Менә шундый алар, безнең якташлар!^

Менә шундый алар, безнең якташлар!^
9 декабрьдә Россиядә Ватан Геройлары көне билгеләп үтелә.
Шушы уңайдан безнең районнан чыккан Советлар Союзы Геройлары турында иң мәгълүматлы кешеләрнең берсе булган Луиза апа Садыйкова белән әңгәмә корып алдык. Ул аларның өчесе белән үзе очрашкан, һәрберсе турында озаклап сөйли ала.
— Түбән Оры балаларын Мәскәүгә Гатаулла Салихов (ул шушы авылдан) янына алып бардым. Аның якташларын күреп шатлануы, балаларның бәхетле йөзләре бүген дә күз алдында тора, — ди ул.
Советлар Союзы Герое Нәкыйп Сафин “Северный” совхозында директор булып эшләгәндә Шекәдә район пионер лагере ачалар. Луиза апа ул елларда пионервожатый була.
Ә инде Советлар Союзы Герое Гани Сафиуллин аңа бигрәк тә якын. Луиза апаның әтисе Сабир Садыйков Иске Кишеттә җидееллык мәктәпнең беренче директоры булган. Луиза Садыйкова Гани Сафиуллин исемендәге дружина булдыра, 1964 елда Герой туган авылына кайта, укучылар, авылдашлары белән очраша.
Мәктәптә Гани Сафиуллин исемендәге дружина бүген дә бар. Музейда аның турында шактый мәгълүмат тупланган. Киләсе елда мәктәп ныклап төзекләндерелгәннән соң музейга иркенрәк урын бирмәсләрме дип тә өметләнәләр.
— Мин сугышта катнашкан һәркемне Герой дип исәплим, — ди Арча ЗУЭСы җитәкчесе Рөстәм Гомәров. — Ә Гани Сафиуллин татар Советлар Союзы Геройлары арасында аерым урын тота. Үзенең истәлекләрендә маршал Г.Жуков та аны бик җылы итеп искә ала. Алар истәлеген саклау — безнең бурыч.
Иске Кишеттән ерак түгел урнашкан Симетбаш авылында туып–үскән “Таттелеком” акционерлык җәмгыяте генераль директоры, Татарстан Республикасы Дәүләт Советы депутаты Лотфулла Шәфигуллин да, аның урынбасары Рөстәм Гомәров та элеккеге хәрбиләр, офицерлар. Лотфулла Нурислам улы республикада, районда бик күп игелекле эшләр башкара. Әле менә Җиңүнең 70 еллыгына әзерлек барган көннәрдә дә нинди игелекле гамәлләр эшләп була икән дип йөри ул. Бу юлы Советлар Союзы Герое Гани Сафиуллинны биргән Иске Кишет авылына да чират җитте. Башта ул 1962 елдан бирле алыштырылмаган агач баганаларга, чокыр–чакырлы урамнарга гаҗәпләнеп авылны әйләнеп чыга. Геройны хәтерләткән бернәрсә юклыгы гаҗәпләнүне тагын да арттыра.
Яңа Кишет авыл җирлеге башлыгы Тәбрис Арсланов Иске Кишеткә юл тотканчы мәктәпкә алып керде.
— Быел Лотфулла Нурисламович мәктәпнең ашханәсен ремонтлаттырды, шундый әйбәт килеп чыкты ул! — диде.
Юлда да сөйләп барды: “Аның ярдәме белән быел Иске Кишеттә бар йортка кабельле телевидение, Интернет, телефон керде. Электр баганалары алыштыру 2015 ел планына кертелгән, дип ишеттек. Гани Сафиуллин яшәгән йортка кадәр таш түшәп бирделәр. Авылда Геройга багышланган нинди мәһабәт мемориаль–һәйкәл барлыкка килде”.
Ильяс ФӘТТАХОВ