәрбиягә авыр бирелүчән балалар белән нинди эш алып барыла? Андыйлар начар гадәтләргә бирелүчән.
— Алар аерым исәптә тора. Ул балалар белән “Арча” спорт комплексы тренерлары максатчан эш алып бара. Секцияләр вакытында “Наркотиклардан башка тормыш”, “Бәйлелек”, “Начар гадәтләргә – ЮК!”, “Барлык дөнья белән куркыныч афәткә каршы” темалары буенча сөйләшүләр алып барыла. Массакүләм спорт чаралары оештырып торабыз. Милләтләр кроссы, спартакиадалар, төрле ярышлар, ГТО нормаларын тапшыру — болар барысы да сәламәт яшәү рәвешен пропагандалый.
Румия САТТАРОВА