Еламас өчен елмаям

Еламас өчен елмаям
Район үзәк китапханәсенә сукырлар һәм начар күрүчеләр җәмгыяте әгъзалары җыелды. Очрашуны китапханәнең зурлар бүлеге мөдире Әлфия Галимова алып барды. Бик җылы, матур очрашу булды ул.
Китапханәдә генә була ала андый чаралар. Гадәттә алар тыныч, гади, дустанә мохиттә үтә. Әлфия Галимованың йомшак һәм әкрен генә сөйләве, китапханәче Миләүшә Кәлимуллинаныңтыныч кына моңлы итеп җырлавы тормыш кытыршылыклары белән тупасланган, әрнүле күңелләрне изрәтеп җибәрә. Андый шифа барыбызга да кирәк. Гөлнара Хөсәенова, фортепьянода уйнап, барыбызны да уйга калдырды... Без, якты дөньяны күрүчеләр, тормышның, бер–беребезнең кадерен беләбезме икән?! Ә Гөлнара 6 яшьтән берни күрми.
— Миңа тәүлекнең 24 сәгате җитми, — дип шаккатырмасынмы ул.
— Безнең Гөлнара шундый матур итеп бәйли, — ди әнисе Гөлсөя ханым. — Күлмәкләр, кофталар бәйли.
— Китаплар укырга яратам, — дип тә сокландырды Гөлнара. — Классика, тарихи, детектив китапларны күбрәк укыйм. Телевизордан кинолар, тапшырулар тыңлыйм.
Әнисе Гөлсөя ханымның күңел күтәренкелеге күбебезгә өлге булып тора. Шаян нәфис сүз сөйләп көлдереп тә алды ул безне.
Очрашуны алып баручы Әлфия ханым мөмкинлекләре чикләнгән шагыйрьләрнең шигырьләрен укыганда гыйбрәт алып, уйга калып утырдык. Фәнис Яруллин, Фазыл Шәех, Галиәхмәт Шаһи, Рәниф Шәрипов... Шурадан Галиәхмәт Шаһиның сүзләре күңелгә кереп калды: “Еламас өчен елмаям...”
Арчадан Илгизәр Хөсәеновның баянда уйнап җырлавын, Рәдиф Шәйдуллинның баянда уйнавын яратып тыңладык.
Чыгышы белән Штерәдән, хәзер Арчада яшәүче Хәдичә Иванова Муса Җәлил шигырен укыды.
— 7 сыйныфтан күзлексез бернәрсә күрмәс булдым, — дип сөйли Хәдичә ханым. — Күзлек кидем. Хәзер миңа 55 яшь. Төрле вакыт булды инде. Сукыр тәре, дигәнне дә ишеттек. Теләгем шул: безне кешегә санасыннар иде.
— Ә барыбер дә соңгы вакытта мөмкинлекләре чикләнгәннәргә караш, игътибар артты, — дип сөйли сукырлар җәмгыяте рәисе Зөфәр Зарипов. — Сукырлар һәм начар күрүчеләр өчен тротуарларга тактиль плитәләр җәюләре әйбәт булды. Банклар янына да кирәк ул. Җәяүлеләр өчен светофорларкуелды. Дөрес, алар начар күрүчеләр өчен тавышлы булса уңай. Яңа Кенәр чатындагы светофор тавышлы.
— Үзәк китапханәгә дискта, кассетада китаплар, “Казан утлары”, “Идел” журналларының кайтуына да сөенәбез, — ди җәмгыятьнең сәркатибе Ләйсән Зарипова. — Сукыр, начар күрүчеләргә башкалар ихтирамлы, игътибарлы булсыннар иде. Әле бер көн генә безнең якын танышыбыз, ул бик начар күрә, баласы белән юл аркылы чыгып барганда аягы таеп егылган. Шунда үтеп баручы берәү ярдәм итү урынына, сукыр түгелсеңдер ич, балаң барлыгын да онытып егылып торасың, дип каһәрләп киткән. Ә бит, чыннан да, аның күзләре начар күрә. Күңеле бик әрнегән.
Районда күз күреме буенча барысы 270 инвалид бар. Шуның күпмесе бала — ачыклап булмады. Ә начар күрүчеләргә җәмгыятьтә берләшергә кирәк. Проблемаларны бергәләп хәл итсәң, бергә булсаң җиңелрәк. Мәрхәмәтлек үзәге җитәкчесе Руфия Баһаветдинова яңа-лыклар турында сөйләде.
Яңа елдан ашыгыч социаль хезмәт күрсәтелә башлавы мөмкинлекләре чикләнгәннәргә уңай булачак. 3–23–30,
3–13–36 номерларын җыясың да, ашыгыч гозереңне әйтәсең.
... Еламас өчен елмаям. Мөмкинлекләре чикләнгән-нәрнең күңел халәте әнә шундый. Бер–беребезгә ихтирамлы, игътибарлы булыйк.
Румия НАДРШИНА