Ачыктан–ачык сөйләштеләр

Ачыктан–ачык сөйләштеләр
“Сезнең һөнәр — элек–электән мактаулы, дәрәҗәле. Исемегез гомер буе укучыгыз күңелендә яшәячәк. Алга куелган бурычыгыз да зур — сезнең эш нәтиҗәсенә, балаларга биргән тәрбиягезгә илебезнең, районыбызның киләчәге бәйле. Шул уңайдан без бүген һәммәбезне борчыган уртак проблемаларны ачыклау, аларны чишү юлларын табу өчен ачыктан–ачык сөйләшүгә җыелдык”.
Шушы сүзләр белән район башкарма комитеты җи-тәкчесе Илшат Нуриев район мәктәпләре директорлары һәм аларның укыту–тәрбия эшләре буенча урынбасарлары белән узган киңәшмәне ачып җибәрде. Мәгариф системасының төп юнәлешләрен үз эченә алган аралашуда мөгаллимнәр үз мәктәпләрендәге тәҗрибәне башкалар белән уртаклашудан тыш, гомуми проблемаларны да җиткерделәр һәм аларны чишү юллары турында фикер алыштылар. Район мәгариф идарәсе җитәкчесе вазыйфаларын башкаручы Зөлфия Кәлимуллина мәгарифнең бүгенге халәте һәм алда торган бурычлар белән таныштырды.
“Россиянең иң яхшы мәктәбе” дәрәҗәсенә ничек ирешеп була? Әлеге сорауга җавапны Лесхоз мәктәбе директоры Зөлфәт Дәүләтбаев үз мәктәпләренең эшчәнлеге мисалында аңлатты. Татар мәктәбендә укыган укучыга БДИны рус телендә тапшыру җиңел түгел. Бу сорауны күмәкләшеп күтәреп чыкканда уңай якка хәл итеп булмасмы? Әмма татарча укыганнар да БДИны яхшы күрсәткечләргә тапшыра бит. Шушмабаш мәктәбе директоры Рәзилә Шәймәрданова моңа ничек ирешеп булуы турында үз тәҗрибәләре белән уртаклашты.
Мәгариф өлкәсе хезмәткәрләренең көндәлек проблемалары да аз түгел. Әйтик, белем күтәрү курсларында укыганда укытучыларга үз акчаларын тотарга туры килә. Шулай ук укучылар район үзәгенә ярышларга, олимпиадаларга барганда әти–әнисеннән юл чыгымнары өчен акча сорарга мәҗбүр. Районда бу мәсьәләләрне чишү мөмкинлеге бармы?
Болар һәр мәгариф хезмәткәренә дә кагыла. Илшат Нуриев аларны хәл итү юлларын эзләячәген, бу сорауларны мәгариф һәм фән министрына да җиткерәчәген әйтте. Район үзәгендә бер генә татар мәктәбе булмавы да җитәкчене борчый.
Лесхоз мәктәбендә 200 бала укый. Ә мәктәп 108 балага гына исәпләнгән. Үрнәктә яңа төзеләчәк балалар бакчасы бинасында башлангыч сыйныф укучыларына да бүлмәләр булмас микән, ди мәктәп директоры.
— Киләсе елга Мөндеш, Үрнәк авылларында бер типтагы балалар бакчалары төзеләчәк. Әлеге стандарт бакчаларның проектына үзгәреш кертеп булмый, — ди Илшат Нуриев. Мәктәп директорларының мәктәпкә вак–төяк төзекләндерү эшләренә шулай ук үз акчаларын тотуга ризасызлыкларына каршы җитәкче булганны саклап тотарга кирәк, дигән фикерне ассызыклап, Пөшәңгәр мәктәбе, Яңа Кенәр лицеен мисалга китерде. “Пөшәңгәр мәктәбе 10 ел элек төзекләндерелгән булган, ә карап торышка быел гына яңартылган кебек”, — диде ул. Район финанс–бюджет палатасы җитәкчесе Фәнис Исмәгыйлев финанс чыгымнарын нәрсә өчен тотарга мөмкинлеген һәм акча бүленүнең үз кысалары барлыгын аңлатты.
Белем бирү нәтиҗәләренә килгәндә, Илшат Нуриев укытуның сыйфатына игътибарны арттырырга кирәклеген ассызыклады. Чөнки район быелгы БДИ нәтиҗәләре буенча түбән төшкән. Шулай ук балаларны чит илдәге яшьтәшләре белән Интернет аша аралашуга юл күрсәтергә дә тәкъдим итте җитәкче.
Җанлы сөйләшү булды бу. Аралашу барышында сөйләшкәннәр нәтиҗәсез калмас, район башкарма комитеты җитәкчесе янына мәктәптәге проблемалар, сорау–тәкъдимнәр белән килүчеләр дә булыр әле. “Андыйлар өчен һәрвакыт ишекләр ачык”, — ди Илшат Нуриев. 25–26 декабрьдә мәктәпләрдә узачак чыршы бәйрәмнәренең кайберләрендә район башкарма комитеты җитәкчесенең дә катнашуы көтелә.
Розалия ЗИННӘТОВА