Хатын-кызның матурлыгы әни булуда

Хатын-кызның матурлыгы әни булуда
Әниләр көнен Арча Мәдәният йортында зурлап билгеләп үттеләр. Халыкны социаль яклау бүлеге һәм мәдәният идарәсе тарафыннан оештырылган очрашулар белән баетылган “Җиһанга да илһам бирә ала аналарның изге йөрәге” дигән искиткеч матур, җылы, якты бәйрәм булды ул.
— Бала үстерү ул — шатлык кына түгел, зур җаваплылык, фидакарь хезмәт тә. Әни авырлыклардан саклый, хаталардан йолып кала, безнең өчен ут йотып тора. Балаларыбыз безгә караганда да бәхетлерәк, тормышлары уңышлырак, игелекле, рәхмәтле булсыннар иде, — диде район башлыгы урынбасары Любовь Осина аналарны бәй-рәмнәре белән котлап.
“Ана капиталы” сертификатларын бәйрәм рухында бирү матур традициягә әверелде. Бу юлы аны Любовь Осина Хәйруллиннар, Мөхәммәтгалиевлар, Кәримовлар, Шәмсетдиновлар гаиләләренә тапшырды. Сәхнәгә аналар ирләре һәм балалары белән чыкты.
Бүләкләр моның белән генә бетмәде. ТР хәрби комиссариатының Арча һәм Әтнә районнары буенча бүлегенең гражданнарны хәрби хезмәткә хәзерләү һәм чакыру буенча бүлек җи-тәкчесе Елена Миңнемуллинага бу өлкәдәге уңышлары өчен үзәк хәрби округ гаскәрләре командующие исеменнән Мактау грамотасы тапшырылды.
Хатын–кызларыбызны бәй-рәмнең кунагы Татарстанның атказанган сәнгать эшлеклесе, юмор остасы, прозаик Камил Кәримов та күңелле итеп котлады.
— Ирләрегез “ояда утырган ана”, ягъни сезнең, балаларының әниләре янында гына булсын дисәгез, безнең турыда да онытмагыз. Без дә сезнең назга мохтаҗ, — диде ул уены–чыны белән.
Очрашулар, танышулар, аралашулар... Менә шулай гомер күрмәгән, әмма искиткеч яхшы, изге затлар турында беләсең. Татарстанның атказанган мәдәният хезмәткәре Расих Галимҗанов башкарган җыр Шурабаштан күп балалы Һадиевларга багышланды. Залдагылар экран аша алар тормышының кайбер мизгелләре белән дә таныша алды. Югары Курсадан икесенә дә бер үк көнне 85 яшь тулган, 60 ел тигез матур гомер иткән, күп бала тәрбияләп үстергән Мөкәррәмә һәм Рәфкать Галиәхмәтовлар һәркемдә соклану хисе уятты. Мөкәррәмә апа биеп тә җибәргәч, зал гөрләтеп кул чапты. Соңыннан балалары аларга яраткан җырларын бүләк итте.
Түбән Пошалымнан биш бала тәрбияләүче Ильвира һәм Илнар Зиннәтуллиннар белән дә башта видеофильм аша таныштык. Яшьләр генә булсалар да, нинди изге күңелле кешеләр. Өч балалары өстенә тагын ике сабыйны балалар йортыннан алып, аларга ата–ана назы биргәннәр. Тулы гаиләдә тәрбияләнү бала өчен бик зур бәхет ул. Арча станциясендә яшәүче Гөлира һәм Фидаил Шәяхмәтовларны шәһәрдә белмәгән кеше юктыр. Алар да ике балалары янына тәрбиягә тагын ике бала алганнар. Аларга карата мөнәсәбәтләренә, ничек тәрбия бирүләренә исең китәрлек. Камил белән Камилә әти-әниләре өчен үлеп торалар. “Мин генерал булам”, дип хыялланган Камил хәзер кадетлар мәктәбендә укый, Камиләсе сәхнәдән төшми, биюче. Әтиләре Фидаил дә ничек матур җырлый икән. “Әле тагын бик күп еллар бергә, яшиселәр булса иде тагын”, — дип җырлады ул хатыны һәм кызына наз тулы күзләре белән карап.
Әфганстан сугышында катнашып, “Батырлык өчен” медаленә лаек булган, исән–сау кайтып та сәла-мәтлегенә нык зыян килү сәбәпле, вафат булган Рәдифнең әнисе Наҗия Ишбаева, “Булгария” теплоходында балалары батып үлеп, хәзер оныкларын тәрбияләүче олы йөрәкле, нык характерлы Маргарита Ефремова, шулай ук улы белән киленен югалткан, ике оныгы ятим калган Сания Мифтахованы да сәхнәгә чакырдылар ул көнне. Авырлыкларга түзә алмыйча таш та ярыла, ә ана йөрәге барына да түзә. Тик авыр хәсрәтләр аның йөрәгеннән мәңгегә китми. Ә тормыш дәвам итә. Ул балалар хакына яши. Бу минутларда сәхнәдәге-ләрнең генә түгел, залдагыларның да күзләрендә яшь иде.
Бераз киеренкелекне таратып, сәхнәгә “Башваткыч” тапшыруында машина откан Яңа Кишет китапханәчесе Надия Йосыпова гаиләсе чыкты. Ул да өч бала анасы. 27 ел гомерен яраткан хезмәтенә багышлаган. Чыннан да, бу бүләккә, мактауга лаек кеше.
Бәйрәм әнә шундый кызыклы һәм эчтәлекле булды. Очрашу концерт номерлары белән үрелеп барды. Һәр чыгыш ул көнне залдагылар өчен генә түгел, ә барлык аналарга багышланды.
Гөлсинә ЗӘКИЕВА