Әйдә, балам, сәяхәткә!

Әйдә, балам, сәяхәткә!
Татарстан Республикасы Мәдәният министрлыгы тарафыннан “Беренче сыйныф укучысының мәдәни көндәлеге” дигән проект гамәлгә куелды. Проект җөмһүриятебезнең Мәгариф һәм фән министрлыгы ярдәме белән 2014 ел – Мәдәният елы уңаеннан эшләнде. Безнең районда көндәлек 12 ноябрьдә 563 беренче сыйныф укучысына тапшырылды. Ул район үзәк китапханәсендә, авыл китапханәләрендә һәм Арча станциясендәге мәдәни–спорт комплексында тантаналы шартларда үтте.
Октябрьнең соңгы көн-нәрендә район үзәк китапханәсендә, 1нче сыйныф укытучыларын, китапханәчеләрне җыеп, проектны ничек тормышка ашыру турында сөйләшенгән иде. Район үзәкләштерелгән китапханәләр системасы җитәкчесе Лилия Фазылова:
— Проектның асылы — якты күңелле бала тәрбияләү, — дип сөйләде. — Матурлыкны, зәвыкны тоя белгән укымышлы бала — тәрбиянең иң дөрес юнәлеше. Мәдәни тәрбия дәвамлы булса иде. Кызыксындыру шартлары да бар: бәйгедә җиңүче балалар, укытучылар, әти–әниләр, китапханәчеләр бүләкләнәчәк.
Көндәлекне тапшыру тантанасы район үзәк китапханәсендә иртәнге сәгать 9да башланды. Анда Татарстан Республикасы Дәүләт Советы депутаты Рауил Рәхмәтуллин катнашты.
Тантананы район балалар китаханәсе мөдире Алсу Рәхимбаева башлап җибәрде.
- Кадерле балалар, бу көндәлек сезне китапханә, музей, театр, кино, мәдәният үзәкләренә, матур итеп төзелгән тарихи биналарга, күңелле чараларга алып барыр, кая гына сәяхәт кылсагыз да, сез көндәлекне үзегездән калдырмагыз, — дип сөйләде ул. — Күргәннәрегезне укытучыгыз, әти-әниегез белән бергәләп, китапханәче апаларыгыз ярдәме белән көндәлеккә язып, аны пөхтә итеп тутырып барырсыз. Шулай итеп, сез кечкенәдән тәртипле, бай рухлы булып үсәрсез.
“Бердәм Россия” сәяси партиясе җирле бүлекчәсенең яшь гвардиячеләре Камилла Прахова белән Инсаф Гаптелбәров слайд-лар ярдәмендә балаларны кызыклы сәяхәт белән мавыктырды. Күрче, китапханәдә кызыклы китаплар укып, төрле чараларда катнашып, хәтта кино да карап була икән. Арчада “Әлифба” музее, Яңа Кырлайдагы “Шүрәле”, “Убырлы карчык”лы Г.Тукай музее да кызыклы булырга тиеш. Казандагы курчак тетры да үзенә тартып тора. И-и, алда әле аларны күп кызыклар көтә икән... Балаларның тизрәк төсле, матур көндәлекне кулларына аласы килде. Ул бәхетле минутлар озак көттермәде. Республиканың Дәүләт Советы депутаты Рауил Рәхмәтуллин көндәлекне балаларга тапшырды.
— Бу чарага бик җитди карагансыз, — дип ул китапханә хезмәткәрләренә һәм “Бердәм Россия” сәяси партиясе җирле бүлекчәсенә мактау сүзләре әйтте. — Мәдәният елында иң яхшы проектларның берсе бүген старт алды. Бу көндәлек балага китаплар дөньясы, тарихи–мәдәни урыннар һәм мәдәни чаралар белән танышырга ярдәм итәр. Бала янәшәсендә әти–әни, укытучы, китапханәче булуы да әһәмиятле.
3нче мәктәпнең башлангыч сыйныф укытучысы Флера Һадиуллина белән сөйләшәбез.
— Көндәлек белән эшләргә өйрәнсәң, бу бик кызыклы, — диде ул.
— Мәдәни көндәлек 1нче сыйныф өчен иртәрәк түгелме?
Мәгариф идарәсе методисты Гөлфирә Феоктистова:
— Юк, чөнки балалар инде бакчадан ук төрле яктан мәгълүматлы булып мәктәпкә киләләр, — дип җавап бирде. — Кече яшьтән аларның фикерләвен, математик сәләтен һәм сөйләмен үстерү өчен нинди генә китаплар юк хәзер. Шулар ярдәме белән мәктәпкә әзерлекле булып килгән 1нче сыйныф укучысына мәдәни көн-дәлек кызыклы булачак.
3нче мәктәпнең 1нче сыйныф укучысы Илсөя Мәҗитова инде көндәлек белән танышырга да өлгергән.
— Көндәлектә кроссворд та, чүлмәккә бизәк ясау да, тагын әллә нинди кызыклар бар, — ди ул тәэсирләнеп. — Тизрәк башлыйсы килә...
Румия НАДРШИНА