Авыллар — безнең киләчәгебез

Авыллар — безнең киләчәгебез
15 ноябрьдә район башкарма комитеты җитәкчесе Илшат Нуриев катнашында 2014 елның 9 ае нәтиҗәләренә багышланган киңәшмә үтте.
— Районда башкарылган эшләр күп, әмма алда торган бурычлар бик җитди, —диде район башкарма комитеты җитәкчесе Илшат Нуриев. — Бүген без менә шуларның кайберләренә тукталып китәрбез.
Район башкарма комитетының икътисад һәм финанс бүлеге мөдире Зөлфәт Шәрәфетдинов районның төп социаль–икътисадый күрсәткечләре турында сөйләде.
— Республика җитәкчелеге һәр айны районнарның үсеше мониторингын алып бара, — диде ул. — Тугыз айлык нәтиҗәләр буенча безнең район 38нче урынны алып тора. Август аенда 40нчы идек. Шәһәр һәм авыл җирлекләре булган 18 район арасында 13 урынны алып торабыз.
Районның хәле, беренче чиратта, бездә теркәлгән предприятиеләрнең финанс, җитештерүнең торышына бәйле. Быел 9 айда районда тулай территориаль продукт 7,8 млрд. сум тәшкил итә. Иң зур үсешне сәнәгать, авыл хуҗалыгы һәм төзелеш бирде. Арча сөт комбинатында үсеш иң зуры — 396 процент. Иң зур өлешне әлеге комбинат, “Арча нефть продуктлары” акционерлык җәмгыяте, “Татавтодор” филиалы, “Тайд–Фойл”, “Центр–2”, “Арча КСМы”, “МСО” ширкәтләре кертте.
Район авыл хуҗалыгы һәм азык–төлек идарәсе җитәкчесе Айдар Габбасов авыл хуҗалыгындагы күрсәткечләрне начар түгел, әмма бик тыйнак, дип атады. Күп нәрсә үзебездән тора. Чөнки соңгы елларда авыл хуҗалыгы җитештерүчеләренә дәүләт ярдәме кими бара. 2010 елда ул 1 млрд. 614 млн. сум чамасы тәшкил итсә, 2014 елның 9 аенда 284 млн. 441 мең сум гына булды.
Иң борчыган әйбер — авылда эшләүче кешеләрнең олыгая баруы. “Аю” ширкәтендә эшләүчеләр арасында 30 яшькә кадәр — 1, “Акчишмәдә” 3 кеше бар. “Нива” ширкәтендә берәү дә юк.
Хезмәт хакы түбән булганда кайбер хуҗалыкларда киләчәктә эшләргә кеше калмаячак. Ә хезмәт хакын күтәрү өчен күбрәк продукция җитештерергә кирәк. 100 сыердан 60–61 бозау алып әллә кая китеп булмый.
— Монысы бөтенләй аңлашылмый торган нәрсә, — дип сүзгә кушылды район башкарма комитеты җитәкчесе Илшат Нуриев. — Шәхси хуҗалыктагы сыер елга бер бозау китерми калмый бит инде.
Айдар Габбасов игенчелектә дә, терлекчелектә дә булган мөмкинлекләрне санап күрсәтте, бурычлар куйды.
Кыенлыкларга бирешмичә, коллективларын саклап, бүгенге көндә уңышлы эшләп килүче ЗУЭС, “Арча КСМы”, “Арча АТПсы” җитәкчеләре Рөстәм Гомәров, Рафаэль Муллагалиев, Рүзәл Гәрәев уңыш серләрен ачып бирделәр.
— Барыбызга да хуҗа булырга өйрәнергә кирәк, — диде район башкарма комитеты җитәкчесе Илшат Нуриев, киңәшмәгә йомгак ясап. — Яңа инвестицияләр кертү турында уйлагыз, тәкъдимнәр белән килегез. Районда 8 авыл бетеп баручылар исемлегенә кертелгән. Бер авыл да бетәргә тиеш түгел, авыллар — безнең киләчәгебез.
Ильяс ФӘТТАХОВ