Төзек, матур, уңай булсын!

Төзек, матур, уңай булсын!
5 ноябрьдә Арча муниципаль районы иҗтимагый советының өченче утырышы булды. Аны совет рәисе Ринат Һидиятов алып барды.
— Бүгенге утырышта “Арча муниципаль районында торак пунктларны төзекләндерү буенча эшнең торышы турында”гы мәсьәлә карала, — диде ул. — Әлеге мәсьәлә куелу очраклы түгел. Һәркайсыбыз төзекләндерүнең нәрсә икәнлеген яхшы аңлыйбыз. Бу — яхшы юллар, урамнарны, территорияләрне яктырту, яшелләндерү, мөмкинлекләре чикләнгән кешеләр хәрәкәтләнү өчен тиешле шартлар тудыру һ.б.
Соңгы елларда районда, аерым алганда Арча шәһәрендә төзекләндерү буенча күп эш башкарылды: законсыз рәвештә төзелеп, инде тузып беткән корылмалар сүтелде, алар урынына йортлар проекты буенча яңа сарайлар, гаражлар төзелде. Шәһәр эчә торган су белән тулысынча тәэмин ителде. Законсыз чүплекләр бетерелде, чәчәклекләр, яшеллек арта бара. Ел саен агачлар утырту оештырыла.
Шул ук вакытта төзекләндерүне тәэмин итү, яшеллән-дерү һәм санитария– экология иминлеген тәэмин итү буенча уңай мисалларны арттыра бару мөһим. Бу эштә җирле үзидарә органнары, депутатлар, территориаль җирле үзидарә органнары, бөтен җәмәгатьчелек катнашырга тиеш.
Көн тәртибе буенча чыгыш ясаган район башкарма комитеты җитәкчесенең беренче урынбасары Илшат Галимуллин республика программаларының безнең районда уңышлы үтәлүен билгеләп үтте, алдагы планнарга, бурычларга тукталды.
Фикер алышуда катнашкан Арча шәһәр башкарма комитеты җитәкчесе Рафил Исмәгыйлев халыктан юлларны төзек хәлгә китерүне сорап мөрәҗәгатьләр алынуын әйтте. Быел бу юнәлештә шактый эшләнде, әмма бу гына аз. 180 урамның яртысында диярлек асфальт юллар юк. Транспорт күбәйгән саен машиналар кую мәсьәләсе кискенләшә. Моның буенча шәһәр башкарма комитетының кайбер планнары бар, кайбер учреждение-ләрне шәһәр читенә чыгарып, алар урынында түләүле тукталыш урыны булдыру һ.б.
Шулай ук җәяүлеләр өчен тротуарлар төзү мәсьәләсе дә бик мөһим.
Шәһәрне төзекләндерүдә төзелеш оешмаларының өлеше зур. Әмма яңа төзелгән, ныклап төзеклән-дерелгән объектларда җитешсезлекләр бар, болар — түбә, керү юллары һ.б. Аларны шушы ук оешмалар төзәтергә тиеш.
Апаз авыл җирлеге башлыгы Ренат Садыйков чыгышы да эчтәлекле булды. Биредә башкарылган эшләр күп, “Ватан” агрофирмасы җитәкчелеге, шушы җирлектән чыккан мәгълүм шәхесләр зур булышлык күрсәтә. Авыллар төзек, халык тулы канлы тормыш белән яши.
Фикер алышуларда шулай ук Арча шәһәре һәм Арча муниципаль районының идарәче компаниясе ширкәте директоры Фәрит Зәйнуллин, ЮХИДИ бүлекчәсенең өлкән дәүләт инспекторы Инсаф Павлов, “Роспотребнадзор” идарәсенең территориаль бүлеге җитәкчесе урынбасары Эльвира Шәйхуллина катнашты.
Район башкарма комитеты җитәкчесе Илшат Нуриев бүгенге сөйләшүгә кагылышлы мәсьәләләрнең һәр киңәшмәдә каралуын әйтеп үтте. Арча шәһәрендә Җиңүнең 70 еллыгына багышланган парк төзеләчәк. Шулай ук педагогика көллия-те, шәһәрнең көнчыгыш өлешендәге мәчет янында парклар булдыру планлаштырыла.
— Бу мәсьәләдә мин авыл җирлекләреннән бер инициатива да күрмим әле, — диде Илшат Габделфәртович. — Алар да читтә калырга тиеш түгел. Мәгариф идарәсе, мәктәпләр актив катнашырга тиеш.
2015 ел — Әдәбият елы да. Бу юнәлештә дә мөмкинлекләр зур. Авыл җирлекләре һ.б. арасында төрле чаралар үткәрергә була.
Шулай ук кече һәм урта бизнесны үстерү буенча күп эшлисе бар.
Иҗтимагый совет тикшерелгән мәсьәлә буенча эшне яхшыртуга юнәлдерелгән чаралар тәкъдим итте.
Ильяс ФӘТТАХОВ