“Шатлык”ның туган көне

“Шатлык”ның туган көне
Безнең төзүчеләр могҗиза тудырырга сәләтле. Шәһәребезнең көньяк өлешендә калкып чыккан “Шатлык” дип аталган 9нчы номерлы балалар бакчасын күргәч, моңа тагын бер тапкыр инанасың.
Нинди гүзәл, мәһабәт, сәнгать әсәре булырлык бина дип сокланасың. Киң колачлы территориясе дә үзенә тартып тора, андагы төрле–төрле уен мәйданчыклары балалар күңеленә хуш килерлек.
12 ноябрьдә “Шатлык”ны ачу тантанасында яңа бакчаның мөдире Надия Мифтахетдинова аны “Океанда йөзүче корабль кебек” дип атады.
— “Шатлык”та шатлыклы бәйрәм бүген! — диде район башкарма комитеты җитәкчесе Илшат Нуриев. — Республикабыз Президенты Рөстәм Миңнеханов безнең иң зур байлыгыбыз — балалар һәм халкыбыз, дип әйтә. Республикада тормышка ашырыла торган программалар да нәкъ менә шул максатка юнәлдерелгән.
Илшат Габделфәртович шундый матур бинаны төзүчеләргә, аны сафка бас-тыруга өлеш керткән башка оешмаларга рәхмәт әйтте, тәрбиячеләргә уңышлар теләде, балаларга киңәшләрен бирде. Киләчәктә дә районда балалар бакчаларын төзү дәвам итәчәген белдерде. 2015 елда Арчаның 3нче мәктәбе базасында — 40, 2нче мәктәп базасында 80 урынлы балалар бакчалары сафка басачак.
Татарстан Республикасы мәгариф һәм фән министры урынбасары Илдар Мөхәммәтов үзенең чыгышында быел республикада 56 балалар бакчасы сафка басачагын әйтте. Ул да бу бинаны төзүчеләргә рәхмәт сүзләре җиткерде.
— Сез баланы бакчада йөртүне иртән китереп, кич алып китү дип кенә уйламагыз, — диде ул, ата–аналарга мөрәҗәгать итеп. — Хәзер балалар бакчалары өчен яңа стандартлар кертелде, тәрбиячеләргә таләпләр артты. Бала моннан мәктәпкә барырга әзер булып чыгарга тиеш.
“Арча КСМы” ширкәте директоры Рафаэль Муллагалиев матур, зәвык белән эшләнгән бинаның килә-чәктә дә шул хәлдә саклануын теләде, бакча мөдире Надия Мифтахетдиновага символик ачкыч тапшырды.
Кунаклар “Шатлык”ның туган көненә бүләкләр дә алып килгәннәр иде. Нәниләр дә җавапсыз калмады: җырладылар, биеделәр, шигырьләр сөй-ләделәр.
Тантанада ТР Президенты каршындагы дәүләт торак фонды башкарма директоры Тәлгать Абдуллин, ТР Баш инвестиция–төзелеш идарәсе директоры урынбасары Илнур Кәлимуллин, ТР Дәүләт Советы депутаты Рауил Рәхмәтуллин катнашты.
Шушы юлларны язып утырганда редакциягә “Арча АТПсы” акционерлык җәм-гыяте баш инженеры Мәгъдүт Галимҗанов килеп керде.
—“Шатлык”ка кадәр 13 ноябрьдән автобус йөри башлый, — диде ул. Монысы тагын бер шатлык!
Әлеге автобус Арчадан “Алсу” кибете яныннан 7.15, 16.40, 17.45 сәгатьтә китеп, Мелиоратор, райгаз, “Западный” сәүдә комплексы, Зур Бирәзә, Божа, Нефтебаза тукталышларында тукталып, “Шатлык”ка кадәр килә. Ә “Шатлык” тукталышыннан шушы ук маршрут буенча 8, 17.15, 18.15 сәгатьтә кайту ягына кузгалып китә. Исән–имин йөрегез!
Ильяс ФӘТТАХОВ