Предприятие куәте — “ГТО”да!

Предприятие куәте — “ГТО”да!
“АСПК” җәмгыяте коллективы Арча стадионы спорт залында ГТО нормаларын тапшырды. Афәрин, кирпеч җитештерүгә өзеклек китермичә җитәкчеләре Вазыйх Бикмуллин белән бергәләп физкультура–спорт комплексын тапшырырга килделәр.
Предприятиенең куәтен аның массакүләм чараларда күпләп катнашуыннан күрәсең. Ир–атлар чират торып гер күтәрә, турникта көчләрен сыный, хатын–кызлар тәбәнәк турникта күтәрелә... Җитәкчеләре белән сөйләшәм.
— Безнең коллективта 255 кеше эшли. Бүген күбебез килергә тырышты. Спорт әйбәт нәрсә, — дип, спортчыларча сүзне кыска тотты ул.
Герне вакытка кем күпме күтәрә ала — тренер Мөдәрис Мөхәммәдиев кычкырып санап барды. Ир–атлар күп булу сәбәпле герне парлап күтәрде. Яшьләрдән Рәис Маликов герне 86 тапкыр күтәрде, Айнур Сәлахиев — 88 тапкыр, Азат Әхмәтгалиев барысын да уздырды — 89га җитте!
— Иске Иябаштан,— дип сөйли Азат Әхмәтгалиев. — 29 яшь. “АСПК”да төзелеш бригадасында эшлим. Мәктәптә укыганда көрәш секциясенә йөрдем. Көрәштем. Өйдә үзем өчен генә физик күнегүләр ясыйм, гер күтәрәм.
Рәис Маликов армия хезмәтен үткән егет.
— Ерак Көнчыгышта шофер булып хезмәт иттем, — ди. — “АСПК”да пресс-лаучы булып эшлим. Түбән Атыдан. Мәктәптә укыганда гер күтәрә идек. Армиядә чыныгу үттек. Ә бүген хезмәттә чыныгабыз.
1951 елгы карьер җитәкчесе булып эшләүче Наил Гыймадиев, сөбханалла, герне 56 тапкыр күтәрде. Аның “ЗУЭС”та эшләүче энесе Ринат Гыймадиев турында 55 яшьтә герне 56 тапкыр күтәрде, дип язып чыккан идек.
— Энекәштән калышасы килмәде, — дип шаярта Наил. — Армиядән кайтканга 43 ел. Менә шуннан бирле беренче тапкыр гер күтәрәм. Армиядә спорт бик көчле куелган иде. Взвод командиры Куликов үзе нәрсә эшли безгә шуны эшләтте. Без заманында ГТО нормаларын тапшырган буын. Хәзер аны яңадан кайтарып дөрес эшләделәр. Коллективның шулай спорт киемнәреннән бергәләп шау–гөр килеп, сәламәтлекләрен, көчләрен сынавы бик күңелле. Бу үзенә күрә яшьлеккә кайту да. Үзем физик күнегүләрне көн саен ясыйм. Оныкларымны да ияртәм. Идәннән 25–30 тапкыр күтәреләм. Минем электән бил авырта. Бүген 12 төрле күнегү ясыйм, файдасы тия. Кызыксынган кешегә алар Интернетта бар.
Слесарь булып эшләүче, 41 яшьлек Рәдис Вәлиев герне 80 тапкыр күтәрде. Бу спорт төрен ул, тәртибен белеп, җайлы башкарды.
— Заманында бокска йөрдем, — дип сөйли. — Гәүдәне, сәламәтлекне һәрдаим кайгыртып торырга кирәк. ГТО үзеңә бәя бирү өчен бик әйбәт. Аңа җитди карарга кирәк.
Хатын–кызлар тәбәнәк турник тирәсендә мәш килә. Кем күпме күтәрелә ала. Бу спорт төре карап торышка ансат кебек тоелса да, үзең башкара башласаң, көч–куәт кирәклегенә төшенәсең. Техник хезмәткәр булып эшләүче, 46 яшьлек Кәүсәрия Фәйзуллинага сокланып карап тордым. 25 тапкыр күтәрелде! Норманы арттырып үтәде.
— Әле тагын күтәрелә ала идем, — дип елмая Кәүсәрия. — Спорт белән махсус шөгыльләнгән юк. Идән юу, бинаны җыештыру хәрәкәтне, көчне таләп итә торган эшләр. Шуңадыр, бәлки, гәүдәгә җиңел, хәрәкәтчәнмен. “АСПК”да без, туганнар, 10лап кеше эшлибез: үзем, кызым, улым, киявем, апай, аның кияве...
40–49 яшьлекләр арасында хисапчы булып эшләүче Айсылу Ситдыйкова да тәбәнәк турникта җиңел күтәрелде. Гомумән алганда, “АСПК” җәмгыяте коллективы ГТО нормаларын әйбәт тапшырды. Арада спортка якынаючылар булыр әле. Тиздән ГТОның кышкы төрләре башланачак.
Румия НАДРШИНА