Белоруссиядән соң тагын җиңү!

Белоруссиядән соң тагын җиңү!
“Арча” спорт мәктәбендә эшләүче хатын–кыз баскетболчылар тренеры Җәүдәт Хәсәнов редакциягә шатлыклы хәбәр алып килде:
— Питрәчтән җиңү белән кайттык!
Әле кайчан гына Белоруссиядән 3нче урынны алып, Россия данын яклап кайткан иделәр.
— Димәк, сез Белоруссия-дән шәп тәҗрибә туплап кайткансыз? — дип сорыйм.
— Белоруссия кызлары бик көчле уйный. Алардан, чыннан да, күп нәрсәгә өйрәндек, — дип җавап бирде Җәүдәт Хәсәнов. — Безнең кызларны хәзер бер урында тотып булмый. Питрәчтә командалар бик шома уйнады. Әмма безнекеләрнең уйнау техникасы һәм тактикасы яхшырак.
Питрәчтәге ярышларда 10 кыз катнашты. Алар: Арчаның 1нче мәктәбеннән Алия Хәйруллина, Ксения Рысаева, Рәшидә Нагоманова, Гөлназ Сәлахиева, Арча педагогика көллиятеннән Алина Автономова, Гүзәл Шиһабиева, 5нче гимназиядән Алия Зәйнуллина, Зөһрә Фәсхиева, Диләрә Заһриева, Арчаның 2нче мәктәбеннән Сабина Сабирова.
Иң көчле уенчыларның берсе Алина Автономова белән сөйләшәбез.
— Арча педагогика көл-лиятенең 1нче курсында укыйм, — дип сөйли ул. — Арчада яшим. Баскетбол белән 3 ел шөгыльләнәм.
— Ни өчен баскетболны сайладыгыз?
— Командалы уеннарны яратам.
— Белоруссиягә октябрьдә ярышка бардыгызмы?
— Юк, бармадым. Анда яшьрәкләр уйнады.
— Питрәчтә көчле командалар бар идеме?
— Көчле түгел, ә бәлки лаеклы командалар бар иде, дип әйтер идем. Мин үзебезнең җиңәчәккә ышандым. Безнең Җәүдәт Абдуллович бик шәп тренер. Без даими шөгыльләнәбез, ярышлар алдыннан бигрәк тә каты уйныйбыз. Шулай итеп остара барабыз, җиңүгә ышаныч туа.
1нче мәктәптә укучы Алия Хәйруллина шулай ук оста уенчылар исәбендә.
— Баскетбол белән дүртенче ел шөгыльләнәм, — ди ул. — Мәктәптә дә безнең аерым баскетболчылар командасы бар. Тренерыбыз — Айрат Альбертович. Мәктәпләр арасында район, республика, Россия беренчелегенә ярышлар оештырыла. Узган ел республика дәрәҗәсенә чыктык. Быелгы ярышлар 7 декабрьдә башлана. “Арча” спорт мәктәбендә Җәүдәт Абдуллович җитәкчелегендәге команда белән Питрәчтән җиңеп кайтуыбыз зур шатлык булды. Без хәзер алдагы ярышларга яхшы кәеф белән тагын да ныграк әзерләнә башладык.