Спортчы начар була алмый

Спортчы начар була алмый
Курса–Почмак мәктәбе базасында “Ак барс” агрокомплексы” ширкәте һәм Сеҗе авыл җирлеге белгечләре ГТО нормаларын тапшырды. Курса–Почмак мәктәбе физкультура укытучысы, агрокомплекста спорт эшләре буенча җаваплы Хәлил Хәсәнов башта командага “Равняйсь, смирно, вольно!» дип әмер бирде, аннан җитәкче Шәйдулла Сәлаховка «Команда ГТО нормаларын тапшырырга әзер!” дип рапорт тапшырды.
Монда да үзенә бертөрле тәртип булырга тиеш. Бу җитәкчедән тора. Шәйдулла Сәлахов үзе башыннан ахырына кадәр спорт киемнәреннән ГТО тапшыручылар арасында булды. Җитәкченең катнашуы теләсә кайсы чараның дәрәҗәсен, коллективның кәефен күтәрә. Кроссны да ул башлап җибәрде.
— Кешенең сәламәтлеге дару эчү, зарлану түгел, ә хәрәкәт! — ди Шәйдулла Имамович. — Электән без бүлекчәләр арасында спорт ярышлары оештырабыз. Хәтта җиңүче командага үгезгә кадәр биргән булды! Спорт уеннарын туктатмыйбыз. Узган елгы спорт нәтиҗәләре буенча районда беренче урын безгә бирелде. Спорт белән шөгыльләнгән кеше начар була алмый. Аракы эчми, тәмәке тартмый. Агрокомплекска кул көрәше, татарча көрәш буенча тренерлар алдык. Спорт эшләре буенча җаваплы кеше билгеләдек. Арада спортка сәләтлеләр күп, аларны ачыкларга кирәк. Алдан әзерләнгәч, район шашка ярышында безнең баш хисапчы кыз Гөлназ Зарипова 1нче урынны алды!
Хатын–кызлар арасында 40 яшьтән узганнар кроссында Халидә Әхмәдиеваның үзеннән яшьләрне әллә кайда калдырып йөгерүенә хәйраннар калдык. Ул безгә Гөберчәк мәдәният йорты җитәкчесе буларак күңелле чаралар оештыруы белән билгеле. Иң беренче булып финиш биргәч, котларга, хәлен белергә ашыктым.
— Гел йөгерәм инде мин, — ди ул елмаеп. — Чөмә–Елгада яшим. Машина булмаганда Гөберчәккә кадәр 7 километр араны йөгереп үтәм. ГТО тапшырырга да теләп килдем. Кеше арасында үзе бер күңелле.
18–40 яшьтәге хатын–кызлар арасындагы кросста хуҗалыкта юрист булып эшләүче Зилә Сафиуллина беренче килде. Казанда туып–үскән кыз.
— Спортны яратам, — ди. — Тик менә балалар кечерәк, берсенә — 2, икенчесенә 5 яшь. Спорт белән шөгыльләнергә вакыт юк. Вакыт тапсам, чаңгыны сайлар идем.
58 яшьлек, гараж мөдире булып эшләүче Әгъләмҗан Әхмәтҗанов әкрен генә тиешле араны йөгереп үтте. Сөбханалла, бу яшьтә һәркем ерак арага йөгерә алмый.
— Компьютер белән бозылган заманда үсмәдек без, — дип сөйли Әгъләмҗан. — Яшьтән чаңгыны яраттым. Үрнәктә укыганда 1нче урыннарны ала идем. Безнең мәктәп ярышларда призлы урыннарны алмый калмый иде. Аяктан чаңгы төшмәде. Хәзер Мөрәледән Сеҗегә 3 километр йөреп эшлим.
27 яшьлек баш агроном, яңа гына республиканың агрономнар ярышында җиңеп кайткан Рөстәм Мөхәммәдиев гәүдәле егет. Ныклыгы, хәрәкәтчәнлеге ягыннан спортчы икәнен чамалап була. 3 минут эчендә герне 82 тапкыр күтәрде.
— Курса–Почмак мәктәбендә укыганда ук спорт белән шөгыльләндем, —дип сөйли. — Хәзер дә ташлаган юк. Тренер Рәзил Нәбиуллинга көрәшкә, Арчага бассейнга йөрим. Ярышларда гер күтәрәбез, аркан тартабыз, кул көрәшендә катнашабыз... Көрәшеп, сабантуйларда урын алабыз, аркан тартуда 7 ел рәттән 1нче урын бездә булды, быел гына 2нче урынга калдык.
Шофер булып эшләүче Әнис Гыйбадуллин:
— Лаеш авыл хуҗалыгы техникумында спорт бик каты куелган иде, — дип искә ала. — Хәзер менә хоккей уйныйбыз. Авыллар арасында 6 хоккей командасы бар.
Соңыннан ГТО тапшыручылар Мактау грамоталары, медальләр белән бүләкләнде.
Румия НАДРШИНА