Маша һәм аның командасы “Өмет чыганагы”нда

Маша һәм аның командасы “Өмет чыганагы”нда
“Өмет чыганагы” балаларны тернәкләндерү үзәгендә искиткеч матур, җылы кичә булды.Шәһәрнең өченче номерлы микрорайоны башлангыч бүлекчәсе сәркатибе Сәрия Шәмсетдинова җитәкчелегендә Арча педагогика көллияте яшь гвардиячеләре бүләк итте аны. Балаларның телевизорлар яныннан китмичә караган “Маша һәм Аю” мультфильмындагы Машаның кунакка килүе, аның кичәне шундый җанлы итеп алып баруы балаларны дәртләндереп җибәрде.
— Бүген мин укытучы һөнәрен юкка сайламавыма тагын бер кат инандым, — ди Маша — Арча педагогика көллиятенең 5Д курсы укучысы Гөлназ Нуриева. — Мөмкинлек-ләре чикләнгән балалар белән беренче тапкыр эшләвем. Аларның тормышка мәхәббәтләренә сокланып туя алмадым.
Машаның “командасы” да, курсташлары Гөлия Сабирова, Сиринә Низамиева, Рузилә Фәттахова, Адилә Хәйретдинова шундый фикердә. Алар оештырган уеннар балаларга бик ошады, рәхәтләнеп катнаштылар, “Судан” кармак белән “балык” та тоттылар, капкага туп та аттылар, шарлардан курчаклар да ясадылар. Кичәгә килгән әти-әниләр, кунаклар да балаларның җанланып китүләренә, чын күңелдән бирелеп уйнауларына сөенеп утырдылар.
Үзәктә тәрбияләнүче балалар үзләре дә җавап-сыз калмады. Аларның сәнгать өлкәсендәге осталыклары белән таныш инде без. Мөмкинлекләре чикләнгән балалар арасында Чаллыда оештырылган республика фестивальләрендә алар ел да лауреат исемнәрен яулыйлар. Әлеге фестиваль лауреатлары булган Тася Богомолова, Альбина Нургалиева, Рәсим Әхмәтҗанов белән Аделина Вафина, Рәнис Хәйруллин, Рафил Дәүләтбаев белән Тимур Солтанов чыгышларыалкышларга лаек булды.
Балаларны бәйрәм белән котларга халыкны социаль яклау бүлеге җи-тәкчесе Илдус Әһлиев, “Бердәм Россия” сәяси партиясенең Арча җирле бүлекчәсе башкарма комитеты җитәкчесе Тәлгать Җәләлетдинов, район ветераннар советы рәисе Альберт Җамалиев һәм башкалар да килгән иде.
— “Өмет чыганагы” балаларны тернәкләндерү үзәгенә даими ярдәм күрсәтеп торучы иганәчеләребез дә бар. Кайбер-ләре бу кичәгә дә килде. Балаларга күчтәнәчләре дә бар иде, — диде Тәлгать Җәләлетдинов. — Руслан Касыймов, Лилия Гарәфиева, Исхак Минхәиров, Рөстәм Хәсәнов, Әмир Әмирфатовка изге эшләре өчен мөмкинлекләре чикләнгән балалар исеменнән чын күңелдән рәхмәтебезне белдерәбез.
Гөлсинә ЗӘКИЕВА