Башкару дисциплинасы түбән

Башкару дисциплинасы түбән
27 ноябрьдә Арча муниципаль район башлыгы урынбасары, муниципаль район башлыгы вазыйфаларын башкаручы Любовь Осина авыл җирлекләре башлыклары белән киңәшмә үткәрде.
— Яңасала, Кәче, Урта Аты авыл җирлекләре секретарьлары, программалар булдыруга, укытып кайтаруга карамастан, һаман да документларның электрон вариантын булдыра алмыйлар, — диде ул. — Дүртәр ай буе терлек саны яңартылмаган килеш, хуҗалык кенәгәләренең күптән электрон вариантын булдырырга кирәк бит инде.
Үз вазыйфаларын үти алмаган яки үтәргә теләмәгән кеше андый урында утыра алмый. Сайтны да даими яңартып барырга. Торак–коммуналь хезмәтләргә электрон рәвештә түләүнең өстенлеген халыкка яхшылап аңлатырга кирәк.
Мәчетләр урнашкан җирләрне рәсмиләштерү, зиратларны тәртипкә китерү — барысы да авыл җирлекләре җаваплылыгында.
— Сезнең территориядәге бар нәрсә сезнең җаваплылыкта, — диде Любовь Осина. — Себер түләмәсе үләт базлары да безгә кагылмый дип йөрмәгез. Ниндидер җитешсезлек бар икән — хуҗалык җитәкчесенә мөрәҗәгать итегез. Зиратлар буенча ничә еллар сөйләшәбез, һаман тәртип сала алмыйсыз.
Авыл җирлекләре территория-ләрендәге зиратларның торышы турында район башкарма комитетының эшләр башкаручысы Рамил Гарифҗанов сөйләде.
— Исәннәрнең кадерен бел, үлгәннәрнең каберен бел, дигән гыйбарәне еш кабатлыйбыз, — диде ул. — Үлгәннәрнең каберен бел дигәндә, билгеле, зиратларны карап, чистартып, тиешле тәртиптә тоту кирәклеге дә искәртелә. Шуны истә тотып, 24–26 ноябрь көннәрендә авыллардагы зиратларның торышын карап чыктык.
Күп авылларда өмәләр оештырылган, ләкин кайбер зиратларның зурайтылган өлешләрендә үләннәр чабылмаган.
Кайбер авыл зиратларының торышы күп тәнкыйтьләнүгә карамастан, әлегә үзгәрешләр юк.
Зиратлар тәртиптә булган авылларда бу эш күп еллар дәвамында эзлекле алып барыла.
Җыештырылмаган, тигәнәк баскан зиратларны күрүе күңелсез.
Һәр зиратта мәгълүматлар стенды, каберлекләрнең план–схемалары, аларны исәпкә алу журналлары булырга тиеш. Рамил Га- рифҗанов бу уңайдан Ашабаш авылы өчен эшләнгән журналны үрнәк итеп китерде.
— 2011 елда без боларның барысы да исәпкә алынган карар кабул иткән идек, — диде Любовь Осина. — Арча шәһәре зираты мисалында моның ничек эшләнергә тиешлеген дә күрсәттек. Ник карарны үтәмисез? Без бу турыда онытмадык, исегезгә төшереп торачакбыз, кайберләрегез белән аерым сөйләшергә туры килер.
Районның финанс–бюджет палатасы рәисе авыл җирлекләренең бюджеты үтәлешенә анализ ясады.
Ильяс СӘХӘПОВ