Кечкенә, әмма төш кенә

Кечкенә, әмма төш кенә
Шура клубында булганым бар иде инде. “Чордашлар” ансамбленең юбилей кичәсендә. Күптән түгел тагын шул якларга барырга туры килде. Бу юлы да клубка кереп чыгарга булдым. Бик иске бинада урнашкан ул. Кайчан төзелгәнен дә хәтерләмиләрдер авылда. Тамаша залы, сәхнәсе дә бик кечкенә. Әмма шушында халыкны җыеп, төрле чаралар оештырып, гөр килеп эшлиләр. “Чордашлар”ы кебек сәнгать дөньясына гашыйк ярдәмчеләре булганда клуб мөдире Клара Хөсәеновага да җиңел.
Клара үзе Ташкентта туып–үскән. 1991 елда әти–әнисе туган ягы Шурага кайткан, кияүгә чыккан. Ташкенттагы Надежда Крупская исемендәге педагогия училищесын тәмамлаган кыз башта Шурабаш мәктәбендә лаборант, рәсем укыткан. Аннан балалар бакчасын җитәкләгән. Кайнанасы вафатыннан соң балаларын карар өчен эштән китәргә мәҗбүр булган. Клуб мөдире Гөлнара Муллагалиева авылдан күчеп киткәч, Кларага клубны җитәкләргә тәкъдим иткәннәр.
— Клуб котельныенда эшләдем мин. Чаралар үткәргәндә Гөлнарага булышкалый идем. Шуңадыр: “Иң мөһиме — сәләтең бар. Тырышсаң — булдырырсың”, — диделәр.Ике ел үтте инде. Хезмәтем бик ошый. Рәхәтләнеп, күңел биреп эшлим. Авыл халкы да сәнгатьне ярата, берсүзсез, бер каршылыксыз чаралардакатнаша. Анысы да клуб мөдире өчен зур әйбер, — ди Клара Хөсәенова. — Ә “Чордашлар” — авылның горурлыгы, минем терәк. Хәзер ветераннар ансамблен яшәртә, олыгайган, киткәннәр урынына 45-50 яшьлек өлкәннәребезне кертә башладык. Авыл җирлеге өч авылга бер булса да аппаратура алып бирде. Бик кирәк иде.
Шура клубында һәр бәйрәмне зурлап билгеләп үтәләр. Клара бу хакта сөйләп тә тормый, шулай тиеш, дип уйлый. Моннан тыш үткәрелгән чараларга гына аерым–аерым тукталды.
— Балалар бакчасында эшләүче гармунчыбыз Рәмзия Гайфуллинаның 45 яшьлек бенефисын билгеләп үттек, — ди клуб мөдире. — Өлкәннәр көне бик күңелле узды. Нәүрүз бәйрәмен урамда оештырдык. Үземнең әти пылау пешерде. “Чордашлар” чыгыш ясады. Наза, түгәрәк уен кебек борынгы уеннарны искә төшердек. Безнең Кашшаф Рәхмәтуллин, Кәрим Бариев кебек оста гармунчыларыбыз бар.Алар игътибар үзәгендә булды. Мондый чараларны оештыруда китапханәче Гүзәлия Фазылҗанова бик булыша. Ул бик яхшы алып баручы да.
Моннан тыш армиягә китүчеләрне бөтен авыл белән зурлап озатуны традициягә керткәннәр.
— Узган ел Айнур Әхмәтшинны озату кичәсе үткәрдек. Олысы, кечесе клубка җыелды. Концерт куйдык. Быел шулай ук зурлап каршы да алдык үзен. Егетебез кичәгә күчтәнәчләр белән килде, өлкәннәргә чәй эчертте, балаларны да онытмады. Чын бәйрәм ясадык. Традиция буенча Фәнис Һидиятуллинны озаттык. Яшьләр өчен дә зур тәрбия чарасы бу, —ди Клара.
“Чордашлар” ансамбленең 5 еллык юбилее искиткеч матур булды. Анда үзем дә катнаштым, өлкәннәрнең сәхнәдән чыгыш ясауларына сокланып утырдым. Алар авылда гына түгел, районда,хәтта республикада да таныш. Телевидениедә “Аулак өй” тапшыруында чыгыш ясаган, “Түгәрәк уен”фестивалендә мактаулы исемнәр яулаган данлыклы ансамбль.
— Якташыбыз Галиәхмәт Шаһинең иҗат кичәсен билгеләп үттек. Ул Чаллыда яши. Янына барып сөйләштек. Галиәхмәт абый теләгебезне хуплады, үзе белән артистлар да алып килде. Бу очрашуны оештыруда авыл җирлеге дә, мәдәният идарәсе дә ярдәм итте, — ди Клара Хөсәенова.
Клара үзе дә скетчларда катнаша, үзбәкчә бии. Кенәр зонасына кергән мәдәният учреждениеләре берләшеп, концерт куюны оештырганнар. Берничә урында чыгыш ясаганнар инде. Анда Шура үзешчәннәре дә бар. Шул кечкенә генә клубта музейга кадәр булдырганнар. Аңа материаллар туплауда барлык авыл халкы ярдәм иткән.
Клуб мөдире активистларның күңелләрен күрергә дә тырыша. Төрле экскурсия-ләр оештыра. Әнә шулай авыл халкы белән бергәләп эшләү сәнгать дөньясын җанландыра да инде.
Гөлсинә ЗИННӘТОВА