Җитәкчеләр хәрби булсачы

Җитәкчеләр хәрби булсачы
Арча ЗУЭСы коллективы ГТО нормаларын тапшырды. Җитәкчеләре Рөстәм Гомәров башлап йөрде. Иң башта, коллективны тезеп, күнегүләр эшләтте...
Мондый хәлне күргән юк иде әле. Бар да, җитәкчегә кушылып, физик хәрәкәтләр ясады. Район яшьләр эшләре, спорт һәм туризм бүлеге җитәкчесе Зиннур Сәгыйтов нормаларны тапшыру тәртибен аңлатты.
Рөстәм Кәлимуллович үзе дә гер күтәрде, турникта күтәрелде.
— Балачактан хезмәт, спорт белән үскән балалар без, — дип сөйләде ул. — Безне әти йоклатып яткырмады. 32 елдан артык армиядә хезмәт иттем. Армия-дә спорт күпкә катлаулы. ГТО нормаларын җиңел, дип саныйм. Һәр кеше үзенең сәла-мәтлеген кайгыртырга, физик күнегүләрдән аерылмаска тиеш. Бездә, мәсәлән, эш урынында хезмәткәрләрнең физик күнегүләр ясавы гадәткә керде. Профсоюз оешмасы бушлай бассейнга йөрүне оештырды. Волейболчыларыбыз бар.
Ир–егетләрнең гер күтәрүе үзе бер тамаша. Кемнең күпме күтәрүе кызыклы иде. Транспорт цехы җитәкчесе, 28 яшьлек Фоат Фәрхуллин герне 60 тапкыр күтәрде.
— Кул юешләнде, әле тагы күтәрәсе идем, — диде ул. — Укучылар сараенда атнага өч тапкыр волейбол уйныйбыз. Казандагы “Таттелеком” җәмгыятенең җыелма команда составында республика күләмендә призлы урыннар алабыз.
Шофер булып эшләүче, 57 яшьлек Рәдис Яруллин 16 кг.лы герне 64 тапкыр күтәрде! Интекмәде, җиңел башкарды.
— 28 ел тәмәке тарттым. Хәзер тартмыйм, — диде ул. — Гомерем хезмәт белән үтте. Терлек асрадык. Сәламәтлегем турында гаиләм кайгырта. Быел менә терлек тә алмадык. Интекмә, диделәр...
6нчы разрядлы электр монтеры булып эшләүче 22 яшьлек Рәмис Галиевка җитүчеләр булмады. Герне 78 тапкыр күтәрде!
— Армиядә Краснодар өлкәсендә хезмәт иттем, — дип сөйләде ул. — Яңа Кишет мәктәбендә укыганда ук спорт белән шөгыльләндек. Армиядә төрле яклап үсеш алдык.
Ир–егетләрнең турникта тартылуын да кызыксынып күзәттек. Зур көч сорый торган спорт төре бу. Үзеңнең көчеңне чамалау өчен менә дигән сынау. Иң күбе кабельче, 26 яшьлек Эдуард Шәймуллин 16 тапкыр күтәрелде.
Хатын–кызлардан тәбәнәк турникта тартылу буенча 51 яшьлек, әйдәп баручы белгеч Рәмзия Фәттаховага тиңнәр булмады. Ул 25 тапкыр күтәрелде.
— Спорт белән янәшә атларга тырышабыз, — дип сөйләде ул. — Арча станциясендә Кояшлы урамында яшибез. Әле кайчан гына Айванга таба иптәшем белән йөгереп кайта идек. Хәзер туктадык. Физик күнегүләрдән аерылырга ярамаганлыгын яхшы беләм. Башлыйсы булыр... Ә эш урынында физик күнегү-ләрне үзем ясатам. Утырып эшләгәч, тәннәр язылып, рәхәт булып китә.
ГТО нормалары тапшыру тәртибен аңлатып, нәтиҗәләрне теркәп барган район яшьләр эшләре спорт һәм туризм бүлегенең әйдәп баручы белгече Рөстәм Зарипов:
— Коллектив нормаларны әйбәт тапшырды, — дигән бәяне бирде. — ГТОны тапшыру ул һәркемнең үзе өчен. Үзеңнең физик халәтеңә бәя бирү бу. Ә аны ел саен тапшырырга кирәк булачак. Кеше алдында сынатасың килмәсә, әкренләп физик яктан үзеңне чыныктырасың инде.
Ахырдан коллектив яңадан тезелеп басты һәм бертавыштан:
— Без эстафетаны Арча студентларына тапшырабыз! — дип өндәде.
Рөстәм Кәлимулловичның ничек итеп коллективны оештырып йөрүенә сокланып, арадан берәү:
— Барлык җитәкчеләр дә хәрби булса икән ул, — дип әйтеп куйды.
Румия НАДРШИНА