Тарихи гаделлек кадерлерәк

Тарихи гаделлек кадерлерәк
Һәр чор үз геройларын тудыра, батырлыкка һәрвакыт урын бар.9 декабрьдә Ватан Геройлары көнендә Арчада уздырылган кичә әнә шул рухта үтте.
Анда сугыш һәм хезмәт ветераннары, районыбызның яшь буын вәкилләре, кунаклар, район башкарма комитеты җитәкчесе Илшат Нуриев катнашты. Аларны “Бердәм Россия” партиясенең яшь гвардиячеләре (Арчаның 1нче урта мәктәбе укучылары) сәламләп каршы алды.
Районыбыз халкы үзенең Геройлары белән хаклы рәвештә горурлана. Алып баручылар аларның һәркайсы турында сөйләп үттеләр. Советлар Союзы Геройлары Валентин Ежков, Гатаулла Салихов, Нәкыйп Сафин, Гани Сафиуллин исемнәрен без мәктәп елларыннан белеп үстек.
Без сугышта юлбарыстан көчлебез, без тынычта аттан артык эшлибез, дигән шигырь юллары районыбыз кешеләре турында язылган, диярсең. Илсур Шәйхет-динов, Мирбат Хәстиев, Шәрифулла Сәгъдуллин, Дания Галимова, Стелла Габдрахманова, Галимулла Әсхәдуллин фидакарь хезмәтләре өчен Социалистик Хезмәт Герое исеменә лаек булдылар, районыбыз тарихына аларның исемнәре алтын хәрефләр белән язылды.
Әлеге чарада Социалистик Хезмәт Герое Стелла Габдрахманованың катнашуы анытагын да тантаналырак итте.
— Мин Геройларыбызның күбесе белән таныш идем, алар, чыннан да, бу исемгә бик лаеклы кешеләр иде, — диде ул. — Дания Галимованың хезмәтенә ничек бирелгән булуын күреп соклана идем. Шәрифулла Сәгъдуллин тракторы белән көнгә өчәр норма үти иде.
Герой яшьләрне тырышып укырга, намус белән хезмәт итәргә, чын кешеләр булырга чакырды.
Бөек Ватан сугышы ветераны Халисә Гафурова: “Кирәк булгач, без мылтыктан атарга да өйрәндек. Тыныч тормышның кадерен белик!” — диде.
“Сугышчан туганлык” оешмасы җитәкчесе Сергей Баһаветдинов үзенең ялкынлы чыгышында Ватанны саклау, хәрби бурычны үтәү төшенчәләренең һәркем өчен изге булуын әйтте. Гасырлар буе бу шулай килгән һәм шулай булып калырга да тиеш. Моның мисалларын без һәрвакыт күреп торабыз, “кайнар нокта”ларда гомерләре өзелгәнякташларыбыз истәлеген изге итеп саклыйбыз.
Арчаның 2нче урта мәктәбе укытучысы, Әфган сугышында һәлак булган якташыбыз Марат Лотфуллинның сыйныф җитәкчесе Татьяна Егорова чыгышын тыңлаганда тамакларга төер утырды, күзләрдә яшь иде.
Арча педагогика көллияте укытучысы, “Кар десанты” эзләү отряды җитәкчесе Илһам Низаметдиновның каты сугышлар барган “Үлем үзәне”ндә әле бик күп сугышчыларыбызның сөякләре күмелмиятуы турында сөйләвен дә тыныч кына тыңлау мөмкин түгел: “Без 200ләп сугышчының калдыкларын җирләдек, өч кешенең кемнәр булуын ачыклый алдык”, — диде.
Шундый эзтабарлар өч якташыбызны табып бирделәр. Аларның икесе туган авыллары зиратларында җирләнде, өченчесен кайтару эшләре алып барыла.
Әлеге кичәдә район башкарма комитеты җитәкчесе Илшат Нуриев, Социалистик Хезмәт Герое Стелла Габдрахманова, Бөек Ватан сугышы ветераны Халисә Гафурова, миграция хезмәте бүлеге җитәкчесе Ольга Лошакова районыбызның бер төркем яшьләренә Россия гражданины паспортлары тапшырдылар. Бу көн алар хәтерендә гомергә саклана торган истәлек булып калыр.
— Батырлыкка һәрвакыт урын бар, — диде район башкарма комитеты җитәкчесе Илшат Нуриев. — Без илебез азатлыгы өчен каһарманнарча сугышкан, тыныч хезмәттә фидакарьлек күрсәткән якташларыбыз истәлеген изге итеп саклыйбыз. Алар хөрмәтенә Геройлар Аллеялары булдырылды, урамнарга аларның исемнәре бирелде. Шул ук вакытта безнең өчен тарихи гаделлек кадерлерәк. Соңгы вакытта табылган архив документлары нигезендә Леонид Михайлович Соколовның Биектау районы Бимәр авылында туганлыгы ачыкланды. Бүген без бу документларны Биектау районы вәкилләренә тапшырабыз.
Менә шулай бер Героебыз күршеләргә китте. Әмма соңгы вакытта без тагын биш якташыбызның Советлар Союзы Герое исеменә тәкъдим ителгән булулары турында мәгълүматлар алдык. Алар турында соңрак сөйләрбез.
Ильяс ФӘТТАХОВ