“Райгаз” спортчыларга бай

“Райгаз” спортчыларга бай
Арча газ куллану хезмәте коллективы (җитәкчесе Илшат Сабиров) ГТО нормаларын тапшырды. Акчалы, эшле абруйлы предприятиегә яшьләр күбрәк тартыла.
Иң беренчеләрдән булып ГТО нормаларын тапшырырга предприятиедә мастер булып эшләүче Илнар Дияров килде.
— Атаклы чаңгычы! — диделәр аның турында. Кыяфәте буенча, чыннан да, йөгерүчегә охшаган. Алар, гадәттә, җиңел гәүдәле була. 36 яшьлек Илнар: “Педучилищеда укыдым”, — дигәч, бар да аңлашылды. Чөнки Арча педагогика көллиятендә спортчыларны әзерли беләләр. Арадан берәү уены–чыны белән: “Райгаз”ның яртысы Арча педагогика көллиятен тәмамлаган”, — дип әйтеп куйды. Әгәр дә бу сүзләрдә күпмедер дәрәҗәдә хаклык бар икән, “Райгаз” спортчыларга бай булырга тиеш. Минем фикерне куәтләгәндәй Илнар Дияров:
— Бездә спортчылар күп, — дип санап китте. — Рөстәм Габделбәров — көрәшче, Марат Шәймуллин — йөгерә, Фәндүс Сәлахов — чаңгычы, Айрат Шәрәфиев — турист, Мөдәрис Мөхәммәдиев — герче, Нина Кашапова — өстәл теннисы буенча, Төрнәледән Азат Гыйниятов—чаңгычы, пенсиягә чыкса да, әле дә предприятие данын яклап ярышларда катнаша...
Хатын–кызлардан ГТО нормаларын беренче булып тапшырырга килгән Резедә Заһриеваның төз гәүдәсе, үз–үзен тотышы нәкъ спортчыныкы.
— Арча педагогика көллиятен тәмамладым, — ди. — Физкультурадан Бари Каюмович укытты. Әмма мин ул вакытта спортны бик өнәп бетермәдем, хәзер дә шулай.
Резедә спортка мөкиббән китмәвен әйтергә тырышса да, аның үзәгенә спорт орлыклары салынганын чамалап була. Ул йөгерә. Барыбер дә, Бари Каюмовичның тырышлыгы бушка китмәгән. Резедә “Саба газы” производство идарәсенең җыелма команда составында спорт ярышларында катнаша һәм призлы урыннарны ала.
Гөлнур Шәйхуллина да спорттан ерак тормый. Җыелма команда составында төрле ярышларда (ату, йөзү һ.б.) катнаша.
— Балалар белән иртән иртүк йөгерә башлыйм, — дип шаярта. Тормыш шундый инде ул, тәгәрмәч кебек әйләнә.
— Спортны ташламаска кирәк, — ди Илнар Дияров. — Кеше өчен иң кыйммәт нәрсә — сәламәтлекне ныгыту ул. Күбрәк җәяү йөрергә кирәк. Мин үзем 2нче сыйныфтан чаңгыда. Йөгерәм дә. Чаңгы, биатлон буенча 1нче урыннарны алган бар. Балаларны да үземнән калдырмыйм.
Газчылар, алар күп түгел иде, ГТО нормаларын яхшы тапшырды. Ки-ләсесендә (ә ГТО көзге, кышкы, язгы чорларга бүленә) җитәкчеләре белән бергә күбрәк катнашырлар, дип ышанабыз.
Румия САТТАРОВА