Иптәшләр арасында күңелле

Иптәшләр арасында күңелле
Арча стадионы спорт залында РЭС коллективы ГТО нормаларын тапшырды. Ир–егетләр гер күтәрде, турникта тартылды, хатын–кызлар тәбәнәк турникта күтәрелде...
Хатын–кызлар ГТО нормаларын арттырып үтәде.
— Спорт белән шөгыльләнәсезме? Арагызда спортчылар бармы? — дип сорыйм үзләреннән.
— Бар — Наташа Паранина, — диде алар.
— Безнең волейболчы егетләребез дә бар: Рафаэль Сабиров, Рөстәм Салихов... Әнә, үзләре дә!
Егетләр белән танышып, сөйләшеп киттек.
— ГТОны торгызырга күптән кирәк иде, — ди Рафаэль Сабиров. — Коллектив өчен әһәмиятле ул.
Егетләрнең икесе дә югары белемле энергетиклар. 26 яшьлек Рөстәм Салихов:
— Арчаның 1нче мәктәбен тәмамладым, — дип сөйли. — Мәктәп елларыннан спортта. Волейбол, футбол уйныйбыз. Предприятие данын яклаучы спортчыларыбыз бар. Алар: Рәнис Шәйхетдинов, Наташа Паранина, Рәдис Әүһәдиев, Фәрит Габдрахманов, Марат Тухтаров, Илнар Зәйнуллин...
28 яшьлек электр монтеры булып эшләүче Рөстәм Төхвәтуллин —көрәшче. Ир–егетләр арасында герне иң күп күтәрүчеләрнең берсе ул булды — 80 тапкыр. Моннан берничә ай элек машина белән авариягә эләгеп, сәламәтлегенә зыян килсә дә, ГТО тапшырырга килгән.
— Кул пеште. 3 ай авырганнан соң менә бүген үземне сынап карарга булдым, — ди. — Герне авырткан кул белән 20 тапкыр күтәрдем, 60ын — сәламәт кул белән. Булдыра алам икән диеп сөендем.
Армиядә Төньяк Кавказда шофер–электрчы булып хезмәт иткән ул. Бүген читтән торып югары белемле энергитиклыкка укый. Наласада яши. 5нче сыйныфтан көрәш белән шөгыльләнә.
50 яшьтән узган, электр монтеры Илһам Сабиров Ашытбаштан килеп эшли. Яше барса да, ул гер күтәрүдә норманы берничә тапкырга арттырып үтәде.
— Тәмәке тартмыйм, — ди. — Тик тора алмыйм. Гел хәрәкәттә. Токарьлыкны да башкарам. ГТО тапшырырга теләп килдем. ГТО — ул үзеңне сынап карау. Бергәләп нормаларны тапшыру иптәшләр арасында да күңелле.
...Контролер булып эшләүче Наташа Паранина җомга көнне ГТО нормаларын тапшырса, дүшәмбедән “Балкыш” шифаханәсендә ял итә, сәламәтлеген ныгыта. Чаңгычыга тормыш мәшәкатьләреннән азга гына булса да арынып тору файдага гына булачак.
— Өч бала әнисе мин, — дип сөйли ул. — Олысы 11 сыйныфта укый. Өчесе дә спортчы. Апайкина–Гарь авылында яшибез. Төрле якта урман. Лесхоз мәктәбендә укыганда ук спорт белән шөгыльләндем. 37 яшькә җитсәм дә, чаңгыны һәм йөзүне ташламыйм. Алардан мин күңел күтәренкелеге алам. Ә күңел күтәренкелеге бигрәк тә балаларга, гомумән, тормыш итәргә уңай тәэсир итә. Уңышлар да бар. Узган ел Идел буе электр челтәре коллективларында эш-ләүче чаңгычылар арасында беренче урынны алдым.
РЭС коллективы спортчыларына уңышлар телибез! Алар сафын ГТО тагын да арттырса иде. Аның көче дә шунда.
Румия НАДРШИНА