Солдат әниләренә — Рәхмәт хатлары

Солдат әниләренә — Рәхмәт хатлары
Татарстан Республикасы хәрби комиссариатының Арча һәм Әтнә районнары буенча бүлеге җитәкчесе, подполковник Алмаз Борһанов солдат аналарына үз исеменнән һәм часть командирыннан килгән Рәхмәт хатларын тапшырды.
— Армиядә хезмәт иткән һәр солдат белән элемтәдә торабыз, — дип сөйләде Алмаз Борһанов. — Һәркайсына папкалар әзерләдек, исемлекләрен булдырдык. Командирларына солдатларның ничек хезмәт итүләрен сорап хат язабыз. Телекүпер оештыруларын сорыйбыз. Район башкарма комитеты белән берлектә туган көннәре белән котлап открыткалар җибәрәбез. Хөрмәтле аналар, армия хезмәтенә яраклы, туган илне сакларга әзер, сау–сәламәт, тәртипле балалар тәрбияләп үстергәнегез өчен сезгә зур рәхмәт.
Подполковник әниләргә, бәйрәм белән котлап, Рәхмәт хатларын тапшырды. Дулкынландыргыч мизгелләр иде ул. Газиз балаңны мактаудан да зуррак бүләк юктыр, мөгаен.
Соңыннан бәхетле әниләр белән сөйләштем.
— 39 яшемдә таптым мин улымны, — дип сөйли Самара өлкәсендә хезмәт итүче Замирның әнисе Зөлфия Насыйбуллина. — Бердәнбер балам ул минем. Ялгыз үстердем. Армиягә барам, диде. Каршы килмәдем.
Зөлфия ханым улы турында яратып, горурланып сөйләде. Фотокарточкаларын да үзеннән калдырмый икән. Бик матур егет.
Каенсардан Зөлфия Сафина ире Марсель белән килгән.
— Өч улыбыз бар, — дип сөйли. — Өчесе дә Арча агросәнәгать көллиятен тәмамлады. Олысы Руслан Мәскәү өлкәсендә хезмәт итеп кайтты. Хәзер менә Марат Киров өлкәсендә армия хезмәте үтә. Руслан армиядән әнинең кадерен белергә, үз–үзен ир–егетләрчә тотарга өйрәнеп кайтты. Армиягә барырга кирәк, ди.
Марат Арчадан Зиннур Галиев белән хезмәт итә.
— Шундый дус рота ул, — дип исләре китеп сөйли Надежда Галиева.
Өч бала әнисе, Үрнәктән Мөнирә Һадиева:
— Самара өлкәсенә Арчадан 4 егет китте, 4се дә бергә хезмәт итә, — ди куанып. — Хәрби ант кабул иткәндә барган идек, бер якта әти–әниләр елап тора, икенче якта, козырек астына күзләрен яшереп, безнекеләр моңая... Улым Инсаф янына икенче барганда кая ул елау, тәмам солдат булып өлгергәннәр, ныгыганнар, елмаеп торалар. Сөйләшүләре үк икенче, культура да башка.
Мөндештән Гөлфирә Гыйльметдинова да өч бала әнисе. Улы Динар төзелеш көллиятен тәмамлап, Самара өлкәсендә хезмәт итә. Алар, берничә әни, солдат улларының ничек хезмәт итүе турында тәэсирләнеп сөйләде.
Өч малай әнисе Илһамия Садыйкова Алан авылыннан.
— Олысы Айвар армиядән өченче көн генә кайтты, — ди. — Менә хәзер Азат китә. Әнә, әтиләре Фәниснең фотосы бу бүлмәдә эленеп тора. Әфганстанда хезмәт итте ул. Үзем фермада бозаулар карыйм. Аллага шөкер, балаларыбыз сау–сәламәт, дип куанабыз. Барсыннар, армия хезмәтен үтеп кайтсыннар. Олысы армиядән төпле булып кайтты.
Лилия Нигъмәтҗанова Апаз авылыннан. Улы Илмир Амур өлкәсендә разведчик булып хезмәт итә.
— Кытай чигендә, бик ерак җирдә, — ди өч бала әнисе Лилия ханым. — Поезд белән 6 көн бардылар. Барып күргән юк, үзе әйбәт, ди.
Һәм тагын Югары Атыдан Фәридә Галимҗанова (улы Илназ), Арчадан Фирая Мифтахетдинова (Азат), Наилә Гыйльметдинова (Артем), Иске Кырлайдан Гөлсинә Зарипова (Рәнис), Урта Сәрдәдән Рәисә Җиһаншина ( Илнур һәм Рәшит) уллары өчен горурлану хисләре кичерде. Барысы 12 ана Рәхмәт хатлары алды.
Румия НАДРШИНА