Бердәмлектә көч

Бердәмлектә көч
Районда алдынгылар рәтендә барган авыл мәдәният йортлары, клублары турында язуыбызны дәвам итәбез. Чираттагы сәяхәтебез бергә ярдәмләшеп эшләүче Яңасала һәм Каенсар авылларына.
Икесенә бергә 165 хуҗалык булып, 467 кеше генә яшәүгә, мәдәният учреждениеләре җитәк-челәренең әле бер ел гына эш-ләүләренә карамастан, мәдәният дөньясы биредә тынып тормый. Юк, ишекләре ачылып–ябылу турында сүз бармый, Яңасала мәдәният йорты җитәкчесе Гөлназ Касыймова, Каенсар клубы мөдире Энҗе Сафина, махсус белемнәре булмаса да, күңел биреп эшлиләр, төрле чаралар оештырырга, авыл халкының күңелен күрергә тырышалар. Моны Яңасала авыл җирлеге башлыгы Айрат Сафинның мәдәният учрежде-ниеләренә уңай карашы, һәрчак ярдәм итәргә әзер торуы, үзенең дә мәдәният тормышында актив катнашуы тәэсире дисәк тә ялгышмабыз.
— 2001 елдан төзекләндерү эшләре башкарылганы юк иде, — ди Гөлназ Касыймова. — Быел менә 40 мең сумга сәхнәгә һәм тәрәзәләргә яңа заманча пәрдәләр тегелде, 60625 сумга аппаратура алынды, 124 мең сумга җылылык челтәре алыштырылды, яңа стендлар эшләнде, гомумән, 2014 елда гына барлыгы 409386 сумлык эш башкарылды. Хәзер менә идәннәрне алыштыра башлаячаклар. Безнең хезмәт түләүле түгел, дискотекаларны да акчага үткәрмибез, концертлар да бушка. Мәдәният учреждениесенә шундый карашы өчен авыл җирлеге башлыгына зур рәхмәт. Мондый мөнәсәбәт булганда тырыш хезмәт белән җавап бирәсе килә.
Яңасала мәдәният йортында төрле түгәрәкләр эшли. Болар район күләмендә үткәрелгән иҗат концертларына әзерләнү өчен бик уңай. Авылда яшьләр генә түгел, өлкәннәр арасында да сәләтле кешеләр бар. Сәкинә Мәрдәнова, Оркыя Мөхәммәтҗанова, Нурания Сафина, Гайшә Тумакова, Зөлфирә Гыймалетдинова, Нурия Каширова, Гөлсәрия Миннебаева, Сәвия Газизова, Нурия Мөхәммәтҗанова берләшеп, “Көмеш чулпы” ветераннар ан-самбле оештырганнар. Районда керәшеннәр гореф–гадәтләрен чагылдырган, аларның җырларын башкарган бердәнбер ансамбль дисәк тә була.
— Иҗат концертында 8 номинациядән 5 номер гала концертка узды. Бу безнең өчен зур дәрәҗә, — ди Гөлназ. — 25 еллык хезмәт стажы булган китапханәче Фәридә Борһанова, Каенсар клубы мөдире Энҗе Сафина белән бергә эшлибез. Бердәмлектәдер дә безнең көч.
— Безнең клуб мәдәният һәм спорт комплексы итеп үзгәртелгән иде. Шуннан бирле төзекләндерү эшләре башкарылганы юк. Идәннәре беткән. Аларны карау өчен үзебезнең көч кенә җитмәячәк, район җитәкчеләренең ярдәме дә кирәк, — ди Энҗе Сафина. — Шулай да без тик ятмыйбыз, шушы кечкенә генә клубыбызда да төрле чаралар үткәрәбез. Менә әле авыл җирлеге ярдәме белән коймаларны алыштыра башладылар. Клубыбыз тышкы яктан тагын да ямьләнеп, кешеләрне тартып торачак.
Бу якларда гер күтәрү остасы Рифат Исмәгыйлев истәлегенә “Ягез әле, егетләр” бәйгесе оештыруны традициягә кертеп җибәргәннәр. Быел да ул бик күңелле үткән. Батырлык дәресенә Әфганстанда хезмәт итеп, исән–сау туган йортына әйләнеп кайткан Ринат Сафинны, әнисе Нурания апаны чакырганнар. Сугышта һәлак булганнар истәлегенә обелиск ачу тантанасы да оешкан төстә узган. Каенсарда Мәүлия Вәлишинаның юбилеен сәхнәдә билгеләп үткәннәр. Керәшеннәрнең гореф-гадәтләренә туры китереп пасха бәйрәмен күрсәткәннәр. “Дәү әни һәм онык” кичәсе дә тамашачыларга ошаган. Сәхнә ветераннары белән очрашу, “Могҗизалар кыры” тамашасы да берәү-не дә битараф калдырмаган. Өлкәннәрне клубка тарту максатыннан оештырылган “Авылымның айлы кичләре” дигән 80–90нчы еллар дискотекасы да һәркемгә ошаган.
— 25 елдан артык мәдәният йортын җитәкләгән Сәвия Газизова бик булыша, үзе дә чараларда катнаша, — ди Энҗе. — Шундый ярдәм итәргә әзер торучылар булганда эшләве дә җиңел. Аннан яшьләребез дә бик актив.
Ике авыл арасы 3 километр булса да, мәдәният өлкәсендә ул сизелми. Әнә шулай бергә–бергә иңне–иңгә куеп эшләүләре белән көчле алар.
Гөлсинә ЗӘКИЕВА