Туган якта сезне көтәләр!

Туган якта сезне көтәләр!
Казандагы югары уку йортларында хәзерге вакытта безнең районнан 800дән артык егет һәм кыз белем ала. Авыл хуҗалыгы һәм Ветеринария академияләрендә иң күп укучылар Арча районыннан икән. Безнең зур байлыгыбыз, киләчәккә өметебез алар.
22 ноябрьдә район Мәдәният йортында үткәрелгән студент яшьләре форумында менә шул матур киләчәк турында сүз барды.
— Без сезнең белән очрашуга бик шатбыз, — диде муниципаль район башкарма комитеты җитәкчесе Илшат Нуриев. — Безнең киләчәгебез, залда утыручылар, сезгә бәйле. Районыбызның бай тарихы бар, ул бик күп күренекле шәхесләр биргән. Ра-йонның бүгенге көне дә матур, киләчәге якты, сезгә бүген болар турында тулырак сөйләрләр. Сезнең төп бурычыгыз – белемнәрне ныклап үзләштерү, алган белемнәр белән республикабыз, район данын тагын да югарырак дәрәҗәгә күтәрү.
Район мәгариф идарәсе җитәкчесе Руслан Низамов мәгариф өлкәсендә зур үзгәрешләр баруы турында сөйләде. Уку йортларының матди–техник базасы нык, педагоглар заманча технологияләр кулланып эшли, лаеклы хезмәт хакы алалар, грант-лар алучылар саны арта. Шул ук вакытта районга яхшы белгечләр, физика, химия, математика, информатика укытучылары кирәк. Районда торак социаль ипотека программасы уңышлы тормышка ашырыла.
Район авыл хуҗалыгы һәм азык–төлек идарәсе җитәкчесе Айдар Габбасов республикада иң дәрәҗәле урыннарда авыл хуҗалыгы югары уку йортларын тәмамлаучылар эшләвен билгеләп үтте. Безнең районда да егермедән артык Россиянең, Татарстанның атказанган авыл хуҗалыгы хезмәткәрләре бар. Бездә 40ар ел зоотехник, агроном, икътисадчы, хисапчы булып эшләүчеләр бар, алар үзләрен бик бәхетле хис итәләр.
Бүген авыл хуҗалыгы өлкәсендә дә югары технологияләр киң кулланыла, басуларда куәтле трактор һәм комбайннар эшли. Авыл хуҗалыгына да әзерлекле, белемле яшь белгечләр кирәк. Бездә алар өчен бөтен мөмкинлекләр тудырылган. Яшь белгечләр торак белән тәэмин ителә, грантлар бирелә. Фермерлык белән шөгыльләнергә теләүчеләр өчен дә юл ачык.
“Ватан” хуҗалыгының яшь зоотехнигы Рөстәм Хәбибуллин да (быел республикада икенче урынны алды) әнә шулар турында үтемле итеп сөйләде.
Арча муниципаль районының эшмәкәрләр берлеге җитәкчесе Назыйм Сибәгатов үз эшен башлап җибәрергә теләүчеләргә булышлык күрсәтергә әзер торуларын белдерде, мисаллар китерде.
Район үзәк хастаханәсенең баш табибы урынбасары Лилия Фәйзрахманова үзенең чыгышында сәла-мәтлек саклау өлкәсендәге уңышларны әйтеп үтте, районга педиатр, терапевт, гомуми практика табиблары кирәк, диде. Авылга кайткан белгечләргә федераль үзәктән 1 млн., республикадан 100 мең сум акча бирелә. Районда аларны алучы ике яшь белгеч бар инде.
Мәдәният өлкәсенә дә әзерлекле, яшь белгечләр бик кирәк.
— Диплом алгач, туры безгә кайтыгыз, — диде район мәдәният идарәсе җитәкчесе Илнур Котдусов. — Хезмәт хаклары да артып тора, яңа мәдәни–спорт үзәкләре ачыла.
Район яшьләр эшләре, спорт һәм туризм бүлеге җитәкчесе Зиннур Сәгыйтов физкультура академиясендә безнең районнан 6 гына студент укый, бу гына аз, диде. Арча районы спорт буенча да сынатмый, дөнья күләмендә җиңү яулаучы спортчыларыбыз да бар. Мөмкинлекләр тагын да зур, тиздән Боз сарае ачыла, спорт комплексы һ.б. эшли. Безгә тренерлар, спорт белгечләре бик кирәк.
Мәктәптә ныклы белем алу, үзеңне төрле яктан үстерүнең нинди әһәмияткә ия булуына Арчаның В.Ежков исемендәге 1нче, 3нче мәктәпләренең элекке укучылары, булачак архитекторлар Динә Мамаделиева, Миләүшә Гәрәева, Динара Галимуллина, Линар Мөхәммәтвәлиев, Айдар Насыйров чыгышларын тыңлагач, тагын бер тапкыр инанасың.
Алар мәктәптә укыганда ук рәсем ясарга яраталар. “Бердәм Россия” партиясенең җирле бүлекчәсе башкарма комитетына килеп үзләренең идеяләрен тәкъдим итәләр. Әнә шулай Борһанов урамындагы соры стеналар алар ясаган рәсемнәр белән яктырып китә. Сәнгать мәктәбендә осталыкларын арттырып, архитектура–төзелеш университетына укырга керәләр. Анда башкалардан активлыклары белән аерылып торалар, төрле конкурсларда, үз проектлары белән катнашып, җиңеп чыгалар.
Район башкарма комитеты җитәкчесенең беренче урынбасары районда мондый талантлы белгечләрнең киләчәктә бик тә кирәк булачагы турында сөйләде. Төзелешләр киң колач белән дәвам итә, 29 мең кешегә исәпләнгән “Алма бакчасы” дип аталган иярчен–шәһәр барлыкка киләчәк һ.б.
Студент яшьләр форумында үзебезнең районның сәнгать осталары матур чыгыш ясады. Һәр өлкәдә талантлар күп бездә!
Район башкарма комитеты җитәкчесе Илшат Нуриев әлеге очрашуның бик файдалы булуын билгеләп үтте, студентларга уңышлар теләде.
— Тырышып укыгыз, без сезне көтәбез! — диде ул.
Студентлар форумы резолюция кабул итте, Арча муниципаль районы һәм Арча шәһәре хакимияте каршында студентлар үзидарәсен үстерү буенча совет төзелде, аның бурычлары билгеләнде.
Ильяс ФӘТТАХОВ