Чишмәләребез саекмый

Чишмәләребез саекмый
Әдәбият, сәнгать өлкәсендә Гариф Ахунов исемендәге премия районыбызның яшь талантларына быел җиденче тапкыр тапшырылды. Публицистика номинациясендә кызыксындыру премиясенә Түбән Аты мәктәбенең 8 сыйныф укучысы Ландыш Зиннәтуллина һәм Арчадан Зөһрә Зарипова, шигърият номинациясендә Арча педагогика көллияте студенты Гөлүсә Мөхәммәтҗанова һәм проза номинациясендә Яңа Кырлайдан Нияз Мансуров лаек булды.
Искиткеч шәхесләр була: үзләре инде арабызда юк, әмма рухлары, әйткән сүзләре, фикерләре һаман янәшәдә сыман, яңа эшләргә көч–дәрт биреп торалар. Туган җиребез биргән халык язучылары әнә шундыйлардан. Якташ әдипләребезнең берсе — Гариф Ахунов үзвакытында күп кенә яшь талантларга хәер–фатыйха биреп, иҗатларында юл күрсәтеп дөньяга чыгарырга ярдәм иткән кеше. Районыбызда күркәм традициягә әйләнгән әлеге бәйге дә якташ язучыбызның күркәм эш-ләрен дәвам итеп, район җирлегендә яшәүче яшь каләм ияләрен, сәнгатькә гашыйк яшьләрне барлау һәм иҗатларында азмы–күпме ярдәм итү максатыннан оештырыла. Төрле елларда Гариф Ахунов исемендәге премиягә ия булган лауреатларыбыз республикада танылган язучы, журналистлар булып җитлекте. Аларның уңышларын күрү, ишетү күңелдә горурлык хисләре уята.
Быелгы лауреатларыбызның да инде күрсәтерлек эшләре бар. Әйтик, республика матбугаты бәйгеләрендә җиңү яулаган Ландыш Зиннәтуллина быел “Алтын каләм” фестивалендә катнашу бәхетенә дә ирешә.
Зөһрә Зарипова 5нче гимназиянең 11 сыйныфында укый. Дәрестән тыш Укучылар сарае каршында эшләп килүче “Нур” телестудиясендә шөгыльләнә. Телестудия җитәкчесенең режиссура буенча урынбасары, тележурналист, фотохәбәрче буларак республика күләмендәге бәйгеләрдә катнаша.
Булачак башлангыч сыйныфлар укытучысы Гөлүсә Мөхәммәтҗанова көллияттә үзен оештыру сәләтенә ия, олимпиада–бәйгеләр җиңүчесе буларак таныта. Арча педагогика көллиятендә узган “Нәүрүзбикә — 2013” бәйгесендә “Иң сөйкемле Нәүрүзбикә” исеменә, “Ел студенты — 2013” бәйгесендә беренче урынга лаек була. “Татар кызы — 2013” республика бәйгесендә дә Гөлүсә җиңүче. Күңелендәге хис–кичерешләрне Гөлүсә шигырь битләренә сала.
Ә Нияз Мансуровның Бөтенроссия яшь язучылар бәйгесендә катнашуы турындагы язма узган ел газетабыз битләрендә урын алган иде. Башлангыч сыйныфларда укыганда ук әкиятләр иҗат итә башлаган егет хәзер фантастика язу белән мәшгуль. Бүгенге көндә ул проектлаучы инженер, экспертиза белгече.
Җиңүчеләрне котлап, ТРның атказанган сәнгать эшлеклесе, драматург Данил Салихов, якташыбыз, М.Горький, С.Сөләйманова исемендәге әдәби бүләкләр иясе, Гариф Ахуновның кызы Наилә Ахунова һәм Арча муниципаль районы башкарма комитеты җитәкчесе Илшат Нуриев матур теләкләрен ирештерде, лауреат Дипломнары һәм акчалата премия тапшырды.
Тантаналы кичәдә Үзәк китапханә каршында эшләп килүче “Каурый каләм” иҗат берләшмәсе ветераннары, Г.Тукай исемендәге Арча педагогика көллияте студентлары, Арча Укучылар сарае каршында эшләүче “Тукай якташлары” иҗат берләшмәсенә йөрүче укучылар һәм китапханәчеләр дә катнашып, җиңүчеләрнең шатлыгын уртаклашты.
Расих Галимҗанов, Миләүшә Кәлимуллина, Алсу Шиһапованың дәртле җырлары кичәне матур төсмерләр белән баетты. Район үзәк китапханәсе хезмәткәрләре бүген искиткеч бәйрәм оештырган.
Татар әдәбиятының йөзек кашы булган язучыларны биргән Арча җиренә киләчәктә дә өметләр зурдан.
Розалия ЗИННӘТОВА