Алай да чишмәләр бар әле...

Алай да чишмәләр бар әле...
Табигатьнең могҗизасы ул, чишмәләр. Кәче авыл җирлеге башлыгы Тәлгать Закиров белән Кәче авылындагы Зур чишмә янында басып торабыз.
— Чишмәләргә бай безнең авыл, — ди ул. — Менә монысы бөтен авылны су белән тәэмин итә.
Шушы җирлектән район Советы депутаты итеп сайланган Рамил Әхмәтгалиев төрле мәсьәләләрне хәл иткәндә булышып тора. Быел әлеге чишмәне төзекләндерергә булганнар, кирәкле бөтен материалны биргән. Бертуган Рәис, Илфат (ул авыл зираты өчен дә җаваплы), Илгиз Нәзировлар чишмәне һәркем сокланырлык хәлгә китергәннәр, плитәләр җәелгән, койма белән әйләндерелгән. Илгиз Бөгелмәдә яши, шушы изге эшне башкару өчен махсус ял алып кайткан.
Рамил Сәйфуллин капканы бик матурлап эшләгән, Данис Мифтахов кирәкле материалларны ташып торган.
Быел Кәче зираты коймасын яңартуда да шушы егетләр зур өлеш керткән, билгеле, монда бөтен авыл катнашкан.
Сүзебез чишмәләр турында бит әле.
— Бервакыт Бирәзә тау битендә Рамил белән Эмильне очраттым, — дип сөйли Наласа авыл җирлеге башлыгы Илфира Шакирова. — Нишләп йөрисез, дим. “Чишмәләрне карап йөрүебез, — ди Рамил. — Берәр чишмәне төзекләндереп куярбыз, дигән идек”.
Газета укучыларыбызны таныштырып үтик — Рамил Гарипов Урта Бирәзә авылында туып–үскән, заманында районның танылган спортчысы иде. Эмиль аның улы, хәзерге вакытта “Ак Барс” хоккей командасының капкачысы. Яшьләр арасында дөнья чемпионы булып кайткач, без аның белән Урта Бирәзәдә очрашкан, бу турыда газетада язган идек.
Быел менә Урта Бирәзәдә ике чишмә тау астында тирә–якка ямь биреп тора башлады. Халык аларның берсен — “Рамил чишмәсе”, икенчесен “Эмиль чишмәсе” дип йөртә. Сулары бик тәмле, ярты Арча шуннан ташый диләр.
Урта Бирәзәнең бер чишмәсеннән су ташып азык комбинатында лимонад ясаулары турында да шунда ишеттек.
Яраткан язучыбыз Мө-хәммәт Мәһдиевнең “Торналар төшкән җирдә” әсәрендәге геройларның берсе Сафый абый чишмәне карап тора, өстен яба, тамагын, әйләнә–тирәсен чүп–чардан чистарта. Үзе караган чишмәнең кешеләргә бик кирәкле булуын күргән саен бәхетле тавыш белән: “Алай да чишмә бар әле!” — ди.
Һәммәбезгә дә шундый бәхетне тоеп яшәргә язсын!
Ильяс ФӘТТАХОВ