Үзгәрешләр керде

Үзгәрешләр керде
Әңгәмәдәшебез — район социаль яклау идарәсе җитәкчесе Илдус Әһлиев.
— Илдус Котдусович, 2015 елның 1 гыйнварыннан “Россия Федерациясендә гражданнарга социаль хезмәт күрсәтү нигезләре турында” яңа Федераль закон ( №442) эшли башлаячак. Аның әһәмияте нидә?
— 1995 елдан, Федераль закон гамәлгә кергәч, социаль хезмәт күрсәтүгә федераль үзәк һәм регионнар җавап бирде. 2005 елдан ул тулысы белән субъектларга тапшырылды. 2015 елның 1 гыйнварыннан Россиянең барлык территориясендә дә халыкка социаль хезмәт күрсәтүнең бердәм нормалары гамәлгә керә.
— Нинди үзгәрешләр булачак?
— Яңа законда “авыр тормыш хәлендә булган граҗданнар” төшенчәсе “социаль хезмәткә мохтаҗ гражданнар” дип үзгәртелә. 2015 елның 1 гыйнварыннан ярдәмне менә кемнәр алачак: авырту, имгәнү, картлык яки инвалидлык буенча тулысынча яки өлешчә үз–үзен карый алмаучылар, даими рәвештә карау-га мохтаҗ бер яки берничә инвалиды булган гаиләләр, социаль җайлашуда авырлык кичерүче балалы гаиләләр, эше һәм яшәргә чыганагы булмаган кешеләр. Социаль хезмәткәрләр шулай ук гаиләдә агрессивлык хөкем сөргәндә, хатыннар, балалар өстеннән тупас кылану очраклары булганда да ярдәмгә киләчәк.
— Законда төп яңалыкларның берсе — социаль хезмәт күрсәтү буенча шәхси программа. Ул социаль хезмәткә мохтаҗларга артык мәшәкатьләр тудырмасмы?
— Яңа закон социаль хезмәт алучылар өчен уңай шартлар тудыра. Бу программа, гади генә әйткәндә, ярдәм итүнең “юл картасы”. Анда социаль хезмәт күрсәтү формасы, социаль хезмәтләрнең төре, күләме, вакыты, шартлары языла. Кайбер уңай якларын әйтеп үтәм. Мәсәлән, мөмкинлекләре чикләнгән балалар тернәкләндерү үзәгенә елга ике тапкыр социаль яклау органыннан юллама алса, шәхси программа эшләнгәч, юллама өч елга бер тапкыр гына бирелә. Гаилә башка урынга күчеп китсә дә, программа көчендә калачак.
— Яңа законда социаль хезмәт күрсәтү өлкәсенә шәхси оешмалар да үтеп керәчәк, диелгән.
— Әйе, яңа закон социаль эшмәкәрлек өчен зур мөмкинлекләр ачачак. Моңарчы социаль хезмәтне дәүләт һәм муниципаль органнар гына күрсәтә алды. 2015 елдан социаль хезмәткә заказлар конкурс нигезендә үтәләчәк. Аларга хезмәтне коммерция һәм коммерция булмаган оешмалар, шәхси эшмәкәрләр күрсәтә ала.
— Дәүләт контроле булачакмы?
— Әлбәттә, булачак. Аңа җәмәгать контроле дә өстәләчәк. Рәсми сайтта социаль хезмәтләр сыйфаты турында фикерләрне язарга мөмкин. Һәркем үзенә кирәкле мәгълүматны рәсми сайт-тан таба ала.
Румия НАДРШИНА