Кувейт шәехе Арчага нигә килгән?

Кувейт шәехе Арчага нигә килгән?
Көнбатыш мәчетендә мөгаллимәләр бәйгесе үткәрелде.
Инде матур традициягә әйләнеп баручы бу чараны мәчет имамы Рәмис хәзрәт Гарифуллин һәм район мөгаллимәләр шурасы рәисе Рая Фәтхуллина алып барды.
Бәйге кызыклы үтте. Башта мөгаллимәләр сорауларга җаваплар бирделәр. Сорауларның хәтта тәҗрибәле мөгаллимәләрне аптырашта калдырганнары да булды. Җәннәткә кергәч, иң беренче булып нинди ризык кабул ителә? Беләсезме? Балык бавыры икән. Ә мөгаллимәләр берсеннән-берсе белемле, оста булып чыкты. Сорауларга җавапны “сибеп” кенә тордылар. Наласа мәчете мөгаллимәсе Фәридә Галиуллина аеруча күп җавап бирде.
— Мин башта Түбән Атыда дүрт ел укыттым, хәзер Наласа мәдрәсәсендә дини белем бирәм. 23 бала йөри. Ике мөгаллимә атнага өч көн укытабыз. Моннан тыш төрле чаралар үткәрәбез. Балалар белән изге Болгар җиренә дә сәяхәт кылып кайттык, — ди Фәридә Галиуллина. — Үзем быел хаҗга бардым. Күптәнге хыялым тормышка ашты.
Икенче бәйгедә мөгаллимәләр Коръәндә язылмаса да укыла торган хәрефләргә мисаллар яздылар. Алар уйлаган арада Рәмис хәзрәт вәгазь сөйләде. Аннан безнеңчә язылган сүзләрне гарәп хәрефләре белән сырладылар.
Чарага ямь өстәп, мәчеткә ул көнне Кувейттан дин эшләре буенча министр урынбасары киңәшчесе шәех Муаз Баянуни һәм аның тәрҗемәчесе буларак Россия ислам институтыннан Оймахмад Мәликов кайтты. Шәех пәйгамбәребез Мөхәммәт с. г. в.нең кешеләрне ничек яман эшләрдән, гамәлләрдән һәм гадәтләрдән тыеп калуы, хәрам һәм хәләл әйберләр турында сөйләде, пәйгам-бәребез гамәлләре барлык кешелек дөньясы өчен үрнәк булып торуы турында әйтте.
— Арча җире, халкы бик ошады. Мөселманнарның күңел җылысы миңа да күчте. Салкын кары да хәтта җылы булып тоелды. Арча җирендә булуыма бик шатмын, — диде ул соңыннан.
— Бүгенге бәйгедә җиңүчеләргә бүләкләр тапшыруны да без кунагыбызга йөклибез, — диде район мөхтәсибе Раил хәзрәт Гыйлаҗев. — Аның кулыннан бүләк алу алдагы эш-ләрегезгә этәргеч булсын.
Мөгаллимәләр бәйгесендә беренче урынны Шушмабаштан Нурания Габдрахманова алды. Аңа күчмә вымпел, рәхмәт хаты һәм электрон Коръән тапшырылды. Икенче урында Наласадан Фәридә Галиуллина һәм Яңа Кырлайдан Зәйтүнә Гарипова, өченче урында Кәчедән Әминә Гарифова, Арчадан Алсу Хәкимова, Хәсәншәехтан Фирдания Мөхәммәтҗанова. Аларга бүләккә —кәрәзле телефоннар. Бәйгедә барлыгы 18 мөгаллимә катнашты. Берсе дә бүләксез калмады.
Гөлсинә ЗӘКИЕВА