Һәр дәрес тормыш сабагы бирә

Һәр дәрес тормыш сабагы бирә
Һәр ел ТР Дәүләт Советы инициативасы белән Мәгариф һәм фән министрлыгы катнашында мәктәпләрдә парламент дәресләре уза. Бу атнада район җирлегендәге мәктәпләрдә дә Россия парламентаризмы көне уңаеннан парламент дәресләре атналыгы бара.
19 ноябрьдә Арчаның 5нче гимназиясендә узган “Без фашизмга каршы” темасына багышланган дәрес барышын күзәтергә насыйп булды. Өч 9нчы, ике 11нче сыйныфлар өчен укытучылар Илнур Җәләев һәм Гөлнара Әхмәтханова тарафыннан уздырылган дәрестә ТР Дәүләт Советы депутаты Ринат Закиров катнашты.
Укучыларның дәүләт органнары системасы, фашизмга каршы ничек көрәшергә, фашизмның 20–21 гасыр афәте, Украинадагы сугыш турында чыгышлары — аларның илдәге сәясәттән, кешелек тарихындагы сәяси вакыйгалардан мәгълүматлы булуын күрсәтә.
Кешелек тарихында фашизмның рәхимсезлеге Бөек Ватан сугышы елларында ачык чагыла. Ел саен 11 сентябрь илебездә фашизм корбаннарын искә алу көне буларак билгеләп үтелә, бүгенге дәрестә дә Бөек Ватан сугышы корбаннары бер минут тынлык белән искә алынды.
Дәрес башланганчы тарих, җәмгыять белеме укытучысы Илнур Җәләев белән әңгәмә корган идек. Укучыларны тәрбия-ләүдә мондый дәресләрнең роле турында сорагач, ул: “Күп югалтуларга, үлемгә китергән фашизм янә баш калкыта башлады. Әлеге тема ярдәмендә балаларга берникадәр дәрәҗәдә булса да аның нинди коточкыч афәт икәнлеген күрсәтергә, аңлатырга теләдек, — диде. — Бүгенге дәрестә сөйләшү белән укучылар күңелендә үз Ватаннары өчен горурлык уятырга теләдек, патриотик хисне арттырасы килде. Гомумән, укучылар сәясәт белән кызыксына. Алар фашизмга каршы үзләренең тискәре фикерләрен белдерә, дәрескә үзләре юлыккан шул темага кагылышлы мәкаләләр алып киләләр”.
Дәрес барышында укучыларга тәкъдим ителгән видеороликта фашизмның җәбер–золымы күңелләрне тетрәндерә: берничә ай гына элек бер борчусыз Украина җирендә йортлар җимерелә, кешеләр үлә... Моны караган һәр бала күңеленнән безгә андый хәлләрне күрергә язмасын, дип теләгәндер.
Дәрес ахырында укучыларның әлеге тема буенча белем дәрәҗәсен бәяләгән Ринат Закировка шактый сораулар яуды: укучылар Дәүләт Советындагы эшчәнлек, законнарны ничек кабул итү, тел мәсьәләсенә кагылышлы сорауларны да читтә калдырмады. Ә депутат, үз чиратында, укучылар фашизмның ерткыч гамәлләрен тагын да тулырак күзалласын, бүгенге якты тормыш өчен ата–бабаларыбызның нинди җәбер–золымнарга дучар булуларын онытмас өчен әдипләрнең ул елларны чагылдырган китапларын укырга тәкъдим итте.
Шул ук көнне Арчаның икенче урта мәктәбендә узган парламент дәресендә ТР Дәүләт Советы депутаты Рауил Рәхмәтуллин да катнашты.
Розалия ЗИННӘТОВА