Дус һәм тату яшик

Дус һәм тату яшик
Арча почта бүлекчәсендә үткәрелгән Абунәчеләр көне һәрчак үзе бер бәйрәм төсен ала. 25 ноябрьдә уздырылганында да почта хезмәткәрләре тырышкан. Килүчеләрне ишектән үк ачык чырай белән каршы алалар, ярдәм күрсәтергә әзер торалар. Әллә каян яңгырап торган музыка тавышы гына түгел, кызларның ягымлы карашлары, тәмле сүзләре дә кешеләрне бина эченә тарта. Ә анда кергәч, язылмый чыгып китеп тә булмый.
Татарстанда басылган газета һәм журнал редакцияләреннән киләләр.
“Сөембикә”леләр дә безнең данлы Арча ягын үз итә. Бер генә Абунәче көнен калдырмый. Бүләкләрен дә алып килә.
Шулай ук “Акчарлак”, “Казанские ведомости”, “Шәһри Казан” республика газеталары вәкилләре дә ерак юлны якын итеп Арчага Абунәче көненә (бүләкләр белән) кайтуны кулай күрә. Аларны безнең якта яратып алдыралар.
Район газетасы да күпләрнең яраткан гына түгел, ә өстәл газетасы булып тора. Ничек шунда яшәп, үз районың вакыйгалары белән танышып бармаска мөмкин? “Хәбәрчеләр хатларын күбрәк бастырыгыз”, — диделәр. Хатлар бите атна саен җомга көнне чыгып бара. Языгыз, газетаны алдырыгыз, безнең белән бергә булыгыз. Без сезне хөрмәт итәбез, газета укучыларыбыз. Район газетасына язылыгыз. Вакыйгалар эчендә кайнагыз.
Бу хат ташучылар өчен дә кызу урак өстенә тиң. Аны тагын да кызулатып, “ТАТМЕДИА” акционерлык җәмгыяте, үзенең филиаллары белән берлектә, хат ташучылар һәм почта элемтәсе бүлекчәләре арасында бәйге игълан иткән иде. Димәк, аңа нәтиҗә чыгарыр вакыт та ерак түгел.
Бәйгенең тәртибе белән бер таныштырган идек инде. Кабат исегезгә төшерергә булдык. Беренче чиратта, үзебездә “Арча хәбәрләре”нә яздыру буенча бәйге үткәрелә. Җиңүче язылучылар саныннан түгел, ә үзләре хезмәт күрсәткән хуҗалыклар санына карата күпме кеше язылудан чыгып билгеләнә. Соңыннан без районда җиңү яулаган бер яки ике хат ташучы һәм бер почта бүлек-чәсе турында мәгълүматны “Татмедиа” акционерлык җәмгыятенә юллыйбыз. Аларга “Иң яхшы шәһәр хат ташучысы”, “Кече шәһәрләрнең иң яхшы хат ташучысы” (моңа безнең Арча районы да керә), “Иң яхшы авыл хат ташучысы” (республиканың барлык районнары авыллары, бистәләрендә эш-ләүче почта бүлекчәләре, поч-тамтлары хезмәткәрләре керә) номинацияләре буенча иң яхшы күрсәткечкә ия булган почта хезмәткәре, “Иң яхшы почта бүлекчәсе” номинациясе буенча иң күп газета–журналларга яздырткан почта бүлек-чәсе керә.
Шуны онытмаска кирәк, монда сүз “ТАТМЕДИА” акционерлык җәмгыятенең барлык басмалары турында бара. Бүләкләре дә зурдан: иң яхшы хезмәткәргә 34483, иң яхшы почта бүлекчәсенә 50000 сум күләмендә акчалата бүләк бирелә (анысын почта бүлекчәсе җитәкчесе үзе теләгәнчә куллана ала).
Әмма игътибарга лаек бер шарты бар: “ТАТМЕДИА” акционерлык җәмгыяте газета–журналларына язылу абонементлары үсеше 2014 елның беренче яртыеллыгы белән чагыштырганда 5 проценттан да ким булмаска тиеш. Бу шарт үтәлмәгән очракта, хат ташучы яки почта бүлекчәсе бәйгедә катнаша алмый.
Күргәнегезчә, бүләкләр кызыгырлык. Хезмәте дә башкара алмаслык түгел. Катнашыгыз, җиңүләр яулагыз. Уңышлар сезгә.
Гөлсинә ЗӘКИЕВА