Россиянең яшь гражданнары

Россиянең яшь гражданнары
30 октябрьдә үткән тантанада районыбызның 16 яшь егет–кызы паспорт алды. Аларны район башлыгы вазыйфаларын башкаручы Любовь Осина һәм ТР миграция хезмәте идарәсенең Арча районындагы бүлеге җитәкчесе вазыйфаларын башкаручы Гүзәлия Нигъмәтҗанова тапшырды. Россиянең яшь гражданнарын район яшьләр эшләре, спорт һәм туризм бүлеге җитәкчесе Зиннур Сәгыйтов котлады, “Ләззәт” төркеме кызлары (җитәкчесе Тайфә Гыйдиятуллина) җырлы–биюле чыгышларын бүләк итте.
Балаларын зурлап, гомергә истә калырлык бәйрәм оештыручыларга бүген паспортлы булган Азалия Әхмәтгалиеваның әнисе Лилия ханым барлык әти–әниләр исеменнән рәхмәтен җиткерде.
Паспорт алучылар арасында Югары Пошалымнан Инсаф Абдуллин да бар иде. Тантанага ул әтисе Миннехан абый белән килгән. “Илнең лаеклы гражданины булып паспорт алуым белән мин бик бәхетле. Паспорт-лы булгач, һәр эшемне җаваплылык тойгысы белән, лаеклы исемне акларлык итеп башкару — минем бурычым”, — ди Инсаф. Улы белән килгән Миннехан абый өчен дә зур вакыйга бу. Үзенең беренче тапкыр паспорт алган чакларын искә төшереп алды ул:
— Паспортны кесәгә тыгып куйгач, кат–кат алып караган идем: башта күңелем ышанмыйча, аннан буялмадымы, фотосүрәттә матур чыктымы икән дип. Өйгә кайткач, көзге каршына да куеп карадым, энҗедәй тезелгән (ул чакта кулдан каләм белән языла иде) язуларын кат–кат укып чыктым. Паспортлы булу — иптәшләрең каршында да горурлык бит, якыннарыма, дусларыма бераз кәперәеп (мин паспортлы булдым бит!) күрсәтеп йөргәнем хәтердә. Паспорт алгач, тормышка караш үзгәрә, өлкәнәеп китәсең, мөстәкыйльлек арта, дип саныйм. Инсаф паспорт алучы өченче улыбыз. Абыйлары да тәүге тапкыр паспортны кулларына алгач, бер–берсенә күрсәтеп мактанышканнар иде.
Розалия ЗИННӘТОВА