Иманлы йорт

Иманлы йорт
Балага ана карынында 4 ай да 10 көнлек вакытта ике фәрештә җан өрә. Шул вакытта кешенең гомере, ризыгы язылып куя. Шурабашта яшәүче 7 бала әтисе, авыл мәчете имамы Газинур Һадиев шулай ди.
— Үзегезнең 4 балагыз янына тәрбиягә бишенче баланы алу өркетмәдеме? — дигән сорауга Газинур болай дип җавап бирде:
— Юк, өркетмәде. Баланың ризыгы ана карынында ук язылып куелган була.
— Бертуган сеңлемнең улы ул, — ди Газинурның тормыш иптәше Зөлфия. — Тумыштан алып үстердек. Бик зәгыйфь иде. Медиклар, кеше булмый бу, диделәр. Табибларга, менә күрерсез, 3 яшьтә җитәкләп сезнең янга алып киләм мин аны, дидем. 2 яшькә кадәр башын да күтәрә алмады, 3 яшькә кадәр йөрмәде дә. Куллары белән сөт шешәсен дә тота алмый иде. 6 айга кадәр имездем. Ул вакытта 1 яшь тә 3 айлык балам бар иде, әле аны имезә идем. 3 яшьтән чытыр чаба башлады. Хәзер 2нче сыйныфта укый.
— Зөлфиянең тырышлыгы бик зур булды, — ди Газинур. — Кәҗәләр тотабыз, кәҗә сөтенең дә файдасы булгандыр. Догалар белән өшкерүнең дә шифасы зур.
— Бала йөрәктә булды, файдасы тисен дип, бал кортларына кадәр чактырдым... — ди Зөлфия.
Гаиләдә тагын ике бала туа. Кечкенәсе Нәзиргә 1 яшь тә 8 ай. Исемнәре бигрәк матур: Язнур, Гөлнур, Таңсылу, Зөһрә, Азат, Зөләйха, Нәзир.
— Мондый матур исемнәрне каян таптыгыз, кем кушты? — дип сорыйм.
— Исемнәр китабы бар безнең, — ди Газинур. — Исемнең мәгънәсе булырга тиеш. Кече улымның исеме Нәзир “алдан күрүче” мәгънәсен аңлата.
— Нәзир нәкъ кайната инде, чуар йөрәкле булыр, бер дә йокысы юк, — ди улын сөеп Зөлфия. — 38 яшьтә алып кайттым үзен. Балалар да нишләргә белми энекәшләре өчен, мәктәптән сагынып кайтабыз, диләр.
Өстәлдә урман сый–нигъмәтләре. Бүлмәгә гөмбә, каен җиләгенең хуш исе таралган.
— Урманны бик яратам, — ди Зөлфия. — Төрле якта урман безнең. Быел 100 литр каен җиләге җыйдым. Блендер белән болгатып, шикәр комы кушам да, суыткычка куям. Гөмбәне дә тоз, тәмләткечләр салып кайнатам да, суыткычка урнаштырам. Бозыла дип куркасы юк.
Зур майонез чиләгендәге каен җиләге суыткычта хәтта катмаган да. Бар ризык үзләренеке: ите, сөте, каймагы, бәрәңгесе, яшелчәсе...
— Балаларның тәртипле булып үссеннәр өчен буш вакытлары калырга тиеш түгел, — ди Газинур. — Безнекеләр йорт арасында булыша, дәрес әзерли.
Олысы — Язнур Әлмәттә мәдрәсәдә укый. Калганнары мәктәптә, кечесе өйдә.
Зөлфия Арча педагогика көллиятен тәмамлый. Газинур училищеда электр белән эретеп ябыштыручы һөнәрен үзләштерә. Казан авыл хуҗалыгы институтында белем ала. Колхозда тракторчы, электр белән эретеп ябыштыручы булып хезмәт итә. Мәктәптә эшли. Аннан 25 гектар пай җире алып, үзенең фермер хуҗалыгын оештырып җибәрә. Печән үстерәләр. Артыгын саталар. Тулы комп-лект белән бер тракторлары бар. Газинурның әтисе Габделнур гомере буе урманчылыкта эшләгән, авыл мәчетендә имам булып торган. 85 яшендә вафат. Бүген әтисе эшен Газинур дәвам итә — мәчеттә имам. Зөлфия дә намазга баскан. Балаларын да иманлы итеп тәрбияләргә тырышалар.
...Аларның ике катлы йорты әллә каян күренеп тора. Газинур үзе проектын төзеп, йортны төзүчеләр белән бергә күтәргән. Әле эше бетмәгән. Идәннәренә кадәр җылытыла. Су кергән, канализация эшләнгән. Автомат кер юу машинасы келтер–келтер эшләп утыра. Душ бүлмәсе, мунча да шунда гына. Өй җылы. Балалар мәктәптән кайтуга аш пешкән. Иманлы йортта үзенә бертөрле җанга рәхәт.
Румия НАДРШИНА